Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #8

Riesen oppe Ieed

Riesen oppe Ieed

WAUT wurscht du sajen, wan doa wäa aunkjeem, waut doa soo groot wia, daut dee bat aum Bän rieekjt? Na, soo groot kaun bloos een Ries sennen! Weetst waut, daut haft oppe Ieed werkjlich mol Riesen jejäft. De Bibel sajcht, dee äare Vodasch wieren Enjel vom Himmel. Oba woo kaun daut sennen?

Kaust du die noch von dän beesen Enjel Soton besennen, waut doa emma bloos Trubbel muak? Dee wull soogoa Gott siene Enjel toom schlajchten veleiden. Met de Tiet horchten eenje Enjel no Soton un deeden nich mea daut, waut Gott an em Himmel oppjejäft haud. Dee kjeemen no de Ieed un muaken sikj Menschenkjarpasch. Weetst du, wuarom?

De Bibel sajcht, dise Säns von Gott sagen de schmocke Frues oppe Ieed un wullen met dee toop sennen. Un doawäajen kjeemen dee no de Ieed un befrieden sikj met dise Frues. Soo aus daut enne Bibel sajcht, wia daut oba orrajcht, dan Gott haud de Enjel jemoakt toom em Himmel läwen.

Dise Enjel un äare Frues hauden Kjinja. Opp verieescht leet de Kjinja veleicht soo aus jeweenlich, oba dan wossen dee un wossen un worden emma stoakja un schlieslich wieren daut Riesen.

Dise Riesen wieren sea schlajcht. Dee wieren soo groot un stoakj un deeden aundre tualeiden. Dee wullen aule Menschen bemotten, uk soo schlajcht to sennen, aus see wieren.

Henoch wia jestorwen, oba daut jeef noch eenen gooden Maun oppe Ieed. Daut wia Noah. Hee deed emma aules, waut Gott von am haben wull.

Eenen Dach säd Gott to Noah, de Tiet wia jekomen, daut hee aule beese Menschen venichten wudd. Oba Noah un siene Famielje uk väle Tieren wull Gott bewoaren. Well wie mol seenen, woo Gott daut deed.

1. Mose 6:1-8; Judas 6