Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #32

De tieen Ploagen

De tieen Ploagen

BESEE die mol de Bilda hia. Dit sent de tieen Ploagen, waut Jehova opp Ägipten komen leet. Opp daut ieeschte Bilt kaust du seenen, woo Aaron met sienen Stock opp daut Wota em Niel Riefa schleit. Aus hee daut deed, wort daut Wota to Bloot. De Fesch jinjen aula doot un de Riefa funk sea aun to stinkjen.

Daut näakjste leet Jehova von utem Niel Poggen rutkomen. De Poggen wieren eefach äwaraul. Dee wieren en de Owes, en de Dieechkommen un soogoa en de Menschen äare Baden. Aus de Poggen dootjinjen, deeden de Ägipta dee to groote Klompes toopschoawen, un daut Launt funk aun to stinkjen.

Dan schluach Aaron met sienen Stock oppe Ieed nopp, un de Stoff wort to kjliene Stäakjflieechkjes. Daut wia de dredde Ploag, waut opp Ägipten kjeem.

De äwaje Ploagen troffen bloos de Ägipta. De Israeliten bleewen doavon veschoont. De vieede Ploag wieren groote Flieejen, waut äwaraul en de Ägipta äare Hiesa nenschwoarmden. De fefte Ploag kjeem opp de Ägipta äare Tieren, un väle von äare Kjieej, Schop un Kosen jinjen doot.

Daut näakjste neemen Moses un Aaron waut Room un schmeeten daut enne Loft nenn. Doavon kjrieejen de Menschen un de Tieren schlemme Schwäaren. Daut wia de saste Ploag.

No dit strakjt Moses siene Haunt ut nom Himmel un Jehova leet daut rumlen un hoaglen. Daut wia de jratsta Hoagel, waut daut en Ägipten jejäft haud.

De achte Ploag wia een grootet Schwoarm Graushoppasch. Noch kjeenmol ea uk nich nodäm wieren doa soo väl Graushoppasch jewast. Dee freeten aules opp, waut no dän Hoagel noch äwajebläwen wia.

Bie de näajende Ploag wort daut diesta. Dree Doag lank wia daut stockdiesta en Ägipten. Bloos doa, wua de Israeliten wonden, wia daut dach.

Schlieslich säd Gott to sien Volkj, see sullen äare Däarenrämes met daut Bloot von eene junge Kos ooda een junget Schop beschmäaren. Dan jinkj Gott sien Enjel derch Ägipten. Wuaemma de Enjel daut Bloot sach, en daut Hus muak dee kjeenem doot. Oba en de Hiesa, wua kjeen Bloot aun de Däarenrämes wia, muak dee aule Ieeschtjebuarne doot, von de Menschen uk von de Tieren. Dit wia de tieende Ploag.

No dise latste Ploag schekjt de Farao de Israeliten wajch. De Israeliten wieren aula reed toom gonen. Noch deeselwje Nacht veleeten see Ägipten.

2. Mose, Kapitels 7 bat 12