Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #100

Jesus em Goaden Getsemane

Jesus em Goaden Getsemane

AUS Jesus un siene Apostel de Bowastow ieescht veloten hauden, jinjen see no dän Goaden Getsemane. En disen Goaden wieren see aul foaken jewast. Jesus säd to siene Apostel, see sullen waka bliewen un bäden. Dan jinkj hee een Enjskje wieda un bekjt sikj bat oppe Ieed un deed bäden.

Lota kjeem Jesus trigj doahan, wua siene Apostel wieren. Waut jleefst du, waut dee deeden? Dee schleepen! Dree Mol säd Jesus to an, see sullen waka bliewen, oba jiedatsmol, wan hee trigjkjeem, wieren see wada enjeschlopen. ‘Woo kjenn jie nu eefach schlopen?’, fruach Jesus an, aus hee daut latste Mol trigjkjeem. ‘De Stund es jekomen, daut ekj miene Fiend äwajäft woa.’

Doaräwa wia uk aul eene Häad Menschen to hieren. Dee kjeemen met Schwieets un Kjneppels aun. Dee hauden uk Fiastakja met, daut see kunnen em diestren seenen. Aus dee ieescht noda wieren, kjeem eena von dee jlikjtoo no Jesus. Dee jeef Jesus eenen Kuss, soo aus du hia seenen kaust. Daut es Judas Iskariot. Wuarom deed dee daut?

Jesus fruach: ‘Judas, deist du mie met eenen Kuss veroden?’ Soo wia daut. De Kuss wia een Tieekjen fa de Mana, waut met Judas toop jekomen wieren. Nu wisten dee, woont Jesus wia, un wullen am jeleewat nämen. Oba Petrus wull daut nich jrodsoo tochloten, daut dee Jesus faustneemen. Hee kjrieech sien Schwieet rut un hold eent ut no eenen Maun, waut doa dicht bie am stunt. Hee troff dän jroz biesied dän Kopp un schneet dän daut rajchte Ua auf. Oba Jesus foot dän Maun sien Ua aun un heeld daut.

Jesus säd to Petrus: ‘Stäakj dien Schwieet wada trigj. Jleefst du nich, ekj kaun mienen Voda no dusende Enjel froagen, daut dee mie komen raden?’ Jesus haud daut kunt doonen. Oba hee deed daut nich, wiels hee wist, daut nu de Tiet jekomen wia, wua siene Fiend am faustnämen wudden. Un soo leet hee sikj metnämen. Well wie mol seenen, waut nu met Jesus wort.

Matäus 26:36-56; Lukas 22:39-53; Johanes 18:1-12