Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #61

David woat Kjennich

David woat Kjennich

SAUL wull David wada jeleewat nämen. Hee neem 3 000 von siene baste Soldoten un jinkj no David sieekjen. Aus David daut enwort, schekjt hee waut Spionen noseenen, wua Saul un siene Mana Nacht bleewen. Dan fruach David twee von siene Mana: ‘Wäa von junt jeit met mie met no Saul sien Loaga?’

‘Ekj’, säd Abischai. Abischai wia de Sän von David siene Sesta Zeruja. Aus Saul un siene Mana aula schleepen, schlikjten David un Abischai sikj gaunz plietsch en daut Loaga nenn. Biesied Saul sienen Kopp sagen see dän sienen Spies un siene Wotakruck un neemen dee met. Kjeena wort waut en, wiels dee aula faust schleepen.

Opp daut Bilt kaust du David un Abischai seenen. See hauden daut Loaga veloten un wieren hia nu opp eenen Boajch en Sechaheit. Von hia bowen roopt David dän Väaschten von Saul sien Kjrichshäa un säd: ‘Abner, wuarom paust du nich no dienen Harn, dän Kjennich, opp? See mol no, wua dän sien Spies un siene Wotakruck sent!’

Doamet wuak Saul opp. Hee kjand David siene Stemm un fruach: ‘Best du daut, David?’ Kaust du Saul un Abner dort unjen seenen?

‘Jo, ekj sie daut, mien Har un Kjennich’, auntwuad David un fruach: ‘Wuarom best du mie hinjaraun? Waut fa schlajchtet hab ekj jedonen? Hia es dien Spies, mien Kjennich. Lot eent von diene Mana dän holen.’

‘Ekj hab eenen Fäla jemoakt’, stunt Saul too. ‘Ekj hab die orrajcht jedonen.’ Doaropp jinkj David sienen Wajch un Saul wankt trigj no Hus. Oba David säd sikj: ‘Eenen Dach woat Saul mie dootmoaken. Ekj hab bäta, ekj brinj mie fuat no de Filista äa Launt.’ Un soo jinkj hee dorthan. David kunn de Filista enbillen, daut hee nu an biestunt.

Eenje Tiet lota kjeemen de Filista jäajen de Israeliten kjamfen. En disen Kaumf storwen Saul un Jonatan. Daut muak David sea truarich un hee schreef een scheenet Leet, wua hee sunk: ‘Ekj sie soo truarich, mien Brooda Jonatan. Du wieescht mie soo väl wieet!’

Nodäm jinkj David trigj no Israel, no de Staut Hebron. Dan jeef daut eenen Kjrich tweschen dee, waut Saul sienen Sän Isch-Boschet toom Kjennich wullen, un dee, waut leewa wullen David toom Kjennich haben. Oba schlieslich jewonnen David siene Mana. David wia 30 Joa oolt, aus hee Kjennich wort. Hee rejieed säwenunhaulf Joa lank en Hebron. Doa worden uk siene Junges Amnon, Absalom un Adonija jebuaren.

Eenen Dach neemen David un siene Mana de schmocke Staut Jerusalem en. En disen Kaumf wia Joab de Väaschta. Daut wia uk een Sän von David siene Sesta Zeruja. David beloond Joab doafäa un muak dän toom Väaschten von sien Kjrichshäa. Von doa aun rejieed David en de Staut Jerusalem.

1. Samuel 26:1-25; 27:1-7; 31:1-6; 2. Samuel 1:26; 3:1-21; 5:1-10; 1. Chronik 11:1-9