Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #39

Aaron sien Stock blieecht

Aaron sien Stock blieecht

KJIKJ mol dis Stock hia. Dee blieecht un drajcht riepe Maundelnäten. Dee jehieet Aaron. De Bloomen un de riepe Näten sent en eene Nacht aun disen Stock jewossen! Well wie mol seenen, wuarom.

De Israeliten wieren aul een Stoot enne Wiltnis romjewaundat. Eenje von daut Volkj wullen Moses nich mea toom Leida haben un wullen uk nich mea, daut Aaron de Huaga Priesta wia. Eena von dee wia Korach. Uk Datan, Abiram un noch 250 aundre väaschte Mana wieren soo jesonnen. Dee jinjen aulatoop no Moses un säden to am: ‘Wuarom jleefst du die hecha aus wie aula?’

Moses säd dan to Korach un to dee, waut dän biestunden: ‘Nämt junt morjen zemorjes Paunen un doot doa Rieekjastoff nenn un komt no Jehova sien Aunbädungszelt. Dan woa wie seenen, wäm Jehova utwälen woat.’

Näakjsten Dach jinjen Korach un siene 250 Mana nom Aunbädungszelt. Uk noch väle aundre kjeemen doa han toom dee biestonen. Jehova wia sea doll. Dan säd Moses to daut Volkj: ‘Velot von dise beese Mana äare Zelten. Doot nuscht aunfoten, waut dee jehieet.’ De Menschen horchten no Moses un brochten sikj von Korach, Datan un Abiram äare Zelten wajch.

Dan säd Moses: ‘Doaraun woa jie seenen, wäm Jehova jewält haft: De Ieed woat oprieten un woat dise beese Menschen oppschlucken.’

Un doamet spoold de Ieed sikj uk aul, un Korach sien Zelt un aules, waut dän jehieed, foll doa nenn. Uk Datan, Abiram un aul dee, waut an biestunden, follen doa nenn. Dan jinkj de Ieed wada too. Aus de Israeliten dee schrieen hieeden, brelden see: ‘Wajch von hia! Sest woat de Ieed ons uk oppschlucken!’

Korach un siene 250 Mana wieren oba noch bie daut Aunbädungszelt. Soo schekjt Jehova een Fia un dee vebrenden aula. Jehova säd dan to Aaron sienen Sän Eleasar, hee sull de doodje Mana äare Paunen nämen un sull doavon een dennet Blajch moaken un dän Aultoa doamet betrakjen. Dit Blajch aum Aultoa sull de Israeliten denkjen halpen, daut bloos Aaron un siene Säns aus Priestasch deenen sullen.

Jehova wull daut oba noch dietelja moaken, daut hee bloos Aaron un siene Säns to Priestasch jewält haud. Doawäajen säd hee to Moses: ‘Von jieda Staum Israel saul eena von de väaschte Mana eenen Stock häabrinjen. Fa dän Staum Levi saul Aaron eenen Stock häabrinjen. Dan saust du aul dise Stakja en daut Aunbädungszelt ver de Bundeskjist hanlajen. Un dän Maun, dän ekj toom Priesta jewält hab, dän sien Stock woat blieejen.’

Aus Moses näakjsten Dach zemorjes jinkj noseenen, wieren aun Aaron sienen Stock Bloomen un riepe Maundelnäten jewossen! Weetst du nu, wuarom Jehova Aaron sienen Stock blieejen leet?

4. Mose 16:1-35; 17:1-14, 16-26