Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #80

Gott sien Volkj velat Babielon

Gott sien Volkj velat Babielon

DICHT bie twee Joa wieren aul vegonen von don, aus de Meeda un Persa Babielon enjenomen hauden. Un kjikj, waut nu passieet! De Israeliten veloten Babielon. Woo sent see friejekomen? Wäa haft an gonen loten?

Daut wia Kierus, de Kjennich von Persien. Noch lang ea Kierus jebuaren wia, leet Jehova aul derch sienen Profeet Jesaja äwa dän schriewen: ‘Du woascht krakjt daut doonen, waut ekj haben well. De Stautsdäaren woaren opjeloten woaren, soo daut du de Staut ennämen kaust.’ Un soo wia daut uk. Babielon wort von Kierus enjenomen. De Meeda un Persa kunnen de Nacht en de Staut nenkomen, wiels de Babielonia hauden de Stautsdäaren opjeloten.

De Profeet Jesaja säd uk verut, Kierus wudd befälen, daut Jerusalem un de Tempel wada oppjebut sullen. Deed Kierus daut befälen? Jo, dee deed. Dee säd to de Israeliten: ‘Got no Jerusalem un but dän Tempel fa Jehova, junen Gott.’ Un soo muaken de Israeliten sikj oppem Wajch no Jerusalem, soo aus du hia seenen kaust.

Oba nich aule Israeliten en Babielon kunnen de Reis trigj no Jerusalem moaken. Daut wia een sea langa Wajch, soo bie 800 Kilomeeta (500 Miel), un väle wieren aul too oolt ooda too krank toom soo wiet reisen. Daut wia uk noch wäajens aundre Sachen, wuarom eenje Israeliten nich metjinjen. Kierus säd to dee, waut bleewen: ‘Jie sellen dee, waut trigjgonen un Jerusalem un dän Tempel oppbuen, Selwa un Golt un aundre Sachen metjäwen.’

Un soo kjrieejen de Israeliten, waut no Jerusalem reisden, väl Sachen jejäft. Kierus jeef an uk de Kommen un de Kuffels met, waut Kjennich Nebukadnezar haud ut Jehova sienen Tempel jenomen, aus dee Jerusalem venicht haud. De Israeliten hauden väl mettonämen.

Ojjefäa vea Moonat lota kjeemen de Israeliten en Jerusalem aun. Daut wia jroz to rajchte Tiet, wiels daut wieren nu krakjt 70 Joa von don, aus Jerusalem wia venicht worden un waut daut Launt onbewont wia. Uk wan de Israeliten nu wada en äa ieejnet Launt wieren, hauden see oba schwoare Tieden ver sikj. Doavon haundelt sikj de näakjste Jeschicht.

Jesaja 44:28; 45:1-4; Esra 1:1-11