Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #50

Twee forchtloose Frues

Twee forchtloose Frues

AUS de Israeliten em Trubbel wieren, deeden see Jehova om Help prachren. Jehova horcht no an un jeef an stoakje Leidasch, waut an halpen deeden. Enne Bibel woaren dee ‘Rechtasch’ jenant. Josua wia de ieeschta Rechta, un no am jeef daut noch aundre, soo aus Otniel, Ehud un Schamgar. Oba doa wieren uk twee Frues, waut de Israeliten holpen. Daut wieren Debora un Jael.

Debora wia eene Profeetin. Jehova leet ar weeten, waut noch komen wudd, un see säd daut Volkj daut dan. Oba Debora wia uk eene Rechtarin. See saut unja eenen Paulmboom enne Boaj un de Menschen kjeemen no ar, wan dee sikj met äaren Trubbel nich Rot wisten.

To dee Tiet wia Jabin de Kjennich von Kanaan. Dee haud 900 Kjrichswoages. Wiels dän sien Kjrichshäa soo stoakj wia, kunn dee väle Israeliten bemotten, am to deenen. De Väaschta von Jabin sien Kjrichshäa heet Sisera.

Eenen Dach roopt Debora dän Rechta Barak un säd to dän: ‘Jehova haft jesajcht: “Nemm die 10 000 Mana met un go no dän Boajch Tabor. Dort woa ekj Sisera hanleiden. Un ekj woa die jäajen dän un sien Kjrichshäa loten jewennen.”’

Barak säd to Debora: ‘Ekj woa gonen, wan du metkjemst.’ Debora jinkj met, oba see säd to Barak: ‘Du woascht nich de Iea kjrieen fa disen Kaumf jewennen, wiels Jehova woat eene Fru loten äwa Sisera jewennen.’ Un soo kjeem daut uk.

Barak jinkj von dän Boajch Tabor rauf, Sisera sien Kjrichshäa entjäajen. Plazlich leet Jehova eene Äwaschwamunk komen, un väle von Sisera siene Kjrichsmana vedrunken. Sisera oba sprunk von sienen Woagen rauf un kleiwd ut.

Een Stootje lota kjeem Sisera no Jael äa Zelt. See kroagd dän nenn un jeef dän waut Malkj to drinkjen. Daut muak dän schleeprich un boolt wia dee faust enjeschlopen. Dan neem Jael eenen Zeltstekjel un schluach dän en disen beesen Maun sienen Kopp nenn. Lota, aus Barak kjeem, wees see am dän doodjen Sisera. Soo aus du seenen kaust, kjeem daut krakjt soo rom, aus Debora jesajcht haud.

Schlieslich wort uk Kjennich Jabin dootjemoakt un de Israeliten hauden wada fa een wesset Stoot Fräd.

Rechta 2:14-22; 4:1-24; 5:1-31