Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #104

Jesus foat trigj nom Himmel

Jesus foat trigj nom Himmel

DE DOAG vejinjen un Jesus leet sikj noch välmol von siene Nofolja seenen. Eemol sagen am ojjefäa 500 Jinja opp eemol. Weetst du, von waut Jesus vetald, wan hee met an toop wia? Hee vetald von Gott sien Kjennichrikj. Doatoo haud Jehova am uk oppe Ieed jeschekjt, daut hee de Menschen sull von daut Kjennichrikj lieren. Un doa muak hee uk met wieda, soogoa nodäm aus hee vom Doot oppjestonen wia.

Weetst du noch, waut Gott sien Kjennichrikj es? Daut es de Rejierunk em Himmel, waut Gott oppjestalt haft. Un Gott haft Jesus toom Kjennich jewält. Jesus haft aul bewäsen, waut fa een feina Kjennich hee sennen woat. Hee jeef de Hungaje to äten, heeld de Kranke un wuak soogoa Menschen vom Doot opp!

Woo woat daut hia oppe Ieed sennen, wan Jesus ieescht fa dusent Joa em Himmel aus Kjennich rejieren woat? De gaunze Ieed woat een wundascheenet Paradies woaren. Daut woat dan kjeene Kjriej uk kjeene beese Menschen mea jäwen. Doa woat uk kjeena mea krank woaren uk nich mol stoawen brucken. Daut weet wie, wiels Gott muak de Ieed doaropp, daut dee sull een Paradies sennen, wua de Menschen daut kunn scheen gonen. Doawäajen jroz muak hee aum Aunfank dän Goaden Eden. Un Jesus woat doano seenen, daut aules soo utkjemt, aus Gott daut haben well.

Oba ieescht must Jesus trigj nom Himmel foaren. 40 Doag lank haud hee sikj emma wada von siene Jinja seenen loten. Doawäajen wieren see sikj secha, daut hee wada läwd. Oba ea hee veleet, säd hee noch to siene Jinja: ‘Blieft en Jerusalem, bat jie dän heiljen Jeist kjrieen.’ Gott sien heilja Jeist es eene Krauft, dee waut bewirkjen kaun, biejlikj soo aus de Wint. De heilja Jeist wudd Jesus siene Nofolja halpen, Gott sienen Wellen to doonen. Tolatst säd Jesus noch: ‘Vetalt de Menschen äwaraul oppe Ieed von mie.’

Aus Jesus daut ieescht jesajcht haud, passieed waut wundaboaret. Hee hoof opp un fua trigj nom Himmel, soo aus du hia seenen kaust. Dan bedakjt am eene Wolkj un de Jinja kunnen am nich mea seenen. Trigj em Himmel funk Jesus aun, äwa siene Nofolja oppe Ieed to rejieren.

1. Korinta 15:3-8; Openboarunk 21:3-4; Aposteljeschicht 1:1-11