Trigj nom Enhault

No de Enhaultslist gonen

 JESCHICHT #59

David mott sikj fuatbrinjen

David mott sikj fuatbrinjen

NODÄM aus David Goliat dootjemoakt haud, brocht Abner, de Väaschta von daut Kjrichshäa, am no Saul. Saul freid sikj sea äwa David. Hee muak am to eenen Väaschten en sien Kjrichshäa un leet am em Kjennichshus wonen.

Lota, aus daut Kjrichshäa eemol von eenen Kaumf jäajen de Filista trigjkjeem, sungen de Frues: ‘Saul haft dusende dootjemoakt, David oba haft tieendusende dootjemoakt.’ Aus Saul dit hieed, wort hee aufjenstich äwa David, wiels David mea jeieet wort aus hee. Oba Saul sien Sän Jonatan wia nich aufjenstich äwa David. Hee räakjend David sea väl un David räakjend dän uk väl. See vespruaken sikj beid, fa emma Frind to bliewen.

David kunn sea fein met de Hoap spälen un Saul jleicht daut sea, wan hee spälen deed. Oba eenen Dach deed Saul ut Aufgonst waut sea schlajchtet. Aus David jroz de Hoap späld, neem Saul sienen Spies un schmeet dän opptoo no David un säd: ‘Ekj woa David aune Waunt spekjen!’ Oba David sprunk tosied un de Spies troff am nich. Lota vesocht Saul daut noch eemol. David wist nu, hee must sea väasechtich sennen.

Weetst du noch, waut Saul dänjanjen vesproaken haud, dee Goliat dootmuak? Hee haud jesajcht, hee wudd dänjanjen siene Dochta to Fru jäwen. Nu säd hee oba, David must ieescht 100 Filista dootmoaken, daut dee sikj kunn met siene Dochta Michal befrieen. Stal die daut mol väa! En Werkjlichkjeit hopt Saul oba, de Filista wudden David dootmoaken. Oba daut wort nich, un soo jeef Saul David siene Dochta to Fru.

Eenen Dach säd Saul to Jonatan un to aul siene Deena, hee wull David ombrinjen. Oba Jonatan säd to sienen Voda: ‘Doo David nuscht aun! Dee haft je die uk noch kjeenmol waut jedonen. Dee haft die emma bloos jeholpen. Aus dee Goliat dootschluach, haud dee leicht kunt stoawen. Un du wieescht froo, daut dee soo äwanäment wia.’

Saul horcht no sienen Jung un vespruak, hee wudd David nuscht aundoonen. Un soo kjeem David trigj un deend Saul em Kjennichshus soo aus ea. Oba eenen Dach, aus David met de Hoap späld, schmeet Saul sienen Spies wada no David. David hupst wada tosied un de Spies fua aune Waunt naun. Dit wia aul daut dredde Mol, waut Saul dit deed! Nu wist David, hee must sikj fuatbrinjen.

Dän Zeowes jinkj David no sien ieejnet Hus. Oba Saul schekjt waut Mana, waut David sullen dootmoaken. Michal wist, waut äa Voda em Senn haud, un säd to David: ‘Wan du nich dise Nacht velatst, woascht du morjen doot sennen!’ Michal holp David, noch dee Nacht derchem Fensta wajchtokomen. Ojjefäa säwen Joa must David sikj opp veschiedne Städen vestäakjen, daut Saul am nich funk.