Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #29

Moses mott wajchranen

Moses mott wajchranen

KJIKJ mol, Moses rant von Ägipten wajch! Kaust du de Mana seenen, waut am hinjaraun sent? Dee wellen Moses dootmoaken. Weetst du, wuarom? Well wie mol seenen.

Moses wia en dän Farao sien Hus groot jeworden, dee de Harscha von Ägipten wia. Moses wia een sea kluaka un aunjeseena Maun jeworden. Hee wist oba, daut hee nich een Ägipta wia un daut siene rajchte Elren israelitische Sklowen wieren.

Eenen Dach, aus Moses aul 40 Joa oolt wia, wull hee mol seenen, woo de Israeliten daut jinkj. Daut wia schrakjlich, soo aus dee behaundelt worden. Hee sach, woo een Ägipta eenen israelitischen Sklow vekjield. Moses kjikjt sikj rom, aus am kjeena sach, un schluach dän Ägipta doot. Dan veschoawd hee dän em Saunt.

Näakjsten Dach jinkj Moses wada no de Israeliten. Hee docht, veleicht kunn hee an halpen, daut see nich mea musten Sklowen sennen. Oba dan sach hee, woo twee Israeliten sikj feiten deeden. Moses säd to dän, waut em orrajchten wia: ‘Wuarom deist du dienen Brooda vekjielen?’

De Maun auntwuad: ‘Wäa haft die toom Harscha un Rechta äwa ons jemoakt? West du mie uk dootmoaken, soo aus du dän Ägipta deetst?’

Nu wort Moses angst. Hee wist nu, de Menschen wieren daut enjeworden, waut hee met dän Ägipta jedonen haud. Soogoa de Farao haud daut to hieren jekjräajen. Dee schekjt Mana, waut Moses sullen dootmoaken. Doawäajen must Moses bosich Ägipten veloten.

Moses rand wiet wajch, bat daut Launt Midian. Dort lieed hee Jitro siene Famielje kjanen un befried sikj dan met eent von dän siene Dajchta. Äa Nomen wia Zippora. Moses wort een Schophoad un kjemmad sikj om Jitro siene Schop. Hee läwd doa 40 Joa lank en Midian. Eenen Dach, aus hee aul 80 Joa oolt wia un jroz Jitro siene Schop heeden deed, passieed doa waut wundaboaret. Daut veendad Moses sien gaunzet Läwen. Oppe näakjste Sied kaust du seenen, waut daut wia.

2. Mose 2:11-25; Aposteljeschicht 7:22-29