Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

Enleidunk

Enleidunk

DE JESCHICHTEN en dit Buak sent woare Jeschichten. Dee sent ut daut baste Buak jenomen, waut daut jeft, ut de Bibel. De Jeschichten vetalen, woo daut von don, aus Gott aules jemoakt haft, bat nu jewast es. Du woascht soogoa lieren, waut Gott noch mol doonen woat.

Met dit Buak woascht du die välet, waut enne Bibel bennen es, bäta väastalen kjennen. Daut vetalt von de Menschen, wua de Bibel von schrift, un waut dee deeden. Daut schrift uk von daut scheene Paradies, waut Gott hia oppe Ieed brinjen woat, wua wie woaren kjennen fa emma läwen.

Dit Buak haft 116 Jeschichten. Dee sent en acht Poat jedeelt. Aum Aunfank von jieda Poat woat emma kort jesajcht, om waut daut en de näakjste Jeschichten jeit. De Jeschichten sent nom Riem, soo aus dee passieet sent. Soo kaun eena bäta vestonen, waut ea un waut lota passieet es.

De Jeschichten sent soo jeschräwen, daut dee leicht to vestonen sent. Väle Schoolkjinja kjennen dee aul selfst läsen. Un de kjlandre Kjinja jeit daut sea scheen, wan de Elren an de Jeschichten emma un emma wada väaläsen. En dit Buak es väl bennen, waut fa kjliene uk fa groote Menschen intressaunt es.

Opp Enj von jieda Jeschicht sent Bibelstalen aunjejäft. Läs die dee doch mol enne Bibel no, wiels von doa sent de Jeschichten rutjenomen. Hinja de Jeschicht #116 sent uk Froagen to finjen. Wan du ieescht eene Jeschicht jeläst hast, proow de Froagen to dee Jeschicht to beauntwuaten.