Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #55

Een kjliena Jung deent Gott

Een kjliena Jung deent Gott

ES DAUT nich een schmocka kjliena Jung? Daut es Samuel. De Maun, waut siene Haunt opp Samuel sienen Kopp lajcht, es de Huaga Priesta von Israel. Dee heet Eli. Samuel woat jroz von siene Pape Elkana un siene Mame Hana no Eli jebrocht.

Samuel es noch mau ojjefäa vea ooda fief Joa oolt. Hee woat hia toop met Eli un de aundre Priestasch bie daut Aunbädungszelt wonen. Oba wuarom brinjen Elkana un Hana äaren Samuel hia han? Es dee nich noch väl too kjlien toom en daut Aunbädungszelt deenen? Well wie mol seenen.

Noch mau een poa Joa trigj wia Hana sea truarich jewast, wiels see kunn kjeen Bäbe haben, uk wan see sikj sea eent wenscht. Aus see eenen Dach bie daut Aunbädungszelt wia, deed see to Jehova bäden un säd: ‘Oo Jehova, doo mie nich vejäten! Wan du mie eenen Sän jefst, vespräakj ekj die, ekj woa die dän jäwen, daut dee die emma deenen woat.’

Jehova horcht no Hana äa Jebäd, un eenje Moonaten lota haud see Samuel. Hana räakjend äaren kjlienen Jung sea väl un vetald am von kjlien aun väl von Jehova. See säd to äaren Maun: ‘Sooboolt Samuel groot jenuach es un ekj am nich mea besorjen mott, woa ekj am no daut Aunbädungszelt brinjen, daut hee Jehova dort deent.’

Daut deeden Hana un Elkana dan uk, soo aus du hia oppem Bilt seenen kaust. Samuel freid sikj, daut hee Jehova hia en daut Aunbädungszelt deenen kunn, wiels siene Elren hauden am väl goodet von Jehova vetald. Jieda Joa kjeemen Hana un Elkana no daut Aunbädungszelt toom Jehova aunbäden un äaren kjlienen Jung besieekjen. Un jiedatsmol brocht Hana waut nieet met toom auntrakjen, waut see fa Samuel jemoakt haud.

De Joaren vejinjen un Samuel deed Jehova tru en daut Aunbädungszelt deenen. Jehova uk daut Volkj jleichten am sea. Dän Huagen Priesta Eli siene twee Junges Ofni un Pinhas oba wieren kjeene goode Mana. Dee deeden väl schlajchtet un weesen uk aundre aun, Jehova nich to jehorchen. Eli haud dee nich mea sult aus Priestasch deenen loten, oba hee leet dee bloos toch.

Uk wan en daut Aunbädungszelt väl schlajchtet jedräwen wort, hieed Samuel doawäajen nich opp met Jehova deenen. Daut jeef aul mau eenselne Menschen, waut Jehova werkjlich leewen deeden, un doawäajen haud Jehova aul lang nich mea to wäm jerät. Oba weetst du, waut passieed, aus Samuel ieescht een bät ella wia?

Samuel wia em Aunbädungszelt un schleep, aus am met eemol eene Stemm roopt. Samuel säd: ‘Hia sie ekj.’ Hee stunt opp un rand no Eli un säd: ‘Du hast mie jeroopt un hia sie ekj.’

Oba Eli auntwuad: ‘Ekj hab die goanich jeroopt. Go wada em Bad nenn.’ Un Samuel jinkj wada trigj no sien Bad.

Dan hieed hee de Stemm toom tweede Mol sajen: ‘Samuel!’ Un Samuel stunt opp un rand wada no Eli un säd: ‘Hia sie ekj, du roopst mie doch.’ Eli oba auntwuad: ‘Ekj hab die nich jeroopt, mien Jung. Go laj die wada dol.’ Soo jinkj Samuel wada trigj un läd sikj dol.

De Stemm roopt toom dredde Mol: ‘Samuel!’ Hee rand wada no Eli un säd: ‘Hia sie ekj. Ditmol motst du mie jeroopt haben!’ Eli wist nu, daut must Jehova sennen, dee Samuel roopen deed. Un soo säd hee to Samuel: ‘Go laj die wada dol. Un wan de Stemm die noch eemol roopt, saust du sajen: “Räd, Jehova. Dien Deena horcht too.”’

Daut säd Samuel dan, aus Jehova am noch eemol roopen deed. Jehova säd dan to Samuel, hee wudd Eli un siene Junges bestrofen. Lota storwen Ofni un Pinhas en eenen Kaumf jäajen de Filista. Aus Eli hieed, waut doa jeworden wia, stelpt hee äwarigj un bruak sikj daut Jenekj un storf uk. Soo kjeem daut krakjt soo, aus Jehova to Samuel jesajcht haud.

Aus Samuel ieescht groot wia, wort hee de latsta Rechta en Israel. Lota, aus hee oolt jeworden wia, säd daut Volkj to am: ‘Wäl eenen Kjennich, dee äwa ons rejieren saul.’ Samuel wull daut nich, wiels en Werkjlichkjeit wia Jehova äa Kjennich. Oba Jehova säd to am, hee sull no daut Volkj horchen.

1. Samuel 1:1-28; 2:11-36; 3:1-18; 4:16-18; 8:4-9

Noch mea doaräwa

WELL WIE BIBELSTUND HABEN

Samuel deed daut, waut rajcht wia

Woo kjenn wie uk soo sennen aus Samuel un daut rajchte doonen, uk wan aundre schlajchtet doonen?