MET de Tiet jeef daut emma mea Menschen oppe Ieed un de mieeschte wieren schlajcht, soo aus Kain. Een Maun oba wia aundasch. Dis Maun heet Henoch. Henoch wia een forchtloosa Maun. Wan aul de aundre Menschen uk väl schlajchtet deeden, Henoch hieed nich opp met Gott deenen.

Weetst du, wuarom de Menschen to dee Tiet soo schlajcht wieren? Denkj mol no: Wuarom wieren Adam un Eva Gott ojjehuarsom un eeten von de Frucht, waut an aufjesajcht wia? Een beesa Enjel haud an doatoo veleit. Enne Bibel woat dee ‘Soton’ jenant. Un dee well aule Menschen toom schlajchten veleiden.

Eenen Dach schekjt Jehova Henoch de Menschen waut sajen, waut dee nich hieren wullen. Hee sull sajen: ‘Gott woat eenen Dach aule beese Menschen venichten.’ Dit muak de Menschen secha sea doll. Woomäajlich wullen dee Henoch soogoa dootmoaken. Henoch brukt väl Moot un Krauft, daut hee de Menschen sajen kunn, waut Gott doonen wudd.

Gott leet Henoch nich fa sea lang mank de beese Menschen läwen. Henoch wort mau 365 Joa oolt. Wuarom saj wie ‘mau’ 365 Joa? Wiels to dee Tiet wieren de Menschen noch väl kjraftja aus nu un läwden väl lenja. Henoch sien Sän Metuschelach wort soogoa 969 Joa oolt!

Nodäm aus Henoch jestorwen wia, worden de Menschen noch emma schlajchta. De Bibel sajcht, dee hauden aulentiet bloos beese Jedanken un de Ieed wia voll von grausome Menschen.

Weetst du, wuarom daut to dee Tiet soo väl Trubbel oppe Ieed jeef? Wiels Soton haud sikj waut nieet utjedocht, woo hee de Menschen kunn toom schlajchten veleiden. En de näakjste Jeschicht woa wie mea doavon lieren.