Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #90

De Fru biem Borm

De Fru biem Borm

JESUS hilt en Samaria bie eenen Borm aun toom een bät vereiwen. Siene Jinja wieren en de Staut nenjegonen Äten kjeepen. De Fru, wua Jesus met rät, wia hia no dän Borm jekomen Wota holen. Jesus fruach dee: ‘Kaun ekj een bät Wota toom drinkjen?’

Dit wundad de Fru sea. Weetst du, wuarom? Wiels Jesus wia een Jud un see wia oba eene Samaritafru. De mieeschte Juden jleichten de Samarita nich. Dee wullen nich mol met dee räden. Oba Jesus jleicht aule Sorten Menschen. Un soo säd hee to de Fru: ‘Wan du wist, wäa ekj wia, wurscht du mie no Wota froagen, waut Läwen jeft.’

De Fru säd: ‘Har, de Borm es deep un du hast nich mol eenen Ama. Wua west du daut Wota häanämen, waut Läwen jeft?’

Jesus säd: ‘Wan du daut Wota ut disen Borm drinkjst, darscht die emma wada. Oba daut Wota, waut ekj hab, kaun Menschen eewjet Läwen jäwen.’

‘Har, jeff mie dit Wota!’, säd de Fru. ‘Dan woat mie kjeenmol mea darschten. Un dan woa ekj nich mea brucken hiahan komen Wota holen.’

De Fru docht, Jesus räd von jeweeneljet Wota. Oba hee räd von de Woarheit äwa Gott un dän sien Kjennichrikj. Dise Woarheit es soo aus Wota, waut Läwen jeft. Dee kaun eenem soogoa daut eewje Läwen jäwen.

Jesus säd dan to de Fru: ‘Go saj dienen Maun un komm wada trigj hiahan.’

‘Ekj hab kjeenen Maun’, säd see.

‘Daut stemt’, säd Jesus. ‘Oba du hast fief Mana jehaut, un met dän Maun, met dän du nu toopläfst, best du nich befriet.’

De Fru wia sea vewundat, wiels daut soo wia, waut Jesus säd. Woo wist Jesus daut? Daut wia, wiels Jesus dee wia, dän Gott jeschekjt haud, un Gott leet am daut weeten. Äwadäm kjeemen Jesus siene Jinja trigj un wundaden sikj, daut Jesus met eene Samaritafru räden deed.

Waut kjenn wie von aul dit lieren? Wie haben jeseenen, daut Jesus to Menschen von aule Velkja leeftolich wia. Soo sell wie uk sennen. Wie sellen kjeenmol denkjen, daut eenje Menschen schlajcht sent, bloos wiels dee von een aundret Volkj sent. Jesus wull haben, aule Menschen sullen de Woarheit kjanen lieren, waut to daut eewje Läwen fieet. Wie wellen de Menschen jieren von dise Woarheit vetalen.

Johanes 4:5-43; 17:3