Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #112

Eene ojjlekjelje Scheppreis

Eene ojjlekjelje Scheppreis

KJIKJ mol daut Schepp! Daut brakjt en Bieta! Kaust du de Menschen seenen, waut doa em Wota nenjesprungen sent? Eenje sent aul bat aune Kaunt. Kaust du uk Paulus doa seenen? Waut wia doa jeworden?

Paulus wia je fa twee Joa en Cäsarea em Jefenkjnis jewast. Dan brochten dee am met eenje aundre Jefangne toop opp een Schepp un schekjten an no Room. Dicht bie de Insel Kreet kjeem een groota Storm opp. Dee wia soo stoakj, daut de Mana daut Schepp nich mea stieren kunnen. Äwa Dach wia de Sonn nich to seenen un de Nacht uk nich de Stierns. Soo jinkj daut väle Doag un see dochten aul, see wudden nich derchkomen.

Dan stunt Paulus opp un säd: ‘Kjeena von junt woat omkomen. Bloos daut Schepp woat enne Grunt gonen. Dise Nacht kjeem een Enjel no mie un säd: “Hab kjeene Angst, Paulus! Du woascht ver dän reemischen Kjeisa komen. Un Gott woat aule raden, waut met die toop reisen.”’

De Storm haud aul 14 Doag aunjehoolen. Met eemol, medden enne Nacht, worden de Scheppmana en, daut daut Wota flaka wort. See leeten de Ankasch rauf, wiels see hauden Angst, daut Schepp kunn em diestren jäajen Steena pralen un tweibräakjen. Aus daut ieescht dach wort, kunnen see daut Launt seenen. See worden sikj eenich, see wullen vesieekjen, daut Schepp oppem Launt nopptostieren.

Oba aus see noch een Enjskje auf wieren vonne Kaunt, schlapt daut Schepp opp eenen Saunthumpel opp un saut sikj doa faust. De Walen schluagen jäajen daut Schepp un daut funk aun tweitobräakjen. De Hauptmaun säd dan: ‘Aul dee, waut schwamen kjennen, sellen daut ieeschte em Wota nensprinjen un no de Kaunt schwamen. De aundre sellen doahinja em Wota nensprinjen un sikj aun Bieta vom Schepp fausthoolen.’ Dee deeden daut dan, un soo worden aule 276 Menschen jerat, waut opp daut Schepp wieren, krakjt soo aus de Enjel daut jesajcht haud.

See wieren opp eene Insel, dee heet Malta. De Menschen doa wieren sea leeftolich un neemen an sea opp. Aus daut Wada ieescht bäta wort, wort Paulus met een aundret Schepp no Room jebrocht.

Aposteljeschicht 27:1-44; 28:1-14