KAUST du Jesus hia seenen? Hee es hia opp eenen Boajch en Galiläa un deit de Menschen lieren. Dee, waut doa dicht bie am setten, sent siene twalf Apostel, waut hee sikj von mank siene Jinja utjewält haft. De Apostel wieren Jesus siene besondre Jinja. Weetst du, woo see aula heeten deeden?

Daut wieren Simon Petrus un dän sien Brooda Andreas. Dan Jakobus un Johanes, waut uk Breeda wieren. Doa wieren uk noch twee aundre Apostel, waut uk Jakobus un Simon heeten. Daut jeef uk twee Apostel, waut Judas heeten; eena wia Judas Iskariot un de aundra wort Tadäus jenant. Un dan wieren doa noch Filippus, Natanael (dee wort uk Bartolomäus jenant), Matäus un Tomas.

Aus Jesus von Samaria trigj wia, deed hee daut ieeschte Mol von daut Kjennichrikj prädjen. Hee säd: ‘Daut Kjennichrikj vom Himmel es dicht bie.’ Weetst du, waut dit Kjennichrikj es? Daut es eene Rejierunk, waut Gott oppjestalt haft. En dise Rejierunk es Jesus de Kjennich. Hee woat von utem Himmel rejieren un oppe Ieed Fräd brinjen. Gott sien Kjennichrikj woat de gaunze Ieed to een wundascheenet Paradies moaken.

Opp dit Bilt lieet Jesus de Menschen von Gott sien Kjennichrikj. ‘Soo sell jie bäden’, säd Jesus. ‘Ons Voda em Himmel! Dien Nomen saul jeieet woaren. Lot dien Kjennichrikj komen. Lot em Himmel un oppe Ieed aules soo jedonen woaren, aus du daut haben west.’ Väle nanen dit Jebäd daut ‘Unser Vater’, ooda ‘Ons Voda’. Kaust du daut gaunz äwasajen?

Jesus lieed de Menschen uk, woo see sullen eena toom aundren sennen. Hee säd: ‘Soo, aus jie wellen, daut de Menschen to junt sent, soo sell jie to dee sennen.’ Jleichst du daut nich uk, wan aundre to die fein sent? Doawäajen säd Jesus, wie sullen to aundre fein sennen. Woat daut nich scheen sennen em Paradies, wan aule Menschen oppe Ieed daut doonen woaren?