Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #69

Eene Mejal halpt eenen beaumten Maun

Eene Mejal halpt eenen beaumten Maun

WEETST du, waut dise kjliene Mejal jroz sajcht? Dee vetalt dise Fru hia von Jehova sienen Profeet Elisa un von de väle goode Dinja, waut Elisa met Jehova siene Help deit. De Fru kjant Jehova goanich, wiels daut es nich eene Israelitin. Oba wuarom es de Mejal dan äwahaupt hia bie dise Fru?

De Fru es von Sierien. Dee äa Maun heet Naaman un wia de Väaschta von daut sierische Kjrichshäa. De Siera hauden dise kjliene Mejal von Israel jefangen jenomen un ar no Naaman siene Fru jebrocht, daut see dee deenen sull.

Naaman haud de schlemme Lepra-Krankheit. Bie dise Krankheit kjennen soogoa Jläda vom Kjarpa auffaulen. Soo säd de Mejal to Naaman siene Fru: ‘Ekj wenscht, mien Har kunn no Israel no Jehova sienen Profeet gonen! Dee wudd dän von siene Lepra-Krankheit heelen.’ Lota wort Naaman daut vetalt.

Naaman wull sea jieren jesunt woaren, un soo wort hee sikj eenich un reisd no Israel. Doa jinkj hee dan no Elisa sien Hus. Elisa schekjt sienen Deena rut un leet Naaman sajen, hee sull sikj gonen säwen Mol em Jordan Riefa wauschen. Naaman oajad sikj sea un säd: ‘De Riefasch bie ons sent doch väl bäta aus irjent een Riefa hia en Israel!’ Un doamet veleet Naaman.

Oba siene Deena säden to am: ‘Har, wan Elisa waut grootet von die velangt haud, wurscht du daut doch jedonen haben. Wuarom kaust du dan nich krakjt soo goot gonen un wauschen die en dän Riefa, soo aus dee jesajcht haft?’ Naaman horcht no siene Deena un jinkj nom Jordan un dukt sikj säwen Mol unja. Aus hee daut jedonen haud, wort sien Fleesch un siene Hut wada gaunz jesunt!

Naaman wia sea schaftich. Hee jinkj trigj no Elisa un säd: ‘Nu weet ekj, daut de Gott von Israel de eensich woara Gott es äwa de gaunze Ieed. Ekj hab hia een Jeschenkj fa die. Nemm daut toom Jefaulen aun.’ Oba Elisa säd: ‘Nä, ekj well daut goanich.’ Fa Elisa wia daut nich rajcht, daut Jeschenkj to nämen, wiels daut wia Jehova, dee Naaman jeheelt haud. Oba Elisa sienen Deena Gehasi, dän jankad daut Jeschenkj sea.

Hee docht sikj waut ut, woo hee daut Jeschenkj kunn kjrieen. Aus Naaman ieescht wajch wia, rand Gehasi dän hinjaraun un säd: ‘Elisa schekjt mie sajen, hee wull nu doch jieren waut von diene Jeschenkja. Hee well dee fa Frind, waut jroz to Jast jekomen sent.’ Oba daut wia bloos väajeloagen. Doch Naaman wist daut nich un jeef Gehasi waut von de Jeschenkja.

Aus Gehasi trigjkjeem, wist Elisa aul, waut dee jedonen haud. Jehova haud am daut jesajcht. Elisa säd to Gehasi: ‘Wiels du soo waut schlajchtet jedonen hast, woascht du de Lepra-Krankheit kjrieen, waut Naaman haud.’ Un soo wort daut uk fuaz.

Waut kjenn wie von aul dit lieren? Ieeschtens, daut wie emma sellen von Jehova vetalen, soo aus de kjliene Mejal deed. Daut kaun väl goodet brinjen. Tweedens, daut wie nich sellen stolt sennen, soo aus Naaman ieeschtlich wia. Wie sellen Jehova siene Deena emma jehorchen. Un dreddens sell wie nich lieejen, soo aus Gehasi deed. Kjenn wie nich werkjlich väl lieren, wan wie enne Bibel läsen?

2. Kjennichs 5:1-27