Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #77

See bekjen sikj nich

See bekjen sikj nich

KAUST du die noch von dise dree junge Mana besennen? Daut sent Daniel siene dree Frind, waut daut Äten nich neemen, waut an wudd toom Schoden jewast sennen. De Babielonia nanden an Schadrach, Meschach un Abed-Nego. Wuarom bekjen dee sikj nich ver daut groote Stauntbilt, soo aus aul de aundre doonen? Well wie mol seenen.

Kaun die daut noch denkjen von de Tieen Jebooten? Daut wieren de Jesazen, waut Jehova selfst oppjeschräwen haud. Daut ieeschte Jeboot säd: ‘Jie sellen kjeene Jetta aunbäden buta mie.’ Dise junge Mana hia jehorchen dit Jeboot, uk wan dee daut nich leicht felt.

Nebukadnezar, de Kjennich von Babielon, haud väle huachbeaumte Menschen toopjekroacht. Dee sullen dit Stauntbilt aunbäden, waut hee haud loten oppstalen. Hee haud jroz to aulemaun jesajcht: ‘Wan jie de Trompeeten, de Hoapen un de aundre Instrumenten spälen hieren, sell jie junt aula ver dit goldne Stauntbilt bekjen un daut aunbäden. Wäa daut nich deit, woat fuaz en eenen jlieejendich heeten Fiaowen nenjeschmäten.’

Aus Nebukadnezar enwort, daut Schadrach, Meschach un Abed-Nego sikj nich hauden ver daut Stauntbilt jebekjt, wort hee sea doll. Hee leet an fuaz holen un jeef an noch eene Jeläajenheit. Oba de junge Mana veleeten sikj gaunz opp Jehova un säden to Nebukadnezar: ‘Ons Gott, dän wie deenen, kaun ons raden. Oba uk wan hee ons nich raden woat, woa wie ons nich ver dien goldnet Stauntbilt bekjen.’

Doaropp must Nebukadnezar sikj noch dolla oajren. Hee wees no dän Fiaowen, waut doa dicht bie stunt, un befool: ‘Moakt dän Owen noch säwen Mol heeta aus jeweenlich!’ Dan roopt hee siene stoakjste Soldoten un leet Schadrach, Meschach un Abed-Nego binjen un an en dän Fiaowen nenschmieten. De Owen wia soo heet, daut de Soldoten von de Fiaflaumen storwen. Un waut wort met de dree junge Mana, waut doa en dän Owen nenjeschmäten worden?

Aus de Kjennich en dän Owen nenkjikjt, veschrock hee sikj sea. ‘Hab wie nich dree Mana jebungen un doa en dän Fiaowen nenjeschmäten?’, fruach hee.

‘Jo, daut hab wie’, säden siene Deena.

‘Oba ekj see doa vea Mana, waut sikj doa em Fia romgonen’, säd de Kjennich. ‘Dee sent nich jebungen un dee deit daut Fia nuscht! Un dän vieeden Maun lat soo aus eenen Gott!’ De Kjennich jinkj noda no de Däa von dän Owen un roopt: ‘Schadrach! Meschach! Abed-Nego! Komt doa rut, jie Deena von dän aulahechsten Gott!’

Aus see ieescht ut dän Owen buten wieren, kunn jieda eena seenen, daut an nuscht jeworden wia. Dan säd de Kjennich: ‘Schadrach, Meschach un Abed-Nego äa Gott saul jeloft woaren! Dee haft sienen Enjel jeschekjt un haft an jerat, wiels see doonen sikj ver kjeenen Gott bekjen un dän aunbäden, buta äaren ieejnen.’

Sell wie Jehova nich uk soo tru sennen, aus see wieren?

2. Mose 20:3; Daniel 3:1-30