Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #40

Moses schleit dän Steen

Moses schleit dän Steen

DE JOAREN vejinjen — ieescht 10 Joa, dan 20 Joa, dan 30 Joa un schlieslich 39 Joa, un de Israeliten wieren noch emma enne Wiltnis. Oba aul de Joaren äwa haud Jehova fa an jesorcht. Hee jeef an daut Mauna to äten. Hee wees an dän Wajch, äwa Dach met eene Wolkj un de Nacht met eene Fiaflaum. Un en aul dise Joaren worden äare Kjleeda nich vebrukt un äare Feet worden uk nich schlemm.

Daut wia nu de ieeschte Moonat en daut vieetichste Joa von don, aus de Israeliten Ägipten veloten hauden. Nu wieren see wada bie dän Uat Kadesch aunjekomen. Krakjt hia wieren see uk dicht bie 40 Joa trigj jewast, aus see de twalf Spionen utjeschekjt hauden toom daut Launt Kanaan utforschen. Hia en Kadesch storf Moses siene Sesta Mirjam. Un krakjt soo aus don jeef daut hia uk wada Trubbel.

Daut Volkj funk hia kjeen Wota. See bekloagden sikj to Moses un säden: ‘Daut wudd sennen bäta jewast, wan wie jestorwen wieren! Wuarom hast du ons ut Ägipten rutjebrocht, hia en dise schrakjelje Wiltnis nenn, wua nuscht waust? Hia jeft daut kjeen Jeträajd, kjeene Fiejen, kjeene Wiendruwen uk kjeene Granatapel. Daut jeft hia nich mol Wota toom drinkjen!’

Dan jinjen Moses un Aaron no daut Aunbädungszelt un deeden bäden. Jehova säd to Moses: ‘Vesaumel daut gaunze Volkj. Dan saust du ver an doa to dän Steen räden. Un doa woat jenuach Wota rutkomen fa daut Volkj un äare Tieren.’

Soo vesaumeld Moses daut Volkj un säd: ‘Horcht mol, jie, waut noch emma kjeen Vetruen haben opp Gott! Sellen Aaron un ekj junt ut disen Steen Wota jäwen?’ Dan schluach Moses met sienen Stock twee Mol aun dän Steen naun, un doa kjeem een groota Stroom Wota rut. Nu jeef daut jenuach Wota fa daut gaunze Volkj un de Tieren.

Oba Jehova wia ontofräd äwa Moses un Aaron. Weetst du, wuarom? Daut wia, wiels Moses un Aaron jesajcht hauden, see wudden daut Volkj ut dän Steen Wota jäwen. Oba en Werkjlichkjeit deed Jehova daut. Moses un Aaron hauden nich de Woarheit jesajcht, wäa daut Wunda deed. Jehova bestroft an doafäa un säd: ‘Jie woaren mien Volkj nich en daut Launt Kanaan nenbrinjen.’

Boolt veleeten de Israeliten Kadesch. Een Stootje wieda kjeemen see bat dän Boajch Hor. Doa bowen oppem Boajch storf Aaron. Hee wia 123 Joa oolt. De Israeliten wia daut sea schod un see truaden 30 Doag lank om Aaron. Sien Sän Eleasar wort de näakjsta Huaga Priesta en Israel.

4. Mose 20:1-13, 22-29; 5. Mose 29:4; Nehemia 9:21