Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #65

Daut Kjennichrikj woat jedeelt

Daut Kjennichrikj woat jedeelt

WEETST du, wuarom dis Maun hia sienen Äwarock en Bieta ritt? Jehova haft dän daut befolen. Dis Maun es Gott sien Profeet Ahija. Weetst du, waut een Profeet es? Daut es eena, dän Gott sajcht, waut noch komen woat.

Ahija rät hia met Jerobeam. Salomo haud Jerobeam aus Oppsechta äwa eenje Buoabeiten aunjestalt. Aus Ahija Jerobeam oppem Wajch bejäajend, deed hee waut fonjet. Ahija trock sikj sienen nieen Äwarock ut un vereet dän en twalf Bieta. Dan säd hee to Jerobeam: ‘Nemm die tieen Bieta doavon.’ Weetst du, wuarom Ahija Jerobeam tieen Bieta jeef?

Ahija säd, Jehova wudd Salomo daut Kjennichrikj wajchnämen. Tieen Stam wudd Jehova Jerobeam jäwen. Doano wudden fa Salomo sienen Sän Rehabeam mau bloos noch twee Stam äwabliewen.

Aus Salomo hieed, waut Ahija to Jerobeam jesajcht haud, wort hee sea doll un wull Jerobeam dootmoaken. Oba Jerobeam brocht sikj wajch no Ägipten. Eenje Tiet lota storf Salomo. Hee wia 40 Joa lank Kjennich jewast. No am wort sien Sän Rehabeam Kjennich. Jerobeam hieed en Ägipten doavon, daut Salomo jestorwen wia, un kjeem trigj no Israel.

Rehabeam wia nich een gooda Kjennich. Dee behaundeld daut Volkj noch schlajchta, aus sien Voda Salomo haud. Jerobeam un noch eenje von de väaschte Mana jinjen no Kjennich Rehabeam un säden to dän, hee sull daut Volkj bäta behaundlen. Oba Rehabeam horcht doa nich no un wort soogoa noch strenja. Un soo muak daut Volkj Jerobeam toom Kjennich äwa tieen Stam. Bloos de Stam Benjamin un Juda behilden Rehabeam aus äaren Kjennich.

Jerobeam wull oba nich haben, daut sien Volkj no Jerusalem jinkj un Jehova dort em Tempel aunbäden deed. Soo muak hee twee goldne Kjalwa un deed daut Volkj von de tieen Stam beräden, see sullen dise Kjalwa aunbäden. Boolt jeef daut en daut gaunze Launt väle beese un grausome Menschen.

Oba daut Kjennichrikj met de twee Stam haud uk Trubbel. Rehabeam wia noch kjeene fief Joa Kjennich jewast, aus de Kjennich von Ägipten kjeem jäajen Jerusalem kjamfen. Dee neem väle Schaza von Jehova sienen Tempel met. De Tempel bleef doahäa mau fa eene korte Tiet soo, aus dee aum Aunfank wia.

1. Kjennichs 11:26-43; 12:1-33; 14:21-31