Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #116

Woo wie fa emma läwen kjennen

Woo wie fa emma läwen kjennen

WEETST du, waut de kjliene Mejal hia met äare Frind toop läsen deit? Daut es dautselwje Buak, waut du läsen deist: Mien Buak met Bibeljeschichten. Un dee läsen uk krakjt deeselwje Jeschicht waut du: “Woo wie fa emma läwen kjennen”.

Weetst du, waut dee hia jroz lieren? Dee lieren, daut wie Jehova un sienen Sän Jesus motten kjanen lieren, wan wie fa emma läwen wellen. Enne Bibel sajcht daut: ‘Toom daut eewje Läwen kjrieen, mott eena dän eensjen woaren Gott kjanen lieren, uk dän sienen Sän Jesus Christus, dän hee oppe Ieed jeschekjt haft.’

Woo kjenn wie Jehova Gott un sienen Sän Jesus kjanen lieren? Daut kjenn wie, wan wie Mien Buak met Bibeljeschichten von väaren bat hinjen derchläsen. Dit Buak schrift doch väl von Jehova un von Jesus, jleefst nich uk? Daut lieet ons uk väl doaräwa, waut dee aul aules jedonen haben un waut dee noch doonen woaren. Oba wie motten noch waut doonen aus bloos dit Buak läsen.

Kaust du daut aundre Buak seenen, waut doa licht? Daut es de Bibel. Froag mol wäm, aus hee die kaun de Bibelstalen väaläsen, von wua de Jeschichten en dit Buak rutjenomen sent. Enne Bibel finj wie aules, waut wie weeten motten toom Jehova rajcht deenen un daut eewje Läwen kjrieen. Doawäajen sell wie pinkjlich enne Bibel läsen.

Oba Jehova Gott un Jesus Christus bloos to kjanen rieekjt nich too. Wie wudden kjennen sea väl von Jehova un Jesus weeten un doawäajen oba noch nich daut eewje Läwen kjrieen. Weetst du, waut doa noch needich es?

Wie motten daut uk doonen, waut wie lieren. Kaust du die noch von Judas Iskariot besennen? Daut wia eena von de twalf Mana, waut Jesus to siene Apostel jewält haud. Judas wist väl von Jehova uk von Jesus. Oba waut deed dee? Dee docht met de Tiet bloos noch aun sikj selfst un deed Jesus fa 30 Selwastekja aun siene Fiend veroden. Doawäajen woat Judas nich daut eewje Läwen kjrieen.

Ooda kaun die noch von Gehasi denkjen von de Jeschicht #69? Dee wull waut Kjleeda un Jelt haben, waut oba nich fa am wia. Daut hee de Sachen kjrieech, deed dee lieejen. Oba Jehova bestroft dän doafäa. Un hee woat uk ons bestrofen, wan wie siene Jesazen nich jehorchen.

Daut jeef oba uk väl goode Menschen, waut Jehova emma tru wieren. Wie wellen leewa soo sennen, aus dee wieren, nich soo? Denkj mol aun dän kjlienen Samuel. Soo aus wie en de Jeschicht #55 sagen, wia dee noch mau vea ooda fief Joa oolt, aus dee no daut Aunbädungszelt kjeem toom Jehova deenen. Doawäajen, krakjt endoont woo kjlien du best, du kaust emma Jehova deenen.

Un besonda well wie soo sennen, aus Jesus wia. Soo aus de Jeschicht #87 wiest, wia hee aul aus kjliena Jung em Tempel un vetald aundre von sienen Voda em Himmel. Soo well wie daut uk doonen. Well wie soo väl Menschen aus mäajlich von onsen leeftoljen Gott Jehova un von sienen Sän Jesus Christus vetalen. Wan wie dit aules doonen, woa wie kjennen fa emma en daut Paradies läwen, waut Gott hia oppe Ieed brinjen woat.

Johanes 17:3; Psalm 145:1-21