Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #44

Rahab halpt de Spionen

Rahab halpt de Spionen

DISE Mana hia sent en Jefoa. Dee motten sikj schwind fuatbrinjen, sest woaren dee omjebrocht woaren. Daut sent israelitische Spionen, un de Fru, waut an halpen deit, es Rahab. Rahab wont en een Hus opp de Stautsmia von Jericho. Well wie mol seenen, wuarom dise Mana hia en Jefoa sent.

De Israeliten wullen nu derch dän Jordan Riefa derchgonen en daut Launt Kanaan nenn. Oba verdäm schekjt Josua de twee Spionen ut un säd to dee: ‘Got un beseet junt daut Launt un de Staut Jericho.’

Aus de Spionen no de Staut Jericho kjeemen, jinjen dee no Rahab äa Hus. Oba irjentwäa brocht dän Kjennich von Jericho Tiedinj un säd: ‘Twee israelitische Mana sent hia dise Nacht en de Staut nenjekomen. Dee wellen ons Launt utforschen.’ Soo schekjt de Kjennich een poa Mana no Rahab un leet ar sajen: ‘Brinj de Mana rut, waut doa en dien Hus sent!’ Oba Rahab haud de Spionen opp äa Dak vestoaken un säd: ‘Doa kjeemen waut Mana no mien Hus, oba ekj weet nich, von wua dee wieren. Dee veleeten hia metem diesta woaren, noch ea de Stautsdäa too wia. Wan jie junt spooden, woa jie dee noch nokomen!’ Un soo jinjen de Mana dee hinjaraun joagen.

Aus de Mana ieescht wajch wieren, jinkj Rahab schwind oppem Dak nopp un säd to de Spionen: ‘Ekj weet, daut Jehova junt daut Launt jäwen woat. Wie haben jehieet, woo Jehova daut Roode Mäa utdrieejen leet, aus jie Ägipten veleeten, un woo jie de beid Kjennichs Sihon un Og dootjemoakt haben. Ekj sie to junt fein jewast, un soo sell jie uk to mie fein sennen. Vespräakjt mie toom Jefaulen, daut jie miene Elren un miene Breeda un Sestren veschoonen woaren.’

De Spionen vespruaken Rahab daut, oba Rahab must doatoo waut doonen. ‘Binj disen rooden Baunt aun dien Fensta aun’, säden de Spionen. ‘Un kroag aul dien Frintschoft no die. Wan wie trigjkomen un Jericho ennämen, woa wie disen Baunt aun dien Fensta seenen un woaren en dien Hus kjeenem dootmoaken.’ Aus de Spionen wada trigj bie Josua wieren, vetalden dee dän aules, waut see beläft hauden.

Josua 2:1-24; Hebräa 11:31