Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #85

Jesus woat en eenen Staul jebuaren

Jesus woat en eenen Staul jebuaren

WEETST du, wäa dit kjliene Bäbe hia es? Daut es Jesus. Hee es jroz en eenen Staul jebuaren. Maria lajcht Jesus hia en eene Kjrebb nenn. Daut es een Kausten fa Fooda, wua Kjieej un aundre Tieren ut fräten. Oba wuarom sent Maria un Josef en eenen Staul bie de Tieren? Daut es je doch kjeen Plauz toom een Bäbe haben, ooda?

Nä, daut es nich. Oba daut kjeem soo, wiels de Kjeisa Augustus, de Harscha von Room, befolen haud, de Menschen sullen aula no de Staut wanken, wua see jebuaren wieren. Doa sullen see äaren Nomen loten en een Buak nenschriewen. Josef wia en Betlehem jebuaren, un doawäajen jinjen hee un Maria doa han. Oba aus see en Betlehem aunkjeemen, wia doa kjeene Stow mea frie toom Nacht bliewen. Doawäajen musten see en eenen Staul äwanachten. Krakjt dee Nacht wort Jesus jebuaren! Oba soo aus du hia seenen kaust, jinkj am daut goot.

Kaust du de Hoads seenen, waut Jesus besieekjen komen? Dee wieren oppe Stap äare Schop heeden, aus doa plazlich een kloaret Licht dacht. Daut wia een Enjel! De Hoads enjsten sikj sea. Oba de Enjel säd to an: ‘Enjst junt nich! Ekj brinj junt eene goode Norecht. Vondoag es en Betlehem Christus, de Har, jebuaren. Dee woat de Menschen raden! Jie woaren dän en eene Kjrebb en Loakes enjerolt finjen.’ Met eemol wieren doa väle Enjel un deeden Gott lowen. De Hoads jinjen fuaz Jesus sieekjen, un nu haben see am hia jefungen.

Weetst du, wuarom Jesus soo besonda wia? Weetst du, wäa Jesus werkjlich wia? Kaun die daut noch denkjen, daut wie en de ieeschte Jeschicht waut von Gott sienen ieeschten Sän läsden? Dee schauft met Jehova toop un holp am, dän Himmel, de Ieed un aulet aundre to moaken. Un krakjt dis Sän wia Jesus!

Jehova neem daut Läwen von sienen Sän em Himmel un sad daut en Maria äaren Buck nenn. Dan woss en Maria äaren Buck een Bäbe, krakjt soo aus uk aundre Bäbes em Buck von äare Mame waussen. Schlieslich wort Jesus hia en Betlehem en eenen Staul jebuaren. Nu weet wie, wuarom de Enjel sikj soo freiden, aus see de Hoads vetalen kunnen, daut Jesus jebuaren wia.

Lukas 2:1-20