Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #72

Gott halpt Kjennich Hiskia

Gott halpt Kjennich Hiskia

WEETST du, wuarom dis Maun hia to Jehova bäden deit? Un wuarom dee dise Breew hia ver Jehova sienen Aultoa hanjelajcht haft? Dis Maun es Hiskia. Hee es de Kjennich von daut Siedkjennichrikj met de twee Stam von Israel. Un hee es en eenen grooten Trubbel. Wuarom?

Daut Kjrichshäa von Assierien wia jekomen un haud de tieen Stam von daut Nuadkjennichrikj venicht. Jehova haud daut toojeloten, wiels daut Volkj doa soo schlajcht wia. Un nu wullen de Assiera uk jäajen daut Kjennichrikj met de twee Stam kjamfen.

De Kjennich von Assierien haud Kjennich Hiskia jroz waut Breew jeschekjt. Dit sent de Breew, waut Hiskia hia ver Gott hanjelajcht haft. En dise Breew wort Jehova vespott un doa stunt uk bennen, Hiskia sull sikj hanjäwen. Doawäajen deed Hiskia bäden un säd: ‘Oo Jehova, doo ons doch von dän Kjennich von Assierien raden. Dan woaren aule Velkja seenen, daut du auleen de woara Gott best.’ Weet aus Jehova wudd no Hiskia sien Jebäd horchen?

Hiskia wia een gooda Kjennich. Hee wia nich soo aus de beese Kjennichs von daut Kjennichrikj met de tieen Stam. Hee wia uk nich soo aus sien Voda, de beesa Kjennich Ahas. Hiskia proowd emma, Jehova siene Jesazen to hoolen. Aus Hiskia met sien Jebäd to Enj wia, schekjt de Profeet Jesaja am eene Norecht von Jehova, waut doa säd: ‘De Kjennich von Assierien woat nich en Jerusalem nenkomen. Dän siene Soldoten woaren nich mol bat dicht bie komen. Un dee woaren nich eene eensje Feil en de Staut nenscheeten.’

Besee die mol daut Bilt opp dise Sied. Weetst du, wäa aul dise doodje Soldoten sent? Daut sent de Assiera. Jehova haud eenen Enjel jeschekjt, un dee haud en eene Nacht 185 000 assierische Soldoten dootjemoakt. De Kjennich von Assierien jeef opp un jinkj trigj no Hus.

Soo wort daut Kjennichrikj met de twee Stam jerat un daut Volkj haud fa eene jewesse Tiet Fräd. Oba aus Hiskia storf, wort sien Sän Manasse Kjennich. Manasse wia een sea beesa Kjennich, uk sien Sän Amon, waut no am Kjennich wia. Soo jeef daut en daut Launt boolt wada väle beese un grausome Menschen. Aus Amon von siene ieejne Deena omjebrocht wort, wort dän sien Sän Josia de Kjennich von daut Kjennichrikj met de twee Stam.

2. Kjennichs 18:1-36; 19:1-37; 21:1-25