Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Well wie Bibelstund haben

 JESCHICHT 6

David haud nich Angst

David haud nich Angst

Waut deist du, wan du Angst hast? – Veleicht frajchst du Mame un Pape no Help. Oba daut jeft noch wäm, waut die halpen kaun. Weetst du, wäa daut es? – Daut es Jehova, un hee es de stoakjsta, waut daut jeft. En de Schreft finj wie de Jeschicht von eenen Jung, waut David heet. Dee es sea äwanäment, wiels dee weet, daut Jehova am emma halpen woat.

David siene Elren lieren am von kjlien aun, Jehova to leewen. Doawäajen haft David nich Angst, wan am uk Sachen passieren, wua de mieeschte sikj wudden sea fa grulen. Hee weet, daut Jehova sien Frint es un daut dee am halpen woat. Eemol aus David no de Schop oppaust, kjemt doa een groota Leiw un jript sikj eent. Waut deit David nu? Hee rant dän hinjaraun, pakt dän aum Hauls un kjielt dän doot. Un aus een Boa sikj Schop jriepen well, moakt hee dän uk doot. Waut jleefst du, wäa halpt David doabie? – Daut es Jehova.

Noch opp eene aundre Sauz es to seenen, daut David sea äwanäment es. Daut es, aus de Israeliten jäajen een aundret Volkj kjamfen, de Filista. Eent von dee äare Soldoten es een sea groota. Daut es een Ries, waut Goliat heet. Dee trozt de israelitische Soldoten un uk Jehova. Dee bitt de Soldoten aun, see sellen komen un met am kjamfen. Oba kjeen Israelit woacht sikj daut. Aus David daut hieet, sajcht hee to Goliat: “Ekj woa met die kjamfen! Jehova woat mie halpen, un ekj woa die jewennen.” Denkjst du nich uk, daut David sea äwanäment es? – Jo, hee es. Waut deit David dan?

David nemt sienen Schleida un fief glaute Steena un jeit dän Ries entjäajen. Aus Goliat sitt, woo junk David noch mol es, haft hee sikj domm äwa dän. Oba David sajcht: “Du kjemst met een Schwieet no mie, oba ekj kom en Jehova sienen Nomen no die!” Dan nemt David sikj eenen Steen, deit dän en sienen Schleida nenn un rant opptoo no Goliat. Hee holt met sienen Schleida ut un de Steen  traft Goliat aum Stiern. Dee felt om un es doot. Aus de Filista dit seenen, woat dee soo Angst, daut see aula utkleiwen. Woo kunn de junga David disen Ries jewennen? – Jehova haft dän jeholpen un dee es väl stoakja aus irjent een Ries.

David haud nich Angst, wiels hee wist, Jehova wudd am halpen

Waut kjenn wie von David siene Jeschicht lieren? – Kjeena es soo stoakj aus Jehova. Wan du noch mol Angst hast, dan denkj doaraun, daut Jehova dien Frint es. Dee kaun die halpen, diene Angst to äwakomen.

LÄST TOOP EN DE SCHREFT:

  • Psalm 56:4-5

  • 1. Samuel 17:20-54