Aesea 16:1-14
-
Mesej agensem Moab i gohed (1-14)
16 Yufala i sanem wan man nani long Sela, i go long rula blong kantri ya,Yufala i sanem hem i pastru long draeplesI go kasem bigfala hil blong dota blong Saeon.
2 Ol dota blong Moab bambae oli kam stap long ol ples long Anon Reva we ol man oli stap krosem,+Olsem wan pijin we man i ronemaot long nes blong hem.+
3 “Yufala i givim advaes, mo yufala i folem ol desisen we yufala i mekem.
Long aftenun we san i stap antap yet, i gud yu mekem sado blong yu i kam olsem naet.
Yu haedem olgeta we oli stap wanwan olbaot mo olgeta ya we oli ronwe, yu no letem olgeta oli go.
4 O Moab, i gud ol man blong mi we oli stap wanwan olbaot, oli kam stap long yu.
I gud yu kam olsem wan ples we oli save kam haed long hem, from man ya we i stap spolem olgeta.+
Man ya we i stap mekem i strong tumas long olgeta, bambae laef blong hem i finis,Ol trabol ya bambae i finis,Mo olgeta we oli stap spolem ol narafala bambae oli lus long wol ya.
5 Nao from lav, God bambae i stanemap wan tron* i mekem i stap strong.
Wan man long tent blong Deved we bambae i sidaon long tron ya, bambae i mekem gud wok blong hem,+Bambae hem i jajem ol man long fasin we i stret, mo bambae hem i kwik blong mekem se i gat stret fasin.”+
6 Yumi harem plante taem we Moab i flas, yes hem i praod we i praod,+Tingting blong hem i go antap tumas, hem i flas, mo i stap kros bitim mak,+Be ol flas tok blong hem bambae oli kam olsem nating nomo.
7 Taswe ol man Moab bambae oli krae from Moab,Bambae olgeta evriwan oli krae bigwan.+
Olgeta we trabol i kasem olgeta, bambae oli krae from ol kek blong Kiriareset we oli wokem long drae grep.+
8 Ol garen long saed blong hil long Hesbon,+ oli drae finis,Ol rop blong grep long Sibma,+We ol branj blong hem oli red gud,* ol rula blong ol nesen oli wokbaot antap long olgeta finis.
Ol branj ya oli go longwe kasem Jasere,+Mo oli go kasem draeples.
Ol niufala sut blong hem oli longlongfala i go kasem solwota.
9 From samting ya, bambae mi krae from rop blong grep blong Sibma, olsem we mi krae from Jasere.
O Hesbon mo Eleale,+ bambae wota blong ae blong mi i stap ron bigwan from yutufala,From we bigfala noes we yufala i stap mekem, from ol frut long hot taem mo taem blong yufala blong havest, i finis finis.*
10 I no moa gat noes blong ol man we oli glad mo ol man we oli harem gud, long ples blong ol frut tri,Mo i no moa gat man i stap singsing from glad, mo man i stap singsingaot long ol plantesen blong grep.+
Man blong mekem waen i no moa purumbut long ol grep long ples blong mekem waen,From we mi mi mekem ol man oli no moa singsingaot.+
11 From samting ya, i gat bigfala noes dip insaed long mi from Moab,+Olsem noes blong hap taem man i plei long hem,Mo tingting blong mi i no stap kwaet nating from Kiriareset.+
12 Mo nating se Moab i finisim evri paoa blong hem antap long hae ples mo i go blong prea long tabu ples blong hem, be bambae hem i no kasem wan samting from.+
13 Hemia nao tok we Jehova i talemaot fastaem, blong tokbaot Moab.
14 Mo naoia Jehova i talem se: “Long tri yia nomo, olsem ol yia blong wan man blong wok,* ol gudgudfala samting blong Moab bambae oli sem mo bambae i gat enikaen noes nomo long taem ya, mo olgeta we oli stap yet bambae oli no plante mo oli ol man nating nomo.”+
Ol futnot
^ NT: “jea blong king.”
^ NT: “ol branj blong hem we oli fulap gud long ol grep we oli red.”
^ MNT: “From we noes blong ol man we oli stap krae long faet, i kasem ol frut blong tri long hot taem, mo ol kakae we yufala i tekemaot.”
^ NT: “ol yia we oli kaontem blong wan man blong wok” hemia tri yia stret.
