Si Jesus asin an mga kaibanan niyang nagbabaklay nag-abot sa Jerico, na mga sarong aldaw na babaklayon haling Jerusalem. Masasabi na an Jerico sarong dobleng siyudad kun sain an lumang siyudad mga 1.6 kilometros an rayo sa bagong siyudad na itinugdok kan panahon kan mga Romano. Kan si Jesus asin an mga tawo paluwas sa saro sa mga siyudad na ini asin palaog sa saro, duwang butang parapakilimos an nakadangog kan ribok nin mga tawo. An saro sa sainda may pangaran na Bartimeo.

Kan madangog ni Bartimeo asin kan kaiba niya na nag-aagi si Jesus, nagparakurahaw sinda: “Kagurangnan, Aki ni David, mahirak ka sa samo!” (Mateo 20:30) Sinaway sinda kan mga tawo asin sinabihan na magsilensiyo, pero lalo pa nindang kinusugan an pagkurahaw. Kan madangog iyan ni Jesus, nagpundo siya. Ipinaapod niya sa mga kaibanan niya an nagkukurahaw. Nagduman sinda sa mga parapakilimos asin sinabi sa saro sa sainda: “Kusugi an saimong buot! Tumindog ka; inaapod ka niya.” (Marcos 10:49) Huling naugmang marhay, hinuba kan lalaking buta an saiyang pangluwas na bado, biglang nagtindog, saka nagduman ki Jesus.

“Ano an gusto nindong gibuhon ko para sa saindo?” an hapot ni Jesus. Parehong nakimahirak an duwang buta: “Kagurangnan, buksan mo po an samuyang mga mata.” (Mateo 20:32, 33) Huling nahirak na marhay si Jesus, dinutan niya an mga mata ninda, asin sinabi niya partikularmente sa saro sa sainda: “Lakaw na. Pinarahay ka kan saimong pagtubod.” (Marcos 10:52) Nakabalik an paghiling kan duwang butang parapakilimos, asin daing duda na pareho sindang nagpuon na magpamuraway sa Diyos. Kan mahiling kan mga tawo an nangyari, nagpamuraway man sinda sa Diyos. An mga lalaking dating buta nagsunod na ngunyan ki Jesus.

Dakulon na tawo an nakapalibot ki Jesus kan nag-aagi siya sa Jerico. An gabos gustong mahiling an saro na nagpaumay sa mga buta. Nagsusurusuan ki Jesus an mga tawong nakapalibot sa saiya; huli kaini, dai na ngani siya nahihiling kan iba. An saro sa mga ini iyo si Zaqueo. Siya an pamayo kan mga parasingil nin buhis sa laog asin sa palibot kan Jerico. Huling hababa siya, dai niya nahihiling an nangyayari. Kaya nagdalagan siya sa inutan asin nagsakat sa sarong puon nin sikomoro sa aagihan ni Jesus. Duman sa itaas, mas nahihiling ni Zaqueo an gabos na nangyayari. Kan paparani na si Jesus asin nahiling si Zaqueo na nasa itaas kan kahoy, sinabi niya: “Zaqueo, dali magbaba ka, ta kaipuhan kong magdagos ngunyan sa harong mo.” (Lucas 19:5) Buminaba si Zaqueo asin dali-daling nagpuli sa harong para estimaron an espesyal niyang bisita.

Kan mahiling iyan kan mga tawo, naggurumod-gumod sinda. Para sa sainda, bakong tama na magin bisita si Jesus nin sarong lalaki na ibinibilang nindang parakasala. Nagin mayaman si Zaqueo huli sa pangingikil sa pangongolekta niya nin mga buhis.

Kan palaog na si Jesus sa harong ni Zaqueo, naggurumod-gumod an mga tawo: “Nagdagos siya bilang bisita sa harong nin sarong lalaking parakasala.” Minsan siring, nahiling ni Jesus na may potensiyal na magsulsol si Zaqueo. Asin dai nasudya  an linalauman ni Jesus. Nagtindog si Zaqueo asin nagsabi sa saiya: “Kagurangnan, an kabanga kan mga pagsadiri ko itatao ko sa mga pobre, asin ano man na nakikil ko sa kiisay man, ibabalik ko iyan na apat na doble.”—Lucas 19:7, 8.

Marahayon nanggad na paagi iyan para patunayan ni Zaqueo na tunay an pagsulsol niya! Posibleng marhay na kaya niyang kuwentahon base sa mga rekord niya nin buhis kun pira mismo an nakua niya sa manlain-lain na Judio, asin nangakong ibabalik iyan nin apat na doble. Labi pa ngani iyan sa hinahagad kan katugunan nin Diyos. (Exodo 22:1; Levitico 6:2-5) Apuwera kaiyan, nanuga si Zaqueo na itatao niya sa mga pobre an kabanga kan mga pagsadiri niya.

Naugma si Jesus sa patunay na ini ni Zaqueo na nagsusulsol na siya, kaya sinabi niya digdi: “Ngunyan, an kaligtasan nag-abot sa harong na ini, huling siya aki man ni Abraham. Huli ta an Aki nin tawo nagdatong tanganing hanapon asin iligtas an mga nawawara.”—Lucas 19:9, 10.

Dai pa sana nahahaloy, idinuon ni Jesus an kamugtakan kan saro na “nawara” paagi sa ilustrasyon niya manungod sa nawarang aki. (Lucas 15:11-24) Ngunyan, nagtao siya nin buhay na halimbawa nin sarong tawo na ibinibilang nang nawara pero nakua na. Dawa pa naggurumod-gumod ki Jesus an mga lider nin relihiyon saka an mga parasunod ninda asin kinuwestiyon siya huling tinawan niya nin atensiyon an mga arog ni Zaqueo, padagos pa man giraray niyang hinahanap para ibalik an nawawarang mga aking ini ni Abraham.