Ipinaliwanag na ni Jesus na “sadit na aripumpon” sana an tatawan nin lugar sa langitnon na Kahadian. (Lucas 12:32) Pero bakong basta-basta sana an pag-ako kan makangangalas na balos na iyan. Sa katunayan, idinuon pa niya kun gurano kahalaga para sa sarong tawo na magkaigwa nin tamang kaisipan para magin kabtang kan Kahadian.

Huli kaiyan, sinadol ni Jesus an mga disipulo na magdanay na andam sa pagbalik niya. Sinabi niya: “Magsulot na kamo nin panserbidor saka palaada an saindong mga lampara, asin dapat kamong magin siring sa mga tawong naghahalat na mag-abot an saindang kagurangnan hali sa kasal, tanganing pag uminabot siya asin magtuktok, mabuksan tulos ninda an pintuan para sa saiya. Maugma idtong mga uripon na sa pag-abot kan kagurangnan maabtan sinda kaini na nagbabantay!”—Lucas 12:35-37.

Madaling maintindihan kan mga disipulo an kaisipan na buot sabihon ni Jesus. An mga uripon na sinambit niya andam asin naghahalat sa pagbalik kan kagurangnan ninda. Nagpaliwanag si Jesus: “Kun mag-abot [an kagurangnan] sa ikaduwang pagbabantay [puon mga alas nuwebe nin banggi sagkod sa kamatangaan], maski pa sa ikatulo [puon sa kamatangaan sagkod sa mga alas tres nin maagahon], asin maabtan niya sindang andam, maugma sinda!”—Lucas 12:38.

Bako sana ining sadol dapit sa pagigin mahigos na mga lingkod sa harong, o mga trabahador. Nagin malinaw iyan kan sabihon mismo ni Jesus sa ilustrasyon kun paano siya maabot bilang an Aki nin tawo. Sinabi niya sa mga disipulo: “Kamo man, magdanay kamong andam, huli ta sa oras na dai nindo pighuhuna, maabot an Aki nin tawo.” (Lucas 12:40) Kaya sa sarong itinalaan na panahon sa ngapit, maabot siya. Gusto niya na an saiyang mga parasunod—lalo na idtong “sadit na aripumpon”—magin andam.

Gusto ni Pedro na masabutan nin malinaw an buot sabihon ni Jesus, kaya naghapot siya: “Kagurangnan, sinasabi mo an ilustrasyon na ini para sa samo sana o para sa gabos?” Imbes na direktang simbagon, nagtao si Jesus nin konektadong ilustrasyon: “Siisay man nanggad an maimbod na katiwala, an saro na mapagmansay, na nonombrahan kan saiyang kagurangnan na mamahala sa grupo kan mga suruguon kaini tanganing padagos sindang tawan kan saindang tamang suplay nin kakanon sa tamang panahon? Maugma an uripon na iyan kun sa pag-abot kan saiyang kagurangnan maabtan siya kaini na naggigibo kaiyan! Sinisigurado ko sa saindo, nonombrahan niya siya na mamahala sa gabos niyang pagsadiri.”—Lucas 12:41-44.

Sa nainot na ilustrasyon, “an kagurangnan” malinaw na nanunungod ki Jesus, an Aki nin tawo. Rasonable sana na an “maimbod na katiwala” mga tawo na kabilang sa “sadit na aripumpon” na sa sainda itatao an Kahadian. (Lucas 12:32) Sinasabi digdi ni Jesus na may nagkapirang miyembro kan grupong ini na magtatao sa saiyang “grupo kan mga suruguon” kan pangangaipo ninda, an “saindang tamang suplay nin kakanon sa tamang panahon.” Tinutukduan saka pinapakakan mismo ni Jesus sa espirituwal si Pedro asin an iba pang disipulo, kaya masasabutan ninda na may maabot na peryodo nin panahon kun sain an Aki nin tawo maabot. Asin sa panahon na iyan, magkakaigwa nin areglo para pakakanon sa espirituwal an mga parasunod ni Jesus, an “grupo kan mga suruguon” kan Kagurangnan.

Idinuon ni Jesus sa saro pang paagi kun taano ta kaipuhan kan mga disipulo na magin mapagbantay asin tawan nin atensiyon an kaisipan ninda. Ginibo niya iyan huling an saro posibleng magpuon na magin pabaya asin umabot pa ngani sa punto na tumangon an saiyang mga tugang: “Alagad kun mangyari man na an uripon na iyan magsabi sa saiyang puso, ‘Naaatraso an pag-abot kan sakuyang kagurangnan,’ asin magpuon siyang mambugbog kan mga suruguon na lalaki asin babayi saka magkakan asin mag-inom dangan maburat, an kagurangnan kan uripon na iyan maabot sa aldaw na dai niya siya pig-aasahan saka sa oras na dai niya aram, dangan papadusahan niya an uripon nin grabe nanggad na padusa asin ilalaag ini sa kaibanan kan mga bakong maimbod.”—Lucas 12:45, 46.

 Sinabi ni Jesus na nagdatong siya “tanganing magpalaad nin kalayo sa daga.” Nagbangon siya nin mga isyung nagkawsa nin mainiton na kontrobersiya, na huli kaiyan nagkaturunaw an salang mga katukduan asin mga tradisyon. Dahil kaini, nagkasuruhay an mga indibidwal na dapat kuta nagkakasararo, kaya an resulta pagkabaranga, “ama tumang sa aking lalaki asin aking lalaki tumang sa ama, ina tumang sa aking babayi asin aking babayi tumang sa ina, panugangan na babayi tumang sa manugang na babayi asin manugang na babayi tumang sa panugangan na babayi.”—Lucas 12:49, 53.

An mga tataramon na ini nangurugnang para sa mga disipulo. Dangan kinaulay ni Jesus an mga tawo. An kadaklan sa sainda may katagasan na nagsayumang akuon an ebidensiya na siya an Mesiyas, kaya sinabihan niya sinda: “Pag nakakahiling kamo nin panganuron na nabibilog sa may sulnupan, tulos kamong minasabi, ‘Magkakaigwa nin maraot na panahon,’ asin nangyayari iyan. Asin pag naririsa nindo na naghuhuyop an habagat, minasabi kamo, ‘Mainit nin grabe,’ asin nangyayari iyan. Mga parasagin-sagin, tatao kamong mag-analisar kan itsura kan daga asin langit, alagad taano ta dai kamo tataong mag-analisar kan mismong panahon na ini?” (Lucas 12:54-56) Malinaw na bako sindang handa.