Sumala kan Marcos 3:1-35
3 Makausa pa, sinulod hiya ha usa nga sinagoga, ngan may tawo didto nga uga* an kamot.+
2 Salit ginbinantayan nira hiya hin maopay basi makita kon tatambalon ba niya ito nga tawo durante han Sabbath, basi maakusaran hiya.
3 Ginsidngan niya an tawo nga uga* an kamot: “Buhát ngan pakadi ha butnga.”
4 Katapos nagsiring hiya ha ira: “Uyon ba ha balaud an pagbuhat hin maopay o an pagbuhat hin maraot, an pagtalwas hin kinabuhi* o an pagpatay, durante han Sabbath?”+ Pero nagpabilin hira nga hilom.
5 Katapos magkinita ha ira nga nasisina ngan nasusubo gud tungod han katig-a han ira kasingkasing,+ ginsidngan niya an tawo: “Ig-unat an imo kamot.” Ngan igin-unat niya ito, ngan nag-opay an iya kamot.
6 Tungod hito, an mga Pariseo nagkagawas ngan nakigkatirok dayon ha mga nasuporta ha partido ni Herodes+ para magkunsabo kontra kan Jesus, basi patayon hiya.
7 Kondi hi Jesus ngan an iya mga disipulo kinadto ha dagat, ngan damu nga tawo tikang ha Galilea ngan ha Judea an sinunod ha iya.+
8 Ngan damu nga tawo tikang pa ha Jerusalem, ha Idumea, ha tabok han Jordan ngan ha palibot han Tiro ngan Sidon an kinadto ha iya han hinbatian nira an damu nga butang nga iya ginbubuhat.
9 Ngan ginsidngan niya an iya mga disipulo nga mag-andam hin gutiay nga sakayan para ha iya basi diri hiya suokon han mga tawo.
10 Tungod kay damu an iya gintambal, ginpalibotan hiya han ngatanan nga may grabe nga sakit basi makakapot ha iya.+
11 Bisan an maghugaw nga mga espiritu,+ ha kada pakakakita nira ha iya, nahapa ha iya atubangan ngan naguliat ngan nasiring: “Ikaw an Anak han Dios.”+
12 Pero damu ka beses nga marig-on nga gintugon niya hira nga diri hiya igpanumat.+
13 Sinagka hiya ha bukid ngan gintawag adton mga karuyag niya,+ ngan kinadto hira ha iya.+
14 Ngan nagporma* hiya hin grupo hin 12 nga lalaki, ngan gintawag niya hira nga mga apostol, adton maupod ha iya ngan susugoon niya ha pagsangyaw
15 ngan tatagan niya hin awtoridad ha pagpagawas hin mga demonyo.+
16 Ngan an grupo han 12 nga lalaki+ nga iya ginporma* amo hi Simon, nga ginngaranan liwat niya hin Pedro,+
17 hi Santiago nga anak ni Zebedeo ngan hi Juan nga bugto ni Santiago (ginngaranan liwat niya hira hin Boanerges, nga nangangahulogan nga “mga Anak han Dalugdog”),+
18 hi Andres, hi Felipe, hi Bartolome, hi Mateo, hi Tomas, hi Santiago nga anak ni Alfeo, hi Tadeo, hi Simon nga Cananeo,*
19 ngan hi Judas Iscariote, nga ha urhi nagtraydor ha iya.
Katapos, sinulod hiya ha usa nga balay,
20 ngan nagtirirok utro an mga tawo, salit waray na hira makahigayon bisan ha pagkaon.
21 Kondi han nakabati an iya mga paryente mahitungod hito, kinadto hira basi dakpon hiya, kay nasiring hira: “Nalulurong na hiya.”+
22 Sugad man, an mga eskriba nga inabot tikang ha Jerusalem nasiring: “Aada ha iya hi Beelzebub,* ngan ginpapagawas niya an mga demonyo pinaagi han magmarando han mga demonyo.”+
23 Salit katapos niya hira padaupon ha iya, nagyakan hiya ha ira pinaagi hin mga ilustrasyon: “Paonan-o hi Satanas makakapagawas kan Satanas?
24 Kon an usa nga ginhadian nababahin, ito nga ginhadian diri makakapadayon;+
25 ngan kon an usa nga panimalay nababahin, ito nga panimalay diri makakapadayon.
26 Sugad man, kon ginkukontra ni Satanas an iya kalugaringon ngan nababahin hiya, diri hiya makakapadayon kondi maabot ha iya kataposan.
27 Ha pagkamatuod, waray bisan hin-o nga nasulod ha balay han usa nga makusog nga tawo an makakapangawat han iya mga panag-iya labot la kon gapuson anay niya an makusog nga tawo. Dida la hiya makakapanikas ha iya balay.
28 Ha pagkamatuod nasiring ako ha iyo nga an mga anak han mga tawo papasayloon han ngatanan nga butang, anoman nga mga sala an ira ginbuhat ngan anoman nga mga pagpasipara an ira ginyakan.
29 Kondi an bisan hin-o nga nagpapasipara ha baraan nga espiritu diri mapapasaylo ha kadayonan+ pero magigin salaan hiya tubtob ha waray kataposan.”+
30 Ginyakan niya ini tungod kay nasiring hira: “May-ada hiya mahugaw nga espiritu.”+
31 Yana inabot an iya nanay ngan an iya mga bugto nga lalaki,+ ngan samtang natindog hira ha gawas, may ginsugo hira basi tawagon hiya.+
32 Tungod kay may mga tawo nga nangangalingkod ha iya palibot, nagsiring hira ha iya: “Kitaa! An imo nanay ngan an imo mga bugto nga lalaki aadto ha gawas ngan iginpapatawag ka.”+
33 Kondi binaton hiya ha ira: “Hin-o an akon nanay ngan an akon mga bugto nga lalaki?”
34 Katapos, ginkita niya an nangangalingkod ha iya palibot ngan nagsiring: “Kitaa, an akon nanay ngan an akon mga bugto nga lalaki!+
35 An bisan hin-o nga nagbubuhat han kaburut-on han Dios, hiya an akon bugto nga lalaki ngan bugto nga babaye ngan nanay.”+
