Sumala kan Marcos 11:1-33
11 Yana han nagtitikahirani na hira ha Jerusalem, ha may Betfage ngan Betania+ ha Bukid han mga Olibo, ginsugo niya an duha han iya mga disipulo+
2 ngan ginsidngan hira: “Kadto kamo hito nga baryo nga iyo nakikita, ngan pagsulod gud niyo, makakakita kamo hin nakahigot nga nati nga asno nga waray pa masakyi hin tawo tubtob yana. Badbara niyo an higot hito ngan dad-a ito nganhi.
3 Ngan kon may bisan hin-o nga magyakan ha iyo, ‘Kay ano nga ginbubuhat niyo ito?’ siring kamo, ‘Kinahanglan ini han Ginoo ngan ibabalik la liwat ini dayon nganhi.’”
4 Salit linakat hira ngan nakita an nati nga asno nga nakahigot ha may purtahan nga hirani ha kalye, ngan ginbadbad nira an higot hito.+
5 Pero an iba nga naninindog didto nagsiring ha ira: “Kay ano nga ginbabadbad niyo an higot han nati nga asno?”
6 Ira hira ginsumatan han ginsiring ni Jesus, ngan ginpalakat nira hira.
7 Ngan gindara nira kan Jesus an nati nga asno+ ngan ginsapinan ito han ira pantungbaw nga mga bado, ngan liningkod hiya dida hito.+
8 Sugad man, damu an naglatag han ira pantungbaw nga mga bado ha dalan, pero an iba nangutod hin dahunon nga mga sanga ha ligid han dalan.+
9 Ngan an mga nag-uuna ngan an mga nagsisinunod padayon nga nagginuliat: “Talwasa hiya, nag-aampo kami!+ Binendisyonan hiya nga napakanhi ha ngaran ni Jehova!*+
10 Bendisyonan unta an tiarabot nga Ginhadian han aton amay nga hi David!+ Talwasa hiya, nag-aampo kami ha imo nga aada ha kahitas-an!”
11 Ngan sinulod hiya ha Jerusalem ngan kinadto ha templo, ngan ginkita niya an ngatanan ha palibot, pero tungod kay tikagab-i na, ginawas hiya tipakadto ha Betania upod an Dose.+
12 Kinabuwasan samtang nabaya hira ha Betania, gin-gutom hiya.+
13 Tikang ha hirayo nakakita hiya hin kahoy nga igos nga may mga dahon, ngan ginkadto niya ito basi kitaon kon may bunga ito. Pero pagdaop niya, waray hiya nakita nga bunga kondi mga dahon la, kay diri adto panahon ha pamunga han mga igos.
14 Salit ginsidngan niya ito: “Waray na gud makakakaon han imo bunga ha bisan san-o.”+ Ngan namamati an iya mga disipulo.
15 Yana inabot hira ha Jerusalem. Didto sinulod hiya ha templo ngan nagtikang pagpaiwas ha mga namamaligya ngan namamalit ha templo, ngan ginbalintong niya an mga lamesa han mga parabalyo hin kwarta ngan an mga lingkoran han mga nagbabaligya hin mga sarapati,+
16 ngan waray niya tuguti an bisan hin-o nga may dara nga garamiton nga umagi ha templo.
17 Nagtutdo hiya ngan nagsiring ha ira: “Diri ba nahisurat, ‘An akon balay tatawagon nga balay nga arampoan para ha ngatanan nga nasud’?+ Pero ginhimo niyo ini nga lungib han mga tulisan.”+
18 Ngan hinbatian ito han punoan nga mga saserdote ngan han mga eskriba, ngan nagtikang hira pamiling hin paagi ha pagpatay ha iya;+ kay nahahadlok hira ha iya, tungod kay an ngatanan nga tawo nahipausa ha iya igintututdo.+
19 Han tikagab-i na, ginawas hira ha syudad.
20 Pero kinabuwasan han nalabay hira ha kahoy nga igos temprano ha aga, nakita nira nga uga na ito tikang ha mga gamot.+
21 Nahinumdoman ito ni Pedro ngan nagsiring ha iya: “Rabbi, kitaa! an kahoy nga igos nga imo iginsumpa uga na.”+
22 Hi Jesus nagsiring ha ira: “Magkaada kamo pagtoo ha Dios.
23 Ha pagkamatuod nasiring ako ha iyo nga kon an bisan hin-o magsiring hini nga bukid, ‘Magabot ka ngan mahilabog ha dagat,’ ngan diri nagruruhaduha ha iya kasingkasing kondi may pagtoo nga mahitatabo an iya ginsisiring, mahitatabo gud ito.+
24 Tungod hini susumatan ko kamo, an ngatanan nga butang nga iyo igin-aampo ngan gin-aaro, magkaada kamo pagtoo nga nakarawat na niyo ito, ngan makakarawat niyo ito.+
25 Ngan kon natindog kamo nga nag-aampo, pasayloa an anoman nga sayop ha iyo han bisan hin-o, basi mapasaylo liwat han iyo Amay nga aadto ha langit an iyo mga sayop.”+
26 * ——
27 Yana inabot hira utro ha Jerusalem. Ngan samtang naglalakat hiya ha templo, an punoan nga mga saserdote, an mga eskriba, ngan an mga tigurang nagkaabot
28 ngan nagsiring ha iya: “Tikang diin an imo awtoridad ha pagbuhat hini nga mga butang? O hin-o an naghatag ha imo hini nga awtoridad ha pagbuhat hini nga mga butang?”+
29 Binaton hi Jesus ha ira: “May ipapakiana ako ha iyo. Batona niyo ako, ngan susumatan ko kamo kon diin tikang an akon awtoridad ha pagbuhat hini nga mga butang.
30 An pagbawtismo ba ni Juan+ tikang ha langit o tikang ha mga tawo? Batona niyo ako.”+
31 Salit nangatadongan hira ha usa kag usa, nga nasiring: “Kon sumiring kita, ‘Tikang ha langit,’ masiring hiya, ‘Kon sugad, kay ano man nga waray kamo tumoo ha iya?’
32 Pero mangangahas ba kita pagsiring, ‘Tikang ha mga tawo’?” Nahahadlok hira ha mga tawo, kay natoo an ngatanan nga hi Juan usa gud nga propeta.+
33 Salit binaton hira kan Jesus: “Diri kami maaram.” Hi Jesus nagsiring ha ira: “Diri ko liwat isusumat ha iyo kon diin tikang an akon awtoridad ha pagbuhat hini nga mga butang.”
