1. Bilang Kristiano, antoy nepeg a pangipasen tayod pananisia tayo?

SAY pananisia tayo bilang Kristiano et importantin kualidad. Aliwan amin ya too et walaay pananisia. (2 Tes. 3:2) Balet inikdan nen Jehova na “pananisia” so amin a mandadayew ed sikato. (Roma 12:3; Gal. 5:22) Kaukolan ya pablien itan na amin ya akaawat ed satan.

2, 3. (a) Anto ray bendisyon ed sakey ya walaan na pananisia? (b) Anto ran tepet so pantongtongan tayo?

² Imbaga nen Jesu-Kristo ya iyaasingger na Ama ed sikato iray totoo panamegley to. (Juan 6:44, 65) No say sakey et walaan na pananisia ed si Jesus, naperdona iray kasalanan to. Kanian posiblin nawalaan na anggapoy anggaan ya relasyon ed si Jehova. (Roma 6:23) Wala tay maong ya ginawa tayo kanian kanepegan tayo itan ya balibalin bendisyon? Diad tua, kanepegan tayoy ompatey lapud makasalanan itayo. (Sal. 103:10) Balet walay maong ya anengneng nen Jehova ed sikatayo. Tan lapud agnaparaan ya panangasi to, nilukasan toy puso tayon mangawat ed maong a  balita. Kanian ginapoan tayon ipanengneng so pananisia ed si Jesus tan iilaloan tayoy manbilay ya anggapoy anggaan.—Basaen so 1 Juan 4:9, 10.

³ Pero anton talagay kabaliksan na pananisia? Kasin magenap la ya natatalosan tayo ray bendisyon ya ipaparaan na Dios parad sikatayo? Sakey ni, panon tayon nipanengneng ya walay pananisia tayo?

4. Akin ya say pananisia et aliwa labat ya antam iray gagala na Dios?

⁴ Say pananisia et aliwa labat ya antam iray gagala na Dios. Mabiskeg itan ya puersan mamakiwas ed sakey pian gawaen so panlabayan na Dios. No say sakey et walaan na pananisia ed inusar na Dios ya mangiliktar, napakiwas ya inabang ed arum so maong a balita. Impaliwawa nen apostol Pablo: “No diad sangim et iyaabawag mon si Jesus so Katawan, tan diad pusom et ipapatnag moy pananisia a sikatoy pinaoli na Dios manlapud inaatey, niliktar ka. Ta say sakey et nepeg ton ipatnag so pananisia diad puso to pian magmaliw a matunong, tan say salita et nepeg ton iyabawag ed publiko diad panamegley na sangi to pian sikatoy niliktar.”—Roma 10:9, 10; 2 Cor. 4:13.

5. Akin ya importante so pananisia, tan panon tayon napansiansian mabiskeg itan? Mangiter na alimbawa.

⁵ Malinew, say ilalo tayon manbilay ya anggapoy anggaan diad balon mundo na Dios et akadependid pakawalaan na pananisia tan pamasiansia ed satan a mabiskeg. Nayari tayon ikompara itan ed mabunan tanaman ya kaukolan a salogen. Aliwan singa say artipisyal ya tanaman, say mabilay ya tanaman et manguuman-uman. Nayarin nalenes itan no agnasalog odino mantultuloy a manbilay no lanang ya nasasalog. No napaulyanan, nayarin ompatey anggano dati et mabunabuna. Ontan met so pananisia tayo. Nalenes tan ompatey no napaulyanan. (Luc. 22:32; Heb. 3:12) Balet no asikasoen tayo, say pananisia tayo et mansiansian mabilay tan ‘ombiskeg a maong.’—2 Tes. 1:3; Tito 2:2.

6. Base ed Hebreo 11:1, anton duaran bengatla so akasentroan na pananisia?

⁶ Nabasa tayoy nipaakar ed pananisia diad Hebreo 11:1. (Basaen.) Say pananisia et akasentro ed duaran bengatla ya agtayo nanengneng: (1) “Iilaloan”—kaibad saya iray impromisan nagawad arapen ya agni asumpal, singa say pakaderal na amin ya mauges tan say isabi na balon mundo. (2) “Saray bengatlan tua anggano agnanengneng.” Diad konteksto, say Griegon salitan impatalos ya “malinew ya ebidensya” et ontutukoy ed “makakombinsin ebidensya” ed saray bengatlan tua anggano agnanengneng, ya singa say kiwawala nen Jehova a Dios, si Jesu-Kristo, saray anghel, tan saray nagagawa ed Panarian diad tawen. (Heb. 11:3) Panon tayon paneknekan ya mabilabilay so ilalo tayo tan manisia tayod saray agnanengneng ya bengatlan nabasad Salita na Dios? Panamegley na saray salita tan gawa tayo. No anggapo iratan, kulang so pananisia tayo.

7. Antoy nitulong ed sikatayo na alimbawa nen Noe pian natalosan tayoy kabaliksan na pakawalaay pananisia? (Nengnengen so litratod gapo na artikulo.)

⁷ Nabasad Hebreo 11:7 so nipaakar ed pananisia nen Noe ya “sanen akaawat na pasakbay na Dios nipaakar ed saray bengatlan agni anengneng, et impatnag toy takot ed Dios tan angipaalagey na biong pian niliktar so sankaabungan to.” Impanengneng nen Noe so pananisia to diad impanggawa toy balbaleg a biong. Seguradon tinepetan na saray kakaabay to no akin ya mangipapaalagey na  atagtagey ya bilding. Kasin ag-ira inebatan nen Noe odino imbaga ton agda pibabalian? Andi! Lapud pananisia to, makpel to ran pinulongan tan pinasakbayan ed onsasabin panangukom na Dios. Nayarin imbaga met nen Noe ed totoo imay eksakton imbaga nen Jehova ed sikato: “Nandesisyon ak lan panganggaen so amin a totoo, ta say dalin et napnoy inkaruksa lapud sikara . . . Delapen koy dalin pian naderal so amin a laman a walaay linawa na bilay ed silong na tawen. Ompatey so amin a bengatlan walad dalin.” Seguradon impaliwawa met nen Noe ed totoo no panon iran makaliktar diad impangulit tod ganggan na Dios: “Nepeg kan onloob ed biong.” Diad ontan et mas pinaneknekan nen Noe so pananisia to diad pagmaliw ya “managpulong na inkatunong.”—Gen. 6:13, 17, 18; 2 Ped. 2:5.

8. Antoy impaliwawa nen Santiago nipaakar ed dugan kabaliksan na pananisia?

⁸ Nansulat met si Santiago nipaakar ed pananisia. Nayarin ginawa to itan kayarin insulat nen apostol Pablo so pinuyanan a kabaliksan na pananisia. Singa si Pablo, impaliwawa nen Santiago ya say tuan pananisia na Kristiano et aliwa labat ya basta panisia, kaukolay gawa. Insulat to: “Ipanengneng kod sika so pananisiak diad panamegley na saray gawak.” (Sant. 2:18) Insan impalinew nen Santiago so pandumaan na basta panisia tan say pangipanengneng na  pananisia. Manisia iray demonyo ya walay Dios, balet anggapoy tuan pananisia ra. Imbes, kokontraen day pakasumpal na gagala na Dios. (Sant. 2:19, 20) Pian nipanengneng nen Santiago so pandumaan, tinukoy toy sakey a toon mabiskeg so pananisia tod Dios, intepet to: “Agta say ama tayon si Abraham et niyabawag a matunong lapud saray gawa to kayari ton inyapay ed altar so anak ton si Isaac? Nanengneng mod saya a say pananisia to et atekepan na saray gawa tan nagmaliw a nagnap so pananisia to diad panamegley na saray gawa to.” Insan to impaimano so importantin punto ya say pananisia et nepeg ya tekepay gawa, inkuan to: “Unong a say laman ya andian na linawa et inatey, say pananisia met ya andian na saray gawa et inatey.”—Sant. 2:21-23, 26.

9, 10. Panon itayon tinulongan nen apostol Juan ya natalosan ya importante so pangipanengneng na pananisia?

⁹ Kayari na talomplon taon, insulat nen apostol Juan so Ebanghelyo tan taloran sulat to. Kasin atalosan to so dugan kabaliksan na pananisia ya insulat na arum nin angisulat ed Biblia? Aminpigan inusar nen Juan so Griegon salita ya ipapatalos no maminsan ya “mangipanengneng na pananisia.”

¹⁰ Singa bilang impaliwawa nen Juan: “Samay mangipapanengneng na pananisia ed Anak et walaan na bilay ya andi-anggaan; samay agmanguunor ed Anak et agto nagamoran so bilay, noagta mansiansia ed sikato so sanok na Dios.” (Juan 3:36) Kaibad pananisia na saray Kristiano so pangunor ed saray ganggan nen Jesus. Aminpigan sinalambit nen Juan iray imbaga nen Jesus a pakapatnagan ya say pangipanengneng na pananisia et tuloytuloy a proseso.—Juan 3:16; 6:29, 40; 11:25, 26; 14:1, 12.

11. Panon tayon nipanengneng ya aapresyaen tayoy naamtaan tayon katuaan?

¹¹ Misalsalamat itayo ta inusar nen Jehova so masanton espiritu to pian ipaamtad sikatayoy katuaan tan tinulongan to tayon nipanengneng so pananisia ed maong a balita! (Basaen so Lucas 10:21.) Komon ta agtayo ontutundan pisalamatan si Jehova lapud inyasingger to tayod sikato panamegley na Anak to, say “Manunan Manangitonton tan Manamayadyari na pananisia tayo.” (Heb. 12:2) Pian nipanengneng tayoy apresasyon ed agnaparaan ya kaabigan na Dios, kaukolan tayon tuloytuloy a pabiskegey pananisia tayo diad pampikasi tan panaral ed Biblia.—Efe. 6:18; 1 Ped. 2:2.

12. Panon tayon nipanengneng so pananisia tayo?

¹² Nepeg tayon ipanengneng so pananisia tayo ed saray impromisa nen Jehova, tan kaukolan ya nanengneng itan na arum. Singa bilang, tuloytuloy tayon ipupulong so Panarian na Dios tan mitutulongan tayod panaggaway babangatan. Tuloytuloy itayo met ya ‘manggagawa na maabig ed amin, balet nagkalalo lad saray kapananisiaan tayo.’ (Gal. 6:10) Tan gagawaen tayoy anggaay nayarian tayon ‘lakseben so daan a personalidad pati saray kagagawa na satan,’ tan iiwasan tayoy amin ya posiblin mamakapuy na espiritualidad tayo.—Col. 3:5, 8-10.

13. Panon kaimportante so “pananisia ed Dios,” tan iner itan inkompara, tan akin?

¹³ Ibabaga na Biblia: “No anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.” (Heb. 11:6) Nabasa ed Biblia ya say “pananisia ed Dios” et kabiangan na “pundasyon” ya kaukolan pian say sakey et magmaliw tan mansiansian Kristiano. (Heb. 6:1) Diad satan ya pundasyon, kaukolan na saray Kristiano ya “iyarum ed pananisia” ra so arum ni ran importantin kualidad “pian mansiansia [rad]  panangaro na Dios.”—Basaen so 2 Pedro 1:5-7; Jud. 20, 21.

14, 15. No ikomparad aro, panon kaimportante so pananisia?

¹⁴ Indanet na saray Kristianon angisulat ed Biblia ya importante so pananisia ta aminlasus dan binitla itan. Atan so Kristianon kualidad ya sankarakelan ya abitlad Biblia. Kasin labay ya ibaga na satan ya say pananisia so sankaimportantian ya kualidad na saray Kristiano?

¹⁵ Nen inkompara nen Pablo so pananisia ed aro, insulat to: “No walan amin ed siak so pananisia pian niyalis ko ray palandey, balet anggapoy arok, anggapoy kakanaan ko.” (1 Cor. 13:2) Indanet nen Jesus ya sankaimportantian ed amin so panangaro ed Dios nen inebatan to iyan tepet: “Dinan so sankaimportantian ed Ganggan?” (Mat. 22:35-40) Sakop na panangaro so arum nin importantin kualidad na saray Kristiano, kaiba lay pananisia. “Say aro,” kuan na Biblia, et “manisia ed amin a bengatla.” Panisiaan na saray Kristiano iray imbaga na Dios ya katuaan ya akasulat ed Salita to.—1 Cor. 13:4, 7.

16, 17. Panon ya saniban indanet ed Biblia so pananisia tan aro, balet dinan so sankaimportantian, tan akin?

¹⁶ Lapud importante so pananisia tan aro, aminpigan indanet na saray Kristianon angisulat ed Biblia irayan kualidad, ya no maminsan et sanibad sakey a sentence odino teksto. Pinaseseg nen Pablo iray agagi ya “isulong [day] samben ed pagew a pananisia tan aro.” (1 Tes. 5:8) Insulat nen Pedro: “Anggaman . . . agyon balot anengneng [si Jesus], sikatoy aaroen yo. Anggaman sikatoy agyo nanenengneng natan, ipapatnag yoy pananisia ed sikato.” (1 Ped. 1:8) Tinepetan nen Santiago iray alanaan ya agagi to: “Agta pinili na Dios iramay pobri ed sayan mundo pian magmaliw a mayaman ed pananisia tan tomatawir na Panarian, ya insipan tod saramay mangaaro ed sikato?” (Sant. 2:5) Insulat nen Juan: “Saya so ganggan [na Dios], ya ipatnag tayoy pananisia ed ngaran na Anak ton si Jesu-Kristo tan manaaroan itayo.”—1 Juan 3:23.

¹⁷ Anggano importante so pananisia, saray aspekto na sayan kualidad et naandi la no nanengneng tayo lay kasumpalan na saray impromisa na Dios tan nagawa la ray iilaloan tayo. Balet agbalot manampot so pamaelet tayod panangaro tayod Dios tan ed kapara tayon too. Kanian oniay insulat nen Pablo: “Natan balet, sarayan talo et mansiansia: pananisia, ilalo, aro; balet say sankaimportantian ed saraya et say aro.”—1 Cor. 13:13.

18, 19. Diad panaon tayo, antoy pakapatnagan na tuan pananisia, tan siopay nepeg ya napagalangan?

¹⁸ Diad panaon tayo, ipapanengneng na saray totoo nen Jehova so pananisia ra ed niletneg lan Panarian na Dios. Lapud satan et linmaknab ed interon mundo so espiritual a paraiso tan masulok lan waloran milyon so manaayam ditan. Sankanengneng ditan so bunga na espirituy Dios. (Gal. 5:22, 23) Talagan sankapatnagan ditan so tuan Kristianon pananisia tan aro!

¹⁹ Aliwan too so napagalangan ed satan. Say Dios tayo so nanggawad satan. Lapud marakdakep ya resulta, seguradon “magmaliw a bantog si Jehova, sakey ya andi-anggaan a tanda ya agbalot naandi.” (Isa. 55:13) On, ‘regalo na Dios ya niliktar tayo panamegley na pananisia.’ (Efe. 2:8) Lalon onlalaknab tan onaaligwas so espiritual ya paraiso tayo anggad say interon dalin et napano na perpekto, matunong, tan maliket a totoo ya mangidayew ed ngaran nen Jehova ed andi-angga. Komon ta itultuloy tayon ipanengneng so pananisia tayo ed saray impromisa nen Jehova!