Ed Saray Taga Roma 12:1-21
12 Kanian mikakasi ak ed sikayo, agagi, diad panamegley na panangabagey na Dios, ya iyapay yo ray laman yo+ bilang mabilay a bagat, masanto+ tan makapaliket ed Dios, sakey a sagradon panaglingkor tekep na pakayari yon mankatunongan.+
2 Tan agkayo la manpapaimpluensya ed sayan sistema na mundo,* noagta manpasimbalo kayo diad panguman yo ed panagnonot yo,+ pian napaneknekan yo ed inkasikayo+ so maong tan makapaliket tan ayadyarin linawa na Dios.
3 Ta diad panamegley na agnaparaan a kaabigan ya impatnag ed siak, ibagak ed balang sakey ed sikayo ditan ya agkayo maniisip na alabas ed sarili yo nen say manepeg yon isipen,+ noagta kada sakey et manisip diad paraan a pakapatnagan na limpion kanonotan unong ed pananisia ya inter na Dios ed sikato.+
4 Ta no panon a say sakey a laman et walaan na dakel a kabiangan,+ balet agnampapara so usar na saratan,
5 sikatayo met, anggaman dakel itayo, et saksakey itayon laman a nikasakey ed si Kristo, balet balang sakey ed sikatayo et kabiangan a mankaukolan ed sakey tan sakey.+
6 Sirin, lapud nandurumay regalon inter ed sikatayo unong ed agnaparaan a kaabigan,+ a no propesiya itan, manpropesiya itayo unong ed pananisia tayo;
7 odino no ministeryo itan, mantultuloy itayo ed satan a ministeryo; odino samay manbabangat, sikatoy mantultuloy ed panagbangat to;+
8 odino samay mamapaseseg,* sikatoy mantultuloy a mamaseseg;*+ samay mangibubunog,* gawaen to itan a mabunbunlok;+ samay mangaasikaso,* gawaen to itan a maseeseet;*+ samay mangipapatnag na panangasi, gawaen to itan a malikeliket.+
9 Nepeg a say panangaro yo et andiay pansimpisimpitan.+ Dimla yo so mauges;+ peket kayo ed maong.
10 Diad aroan na sanaagi, ipalikna yoy masimoon a panamabli ed sakey tan sakey. Idaulo yo so* pangipanengneng na galang ed sakey tan sakey.+
11 Magmaliw kayon makuli,* aliwan mangiras.+ Magmaliw kayon marlang ed espiritu.+ Manpaaripen kayo ed si Jehova.*+
12 Manliket kayod ilalo. Mansungdo kayod kairapan.+ Manseet kayod pikakasi.+
13 Manginabang kayod saray masanto unong ed saray nakaukolan da.+ Iyugali yoy mamarawes.+
14 Itultuloy yon kerewen a nabendisyonan iramay mamapasegsegang;+ kerew yoy panamendisyon tan agkayo mansasalitay mauges.+
15 Miliket kayo ed saramay manliliket; miakis kayo ed saramay onaakis.
16 Moriaen so arum a singa ed panmoria yod inkasikayon dili;* agyo iteteen so nonot yo ed ataragey a bengatla, noagta paitonton kayo ed saray abeban bengatla.+ Agkayo magmamaliw a marunong ed dilin pakanengneng yo.+
17 Agyo babalesen na mauges so siopaman a nanggaway mauges ed sikayo.+ Ikonsidera yo no antoy maabig diad pakanengneng na amin a totoo.
18 No posible, diad anggaay nayarian yo, mikareenan kayod amin a totoo.+
19 Agkayo ombabales parad inkasikayo, inad-arok ya agagi, noagta ikdan yo na pasen so sanok;*+ ta nisulat: “‘Kien ko so panangibales; siak so ombawi,’ kuan nen Jehova.”*+
20 Balet “no say kabusol mo et narasan, pakan mo; no napgaan, painum mo; ta no gagawaen mo iya et bubuntonan mo na mandarlang iran ngalab so ulo to.”*+
21 Agka padadaeg ed mauges, noagta itultuloy mon daegen so mauges diad panamegley na maong.+
Paimanod leksab
^ Odino “masimsimoon.”
^ Odino “mangidadaulo.”
^ Odino “mangiiter.”
^ Odino “manimbawa.”
^ Odino “manisimbawa.”
^ Odino “Sikayoy unona ed.”
^ Odino “maseet; maseseg.”
^ Nengnengen so Apendise A5.
^ Odino “Say awawey yo komon ed arum et miparad awawey yod inkasikayon dili.”
^ Salanti, sanok na Dios.
^ Nengnengen so Apendise A5.
^ Salanti, pian palemeken so sakey a too tan tunawen so inkaawet to.
