Unona ed Saray Taga Corinto 10:1-33
10 Natan labay kon naamtaan yo, agagi, a saray inmuunan atateng tayo et wala ran amin ed silong na lurem+ tan amin da et binmeltang ed dayat+
2 tan amin da et abautismoan ed si Moises diad panamegley na lurem tan dayat,
3 tan amin da et angan na parehon espiritual a kakanen+
4 tan amin da et inminum na parehon espiritual ya iinumen.+ Ta oniinum ira nensaman manlapud espiritual a bato a tinmumbok ed sikara, tan saman a bato et mangililitrato ed* Kristo.+
5 Anggaman ontan, ag-aliketan so Dios ed maslak ed sikara, ta pinapatey ira diad kalawakan.+
6 Sarayan bengatla et pakaaralan tayo, pian agtayo pilaleken iray makaderal a bengatla, a singa ginawa ra.+
7 Agtayo met komon mandadayew ed idolo, a singa ginawa na arum ed sikara; ta unong a nisulat: “Yinmurong iray totoo pian mangan tan oninum. Insan inmalagey ira pian manliliket.”+
8 Agtayo met komon manggagaway seksual ya imoralidad,* a singa say arum ed sikara a nanggaway seksual ya imoralidad,* kanian inatey so 23,000 ed sikara diad sakey agew.+
9 Agtayo met komon susuboken si Jehova,*+ a singa say arum ed sikara ya anubok ed sikato, kanian inatey ira diad panamegley na saray uleg.+
10 Agtayo met komon magmamaliw a meremere, a singa say arum ed sikara a nanmeremere,+ kanian inatey ira diad panamegley na samay managderal.+
11 Natan et agawa irayan bengatla ed sikara pian pakaaralan, tan nisulat iraya bilang pasakbay ed sikatayo+ ran asabian na anggaan na saray sistema na mundo.
12 Kanian samay maniisip a sikatoy akaalagey et manalwar komon ya agnatumba.+
13 Anggapoy tukso a sinmabid sikayo ya agni asali na arum a totoo.+ Balet matoor so Dios, tan agto abuloyan a nipaarap kayod tukso ya agyo nayarian,+ balet sano onsabi so tukso et sikatoy manggawa met na dalan a pawayan pian nasungdoan yo itan.+
14 Kanian, inad-arok ya agagi, ibatikan yo so idolatriya.+
15 Mitotongtong ak ed sikayo bilang totoon makatebek; sikayon mismo so mandesidi no duga odino aliwa so ibabagak.
16 Nipaakar ed kopa na panamendisyon ya ipipikasi tayo, agta pinanabang itan ed dala na Kristo?+ Nipaakar ed tinapay a pipisagen tayo, agta pinanabang itan ed laman na Kristo?+
17 Saksakey so tinapay, kanian anggano dakel itayo, saksakey itayon laman,+ ta mamangan itayon amin ed satan a tinapay.
18 Nonot yo ray Israelita: Agta saramay mamangan ed saray bagat et minanabang ed altar?+
19 Antoy labay kon ibaga ed saya? Kasin makana imay ibabagat ed idolo, odino kasin makana imay idolo?
20 Andi; noagta say labay kon ibaga, saray ibabagat na saray nasyon et ibabagat dad saray demonyo tan aliwan diad Dios;+ tan agko labay a mibiang kayo ed saray demonyo.+
21 Agkayo nayarin oninum ed kopa nen Jehova* tan ed kopa na saray demonyo; agkayo nayarin mangan ed “lamisaan nen Jehova”*+ tan ed lamisaan na saray demonyo.
22 Odino ‘kasin sasagyaten tayon onimon si Jehova’?*+ Agta aliwa itayon mas mabiskeg nen say sikato?
23 Amin a bengatla et nayari, balet aliwan amin et makagunggona. Amin a bengatla et nayari, balet aliwan amin et makapabiskeg.+
24 Mantultuloy komon ya anapen na kada sakey so pankaabigan na arum a too, aliwan say dilin pankaabigan to.+
25 Akan yo so antokaman a nasaliw ed lakoay karne, ya agkayo la mantetepet lapud konsiensia yo,
26 ta “si Jehova* so akanggawa ed dalin tan amin a wadtan.”+
27 No imbitaan kayo na sakey ya agmananisia tan labay yoy onla, akan yo so antokaman ya iparungod sikayo, ya agkayo la mantetepet nisengeg ed konsiensia yo.
28 Balet no walay sakey a mangibagad sikayon, “Inyapay iyad idolo,” agkayo mamangan lapud samay angibagad sikayo tan lapud konsiensia.+
29 Aliwan say konsiensia yoy tutukoyen ko, noagta say konsiensia na saman a too. Ta akin a say kawayangan ko et ukomen na konsiensia na sananey a too?+
30 No mamangan ak tekep na pisasalamat, akin et pansalitaan ak na mauges lapud samay kakanen a pisasalamatan ko?+
31 Kanian, balanglan mamangan odino oniinum kayo odino antokaman so gagawaen yo, gawa yo so amin a bengatla parad kigloriaan na Dios.+
32 Paliisan yoy magmaliw a pakagapolan na saray Judio ontan met na saray Griego tan say kongregasyon na Dios,+
33 no panon a panggugunaetan kon paliketen so amin a totoo diad amin a bengatla, ya agko aanapen so dilin pankaabigan ko,+ noagta say pankaabigan na dakel, pian niliktar ira.+
Paimanod leksab
^ Odino “et say.”
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
