Eksodas 7:1-25

  • Jehova i mekem Moses i kam strong (1-7)

  • Stik blong Eron i jenis i kam wan bigfala snek (8-13)

  • Namba 1 panis: wota i kam blad (14-25)

7  Nao Jehova i talem long Moses se: “!Yu luk! Mi mi mekem yu yu olsem God long Fero, mo brata blong yu Eron bambae i olsem profet blong yu.+  Ol tok we bambae mi talem long yu, yu mas talem bakegen long brata blong yu Eron, mo hem bambae i toktok long Fero, nao Fero bambae i sanemaot ol laen blong Isrel long kantri blong hem.  Be mi, bambae mi letem hat blong Fero i kam strong,+ mo bambae mi mekem plante saen mo merikel long Ijip.+  Be Fero bambae i no lesin long yu, mo bambae mi putum han blong mi long Ijip blong tekemaot bigfala grup blong ol man blong mi, ol laen blong Isrel, mo bambae mi mekem bigfala jajmen i kasem Ijip.+  Mo taem mi stretem han blong mi agensem Ijip, mo mi tekemaot ol laen blong Isrel long ol man Ijip, bambae olgeta oli save se mi mi Jehova.”+  Nao Moses mo Eron i mekem olgeta samting we Jehova i talem, yes stret olsem we hem i talem.  Moses i gat 80 yia, mo Eron i gat 83 yia, taem tufala i go toktok long Fero.+  Nao Jehova i talem long Moses mo Eron se:  “Sipos Fero i talem long yutufala se: ‘Yutufala i mekem wan merikel,’ bambae yu talem long Eron se: ‘Yu tekem stik blong yu mo yu sakem i godaon long fored blong Fero.’ Stik ya bambae i jenis i kam wan bigfala snek.”+ 10  Ale Moses mo Eron tufala i go luk Fero mo tufala i mekem stret olsem we Jehova i talem. Eron i sakem stik blong hem i godaon long fored blong Fero mo ol man blong wok blong hem, nao stik ya i jenis i kam wan bigfala snek. 11  Be Fero i singaot ol waes man oli kam wetem ol kleva, mo ol pris blong Ijip+ we oli stap mekem majik, nao olgeta tu oli mekem sem samting wetem majik blong olgeta.+ 12  Nao olgeta oli sakem ol stik blong olgeta i godaon, nao ol stik ya oli jenis i kam ol bigfala snek, be stik blong Eron i solemdaon ol stik blong olgeta. 13  Be yet, hat blong Fero i strong nomo,+ mo hem i no lesin long olgeta, stret olsem we Jehova i bin talem. 14  Biaen Jehova i talem long Moses se: “Hat blong Fero i strong,+ taswe hem i no wantem letem ol man blong mi oli go. 15  !Yu luk! !Long moning, Fero bambae i godaon long wota! Bambae yu go stanap long saed blong Nael Reva blong mitim hem, mo yu holem stik ya we i bin jenis i kam snek.+ 16  Mo yu mas talem long hem se: ‘Jehova we i God blong ol man Hibru i sanem mi mi kam long yu,+ mo i talem se: “Yu letem ol man blong mi oli go, blong oli save mekem wosip long mi long draeples.” Be kam kasem naoia, yu yu no obei long hem. 17  Hemia tok we Jehova i talem: “Bambae mi mi mekem wan samting, nao bambae yu yu save se mi mi Jehova.+ Naoia bambae mi kilim Nael Reva long stik ya we mi holem, mo bambae wota ya i kam blad. 18  Mo ol fis long Nael Reva bambae oli ded, mo reva ya bambae i sting, mo ol man Ijip bambae oli no moa save dring wota blong Nael Reva.”’” 19  Biaen Jehova i talem long Moses se: “Yu talem long Eron se: ‘Yu tekem stik blong yu mo yu stretem antap long ol wota long Ijip,+ hemia ol reva blong hem, ol kanal blong hem,* ol swam blong hem,+ mo evri pul blong wota blong hem, blong olgeta evriwan oli kam blad.’ Bambae blad i stap long olgeta ples long Ijip, mo long ol kontena blong wota we oli wokem long wud mo ston.” 20  Nao wantaem nomo, Moses mo Eron i mekem ol samting stret olsem we Jehova i talem. Eron i leftemap stik ya mo i kilim Nael Reva long fored blong Fero mo ol man blong hem, nao olgeta wota long ples ya i kam blad.+ 21  Mo ol fis long reva ya oli ded,+ mo reva ya i stat blong sting, mo ol man Ijip oli no save dring wota blong Nael Reva,+ mo blad i stap long evri ples long Ijip. 22  Be ol pris blong Ijip we oli stap mekem majik, oli mekem sem samting wetem majik blong olgeta,+ nao hat blong Fero i gohed blong stap strong, mo hem i no wantem lesin long tufala, olsem we Jehova i bin talem.+ 23  Ale Fero i gobak long haos blong hem, mo hem i ting nating long samting ya. 24  Nao olgeta man Ijip oli stap digim graon long saed blong Nael Reva blong faenem wota blong dring, from we oli no moa save dring wota blong reva ya. 25  Nao seven dei i pas afta we Jehova i mekem Nael Reva i kam blad.

Ol futnot

Hemia ol kanal blong Nael Reva.