Eksodas 18:1-27

  • Jetro mo Jipora i kamtru (1-12)

  • Jetro i givim advaes blong oli putumap ol jaj (13-27)

18  Nao Jetro we i pris blong Midian mo i palika blong Moses,+ i harem nius blong olgeta samting we God i mekem blong Moses mo ol man Isrel. Hemia samting we Jehova i mekem blong tekemaot ol man Isrel long Ijip.+  Moses i bin sanem waef blong hem Jipora i go long palika blong hem Jetro, blong Jetro i lukaot long hem,  wetem tufala boe blong hem.+ Wan long tufala boe ya nem blong hem Gesom,*+ from we Moses i talem se: “Mi mi kam wan man blong narafala kantri we i stap long wan defren kantri.”  Mo narawan nem blong hem Eliesa,* from we Moses i talem se: “God blong papa blong mi i givhan long mi, i sevem mi, nao Fero i no kilim mi mi ded long naef blong faet blong hem.”+  Ale Jetro we i palika blong Moses, wetem tufala boe blong Moses mo waef blong hem, oli kam luk Moses long draeples, long ples we Moses i kamp long hem long bigfala hil blong tru God.+  Nao Jetro i sanem tok i go long Moses se: “Mi, palika blong yu Jetro,+ mi stap kam wetem waef blong yu mo tufala boe blong yu.”  Nao wantaem nomo Moses i aot, i go mitim palika blong hem, mo hem i bodaon long hem mo i kis long hem. Nao Moses i askem Jetro se hem i oraet no nogat, mo Jetro tu i mekem sem mak, biaen oli go insaed long tent.  Nao Moses i tokbaot long palika blong hem, olgeta samting we Jehova i bin mekem long Fero mo long Ijip, blong givhan long ol man Isrel.+ Mo tu, hem i tokbaot ol hadtaem we oli bin kasem long rod blong olgeta,+ mo olsem wanem Jehova i sevem olgeta.  Nao Jetro i glad tumas long ol gudfala samting we Jehova i mekem blong tekemaot ol man Isrel long Ijip. 10  Ale Jetro i talem se: “Yumi presem Jehova we i tekemaot yufala long Ijip mo long Fero, mo i sevem yufala, i tekemaot yufala long paoa blong Ijip. 11  Naoia mi save se Jehova i hae moa i winim ol narafala god,+ from samting we hem i mekem long ol praod man we oli agensem ol man blong hem.” 12  Nao Jetro we i palika blong Moses, i karem wan ofring we i blong bon fulwan mo ol sakrefaes blong givim i go long God. Mo Eron wetem olgeta elda blong Isrel oli kam blong kakae wetem palika blong Moses long fes blong tru God. 13  Long nekis dei, Moses i sidaon blong jajem ol man olsem we hem i stap mekem oltaem. Nao ol man oli gohed blong kam mo oli stanap long fored blong Moses, stat long moning gogo kasem long sapa. 14  Taem palika blong Moses i luk samting we Moses i stap mekem long ol man, hem i talem se: “?Yu yu stap mekem wanem ya long ol man? ?From wanem yu stap mekem samting ya yu wan?” 15  Ale Moses i talem long palika blong hem se: “From we ol man ya oli stap kam long mi blong faenemaot tingting blong God. 16  Taem i gat wan problem, oli kam luk mi mo mi mas jajem se hu i mekem i stret, mo mi mekem oli save desisen blong tru God mo ol loa blong hem.”+ 17  Nao palika blong Moses i talem se: “Samting we yu stap mekem i nogud. 18  Bambae yu spolem yu nomo, yu wetem ol man ya we oli stap wetem yu, from we wok ya i bigwan tumas mo yu no save mekem yu wan. 19  Naoia yu lesin long mi. Bambae mi givim advaes long yu mo God bambae i blesem yu.+ Yu bambae yu toktok long tru God long bihaf blong ol man,+ mo yu mas talemaot problem blong olgeta long tru God.+ 20  Yu mas givim woning long olgeta long saed blong ol rul mo ol loa,+ mo yu mas talemaot stret rod we oli mas folem, mo wok we oli mas mekem. 21  Be yu mas jusum sam gudfala man blong wok+ we oli ona long God, mo we ol narafala oli trastem olgeta, mo oli no save kasem mane blong haedem rong blong narafala.+ Nao yu putumap sam long olgeta blong oli lida blong taosen man, sam oli lida blong handred man, sam oli lida blong fifti man, mo sam oli lida blong ten man.+ 22  Olgeta ya bambae oli jajem ol man taem i gat problem. Be taem i gat ol problem we i had blong oli stretem, bambae oli tekem i kam long yu.+ Be ol smosmol problem, olgeta nomo bambae oli stretem. Bambae i moa isi long yu taem yu serem wok ya wetem olgeta.+ 23  Sipos yu mekem olsem, mo yu mekem ol samting we God i talem long yu, wok blong yu bambae i no hevi, mo ol man we yufala i stretem problem blong olgeta, bambae oli gohom we oli glad.” 24  Nao wantaem nomo Moses i obei long palika blong hem mo i mekem olgeta samting we hem i talem. 25  Hem i jusumaot sam gudfala man blong wok, mo i putumap olgeta blong oli lidim ol man. Nao sam oli lida blong taosen man, sam oli lida blong handred man, sam oli lida blong fifti man, mo sam oli lida blong ten man. 26  Nao olgeta ya oli jajem ol man taem i gat problem. Ol problem we i had blong oli stretem, oli tekem i kam long Moses.+ Be ol smosmol problem, olgeta nomo oli stretem. 27  Biaen Moses i talem tata long palika blong hem,+ nao palika blong hem i gobak long ples blong hem.

Ol futnot

Hemia i minim “Wan Man Blong Narafala Kantri Long Ples Ya.”
Hemia i minim “God Blong Mi i Givhan.”