Eksodas 38:1-31

  • Olta blong ofring we i bon fulwan (1-7)

  • Besin long kopa (8)

  • Yad (9-20)

  • Mekem lis blong ol samting we oli yusum blong wokem tabenakel (21-31)

38  Hem i wokem olta blong ofring we i bon fulwan, long wud blong akasia. Olta ya i skwea mo longfala blong hem i faef kiubit,* mo bigfala blong hem i faef kiubit, mo hae blong hem i tri kiubit.+  Biaen hem i wokem wan hon long ol fo kona blong olta ya, mo ol hon ya oli haf blong olta ya, mo hem i blokem olta ya long kopa.+  Biaen hem i wokem ol samting blong yusum long olta ya, hemia ol baket, ol savel, ol bol, ol fok, mo ol faea holda. Evri samting ya hem i wokem long kopa.  Mo tu hem i yusum kopa blong wokem wan bigfala netwaea long olta ya, blong bonem sakrefaes long hem, mo i putum netwaea ya aninit long strap blong olta ya, mo i stat long ples ya go kasem medel blong olta ya.  Mo klosap long bigfala netwaea ya, hem i wokem wan ring long ol fo kona blong olta ya, blong holem ol stik.  Biaen hem i wokem ol stik long wud blong akasia, mo i blokem olgeta long kopa.  Hem i pusum ol stik ya i go insaed long ol ring long tufala saed blong olta ya, blong karem olta ya. Hem i wokem olta ya long ol plang, mo olta ya i olsem wan bigfala bokis we i emti.  Biaen hem i wokem wan besin+ wetem ol leg blong hem long kopa. Blong wokem besin ya, hem i yusum ol mira* blong ol woman we oli stap wok long doa blong tent blong miting.*  Biaen hem i wokem wan yad.+ Long saed i go long saot, hem i hangem ol bigfala kaliko we oli wokem long gudfala tred ya linen we oli wivim tugeta, blong blokem yad ya. Longfala blong kaliko ya hem i 100 kiubit.+ 10  I gat 20 bigfala pos mo 20 stamba ples blong olgeta long kopa. Ol huk blong ol pos ya mo ol joen blong* olgeta, hem i wokem long silva. 11  Mo tu long saed i go long not, i gat ol bigfala kaliko we longfala blong olgeta i 100 kiubit, mo i gat 20 bigfala pos blong hem mo 20 stamba ples blong olgeta we hem i wokem long kopa. Mo ol huk blong pos ya mo ol joen blong* olgeta, hem i wokem long silva. 12  Be long saed i go long wes, longfala blong ol bigfala kaliko i 50 kiubit. Mo i gat ten bigfala pos mo ten stamba ples blong olgeta, mo ol huk blong bigfala pos ya mo ol joen blong* olgeta, hem i wokem long silva. 13  Mo long saed i go long is,* bigfala blong yad ya i 50 kiubit. 14  Long wansaed blong doa blong yad, i gat ol bigfala kaliko we longfala blong olgeta i 15 kiubit, wetem tri bigfala pos mo tri stamba ples blong olgeta. 15  Mo long narasaed long doa blong yad ya, i gat ol bigfala kaliko we longfala blong olgeta i 15 kiubit, wetem tri bigfala pos mo tri stamba ples blong olgeta. 16  Evri bigfala kaliko we oli hangem blong blokem yad ya, oli wokem long linen. 17  Stamba ples blong ol bigfala pos ya hem i wokem long kopa, mo ol huk blong ol pos ya wetem ol joen blong* olgeta, hem i wokem long silva, mo top blong ol pos ya hem i blokem long silva, mo i gat ol samting we hem i wokem long silva we i blong fasem olgeta pos blong yad ya.+ 18  Skrin long doa blong yad ya, hem i wivim long blu tred, pepol wul, tred we i laet red, mo gudfala tred ya linen we oli wivim tugeta. Mo longfala blong hem i 20 kiubit mo hae blong hem i 5 kiubit, hemia i sem mak long hae blong ol bigfala kaliko we oli blokem yad ya.+ 19  Ol fo bigfala pos blong olgeta mo ol fo stamba ples blong olgeta, hem i wokem long kopa. Ol huk blong olgeta mo ol joen blong* olgeta, hem i wokem long silva, mo ol top blong ol pos ya, hem i blokem long silva. 20  Mo ol aean blong holemtaet rop blong tabenakel mo fenis blong yad, hem i wokem long kopa.+ 21  Moses i talem long ol Livaet+ blong oli mekem lis blong ol samting we oli yusum blong wokem tabenakel we bokis blong kontrak i stap long hem,+ mo Itamara+ we i boe blong pris ya Eron, hem nao i lidim wok ya. 22  Mo Bejalehel+ we i boe blong Uri, mo i smol bubu blong Huru long traeb blong Juda, i mekem olgeta samting we Jehova i talem long Moses. 23  Mo Oholiab+ we i boe blong Ahisamak long traeb blong Dan, i givhan long hem. Hem i wan man blong katem pija, somap pija long kaliko, mo wivim kaliko long blu tred, pepol wul, tred we i laet red, mo gudfala tred ya linen. 24  Olgeta gol we oli yusum long evri wok long holi ples, i sem mak long namba blong gol we oli givim olsem wan ofring.*+ Hemia 29 talen* mo 730 sekel* we oli makem folem sekel we oli yusum long holi ples. 25  Mo ol man blong asembli ya we oli rejista, oli givim 100 talen blong silva, mo 1,775 sekel we oli makem folem sekel we oli yusum long holi ples. 26  Evri man we oli gat 20 yia i go antap+ mo we oli rejista, oli givim haf sekel folem sekel we oli yusum long holi ples, mo olgeta evriwan, namba blong olgeta i kasem 603,550 man.+ 27  Oli yusum 100 talen blong silva blong wokem ol stamba ples blong putum ol leg blong ol frem blong tabenakel* mo ol stamba ples blong ol pos we bigfala kaliko* i hang long hem. Oli yusum 100 talen blong silva blong wokem 100 stamba ples, wan talen blong wan stamba ples.+ 28  Hem i yusum 1,775 sekel, blong wokem ol huk blong ol bigfala pos mo blong blokem top blong ol bigfala pos ya, mo i joenem olgeta. 29  Mo kopa we ol man oli givim olsem ofring* i go long God, hem i 70 talen mo 2,400 sekel. 30  Hem i yusum ol kopa ya blong wokem ol stamba ples blong ol pos long doa blong tent blong miting, olta blong bonem sakrefaes wetem netwaea blong hem, mo olgeta samting blong yusum long olta ya, 31  mo ol stamba ples blong ol pos blong yad, mo ol stamba ples blong ol pos blong doa blong yad, mo olgeta aean blong holemtaet rop+ blong tabenakel mo fenis blong yad.

Ol futnot

1 kiubit i sem mak long 44.5 sentimeta. Yu luk Ap. B14.
Mira ya oli wokem long kopa mo oli rabem blong mekem i saengud.
Yu luk Diksonari.
NT: “ol ring, ol rop” blong fasem.
NT: “ol ring, ol rop” blong fasem.
NT: “ol ring, ol rop” blong fasem.
PT: “long saed we san i stap girap long hem.”
NT: “ol ring, ol rop” blong fasem.
NT: “ol ring, ol rop” blong fasem.
NT: “ofring we oli muvum i go i kam.”
1 talen i sem mak long 34.2 kg. Yu luk Ap. B14.
1 sekel i sem mak long 11.4 g. Yu luk Ap. B14.
NT: “holi ples.”
Hemia bigfala kaliko we i blokem Rum We i Tabu We i Tabu.
NT: “ofring we oli muvum i go i kam.”