Zeremin 4:1-31
4 Zoova waan yoo: “Izraɛli, sɛ a sa ɔ sin’n,sɛ a sa ɔ sin min wun’n,yɛ sɛ a yi ɔ amuin mɔ be ti like kain’n min ɲin bo lɛ’n,a su wanndi fiaman kun.+
2 Sɛ a jran nanwlɛ dilɛ’n nin ndɛnman su nantilɛ’n, ɔ nin sa nuan su sɛsɛ yolɛ’n su naan a ta nda se kɛ:‘N kan Zoova m’ɔ lafiman’n,’i liɛ’n i dunman nun ti’n, nvlenvle’m bé yó naan bé ɲán ye,yɛ i dunman nun ti’n, bé dí be nuan.”+
3 Afin Zoova se Zidafuɛ mun nin Zerizalɛmunfuɛ’m be kɛ yoo:“Amun tu asiɛ nga be di su fie-ɔ ɔ yo ye’n i kacɛ,yɛ nán amun lua like owieowie’m be nun kun.+
4 Zidafuɛ mun nin Zerizalɛmunfuɛ mun,amun wla klɛn Zoova dunman nun ti.Yɛ amun yi kplo ng’ɔ kata amun awlɛn’n i wun’n.+Sɛ ɔ timɛn i ti’n, ya dan nga m’an fa’n, ɔ́ júe kɛ sin sa.Yɛ amun sa tɛtɛ’m be ti’n,sran fi su kwlá nuɛnmɛn i.”+
5 Amun bo i ndolo Zida lɔ, yɛ amun bo i jɔ be sin Zerizalɛmun lɔ.Amun kpan, yɛ amun fita awɛ’n nun be sin nvle wunmuan’n nun.+Amun kpan kekle kpa be se kɛ: “Amun e yia-o!Amun e wanndi-o! Maan e ko fia klɔ nga be sisili be wun’n be nun.+
6 Amun kplan nzɔliɛ like kun* naan be wun atin ng’ɔ kɔ Siɔn lɔ’n.Amun kunndɛ fiawlɛ. Nán amun jran kaan sa,”afin ɲrɛnnɛn nga n su fɛ i nglo lɔ lika’n nun n ba’n,+ ɔ yo sro dan.
7 Nvlenvle’m be sacifuɛ’n w’a fa atin’n ɔ su ba.+W’a fite kɛ asɔmɔli kun m’ɔ fin i fiawlɛ’n nun susrɛ’n nun lɔ w’a bo nun’n sa.+Amun nvle’n i sacilɛ tɛtɛ kpa ti yɛ ɔ ba-ɔ.Ɔ́ búbú amun klɔ’m be sekeseke, sran fi su kaman be su.+
8 I sɔ’n ti’n, amun wla bajɛ tralɛ,+yɛ amun sun kɛ b’a bo amun sɛ sa.* Amun sun kekle kpa,afin e wun ya dan nga Zoova fali’n ɔ nin-a wieman.
9 Zoova waan yoo: “Cɛn sɔ’n nun’n, famiɛn’n i awlɛn’n úsu i klun,+sran dandan’m be awlɛn’n úsu be klun wie.*Ɲanmiɛn ɲrun jranfuɛ’m bé úsu sa tututu, yɛ Ɲanmiɛn nuan ijɔfuɛ’m be su siman wie se.”+
10 Yɛ n seli kɛ: “Acuekee! Min Min Zoova, wɔ mɔ a Sie Like Kwlakwla’n, kannzu a lakali nvle nga nunfuɛ mun+ nin Zerizalɛmunfuɛ mun. Ɔ bɔbɔ a seli kɛ: ‘Amún trán fɔundi nun,’+ kusu nn tokofi’n o e konviabo.”*
11 Blɛ sɔ’n nun’n, bé sé sran nga mun nin Zerizalɛmunfuɛ’m be kɛ:“Aunmuan kun m’ɔ lo fiaan’n, ɔ́ fín aawlɛ flɛnnɛn’n nun lɔ ɔ́ bá.Ɔ́ wá fíta min nvle’n i wa bla’n* su.Nán like nun kpajalɛ annzɛ i sanwun yolɛ ti yɛ ɔ ba-ɔ.
12 Min bɔbɔ yɛ m’an sunman aunmuan dan kun naan ɔ fin lika sɔ’m be nun ɔ bla-ɔ.Siɛn’n, ń má bú be fɔ.
13 Amun nian! Ɔ́ bá kɛ ɲanmiɛn ble mɔ i ti yɛ nzue tɔ’n sa.Yɛ i kakaklolo’m be ti kɛ aunmuan dan kun m’ɔ saci like kwlaa’n sa.+I nnɛn kpanngɔ’m be wun kpɛ tra anunman ɲin.+E yako! Afin e liɛ w’a wie.
14 Ee Zerizalɛmun, wunnzin ɔ awlɛn’n nun naan yi klunwi ng’ɔ o nun’n. I liɛ’n, á fíte nun.+?Cɛn onin ko naan w’a yaci akunndan tɛtɛ’m be bulɛ?
15 Afin be bo jasin’n Dan lɔ,+yɛ be bo ɲrɛnnɛn’n i ndolo Efraimun lɔ okaoka’m be su lɔ.
16 Amun kan kle nvlenvle mun.Amun bo sa ng’ɔ́ wá jú Zerizalɛmun su’n i ndolo.”“Klɔ nianfuɛ mun* be fin nvle kun m’ɔ o mmuammua kpa’n i nun be ba.Bé wá kpán kekle kpa Zida klɔ’m be ti.
17 Be o i bue kwlakwla su, be bo sin yiɛ i kɛ be nga be nian fie’m be su’n sa.+Afin ɔ yoli ɲin kekle min su.”+ Zoova yɛ ɔ kan sɔ-ɔ.
18 “Á tánnin ɔ nzuɛn’n nin ɔ ayeliɛ’n be ti kalɛ.+Ɲrɛnnɛn ng’ɔ su tɔ ɔ su’n ɔ timan aɔwi.Afin ɔ wlu lele ɔ ju ɔ awlɛn’n nun lɔ.”
19 Min awlɛn-o,* min awlɛn-o,min awlɛn ba’n yo min ya sa fiaan,min awlɛn ba’n si min klun sa kpukpukpu.N kwlá muanman min nuan.Afin kɛ awɛ’n tɛli’n,kɛ be boli alɛ kunlɛ like’n,* n tili.+
20 É tí-ɔ, be waan ɲrɛnnɛn kun w’a tɔ. É tí i ekun-ɔn, be waan ɲrɛnnɛn kun ekun w’a tɔ.Afin be sacili nvle wunmuan’n sekeseke.Be ɲin mɔ bé bó i bla-ɔ, b’a saci min tannin sua mun.Be ka lɛ be bubuli min tannin sua mun sekeseke.+
21 ?Naan ń wún nzɔliɛ like’n* sa trilili??Naan awɛ’n ɔ́ tɛ́ min su’n nun sa trilili?+
22 “Afin min nvle’n nunfuɛ’m be ti sinnglinfuɛ.+Be nianman min lɔ.Be buman akunndan bɔ kaan sa.Be si sa tɛ yolɛ’n i wun ngwlɛlɛ kpa.Sanngɛ sa ng’ɔ ti kpafuɛ’n, be simɛn i yo.”
23 N niannin nvle’n, i nun ti sa srolo, sran fi nunman nun.+N niannin nglo lɔ, yɛ n wunman kɛ lɔ’n kpaja.+
24 Ń nían-ɔn, okaoka’m be usu sa tututu.Kpɔlɛ’m be kusu, be kejekeje sa.+
25 Ń nían ekun-ɔn, sran ba kun sa nunman lɛ.Yɛ anunman nga be tu sin nglo lɔ’n be kwlaa be ɔli.+
26 Ń nían-ɔn, nvle mɔ i nun’n ti wakawaka ngunmin’n w’a kaci aawlɛ flɛnnɛn.Yɛ be bubuli i klɔ’m be sekeseke.+Zoova ti yɛ be yoli sɔ-ɔ,i ya dan m’ɔ fali’n ti-ɔ.
27 Afin Zoova waan yoo: “Nvle wunmuan’n ɔ́ tɔ́ srolo,+sanngɛ n su nunnunmɛn i wunmuan’n sekeseke.
28 Sa nga ti yɛ sɛ’n tɔ́ nvle’n nun,+mɔ ɲanmiɛn su lɔ’n lú tritritri’n,+yɛle kɛ n kannin, yɛ n fali ajalɛ.N su kaciman akunndan nga n buli’n,* yɛ n su kaciman aniɛn.+
29 Kɛ klɔ’n i nunfuɛ’m be ti nnɛn kpanngɔ su fufuɛ nin ta tofuɛ’m be ngan’n,be kwlaa be wanndi.+Sran’m be ko fia ijre nun,yɛ be fu yɔbuɛ’m be su.+Klɔ’m be kwlaa be tɔli srolo,yɛ sran ba kun sa tranman be su.”
30 ?Siɛn mɔ b’a nunnun wɔ sekeseke’n, á yó i sɛ?Tralɛ ɔkwlɛ bioun yɛ a wlali-ɔ.Yɛ sika ɔkwlɛ ninnge mun yɛ a fa di ɔ talua-ɔ.A fa gale fa trɛtrɛ ɔ ɲinma’n nun.*Sanngɛ talua nga a dili i lɛ’n ti ngbɛn.+Afin be nga be wuli ɔ ti kpo’n be yili ɔ blo.Siɛn’n, kunlɛ yɛ be kunndɛ kɛ bé kún wɔ-ɔ.+
31 N tili sran kun nɛn kɛ bla kun m’ɔ kwlaman nun’n i nɛn’n sa,ɔ ti kɛ bla kun mɔ w’a koto awuliɛ m’ɔ su wa wu i wa klikli’n, i fɛfɛlɛ’n sa.Bla sɔ’n yɛle Siɔn i wa bla m’ɔ lo wunmiɛn-ɔn, ɔ guaman ase’n.Kɛ ɔ́ tínngɛ i sa’n nn ɔ́sé kɛ:+“M’an wu-o! Afin sran kunfuɛ’m be ti’n, m’an fɛ dan.”
Ja ngua lɔ ndɛ mun
^ Annzɛ “waka kun m’ɔ ti nzɔliɛ like’n.”
^ Annzɛ “amun finfin amun wue’n nun.”
^ Annzɛ “be sa sin búbú be.”
^ Annzɛ “tokofi’n w’a to e.”
^ Atrɛkpa’n, aunnvɔɛ silɛ’n i ndɛ yɛ be waan bé kán-ɔn.
^ Yɛle kɛ, be nga be ko nian klɔ mun naan bé sí blɛ ng’ɔ fata kɛ be fa alɛ wla klɔ sɔ’n i nunfuɛ’m be sin’n.
^ Ebr., “Min klun aya’n nin-o.”
^ Be kwla se ekun kɛ “kɛ be kpannin alɛ kunlɛ kpanlɛ’n.”
^ Annzɛ “waka kun m’ɔ ti nzɔliɛ like’n.”
^ Annzɛ “Ɔ su yoman min nsisɔ.”
^ Annzɛ “A fa kpɛ ɔ ɲinma sin.”
