Zeremin 2:1-37
2 Zoova kannin ndɛ kleli min, ɔ seli kɛ:
2 “Kɔ kó sé Zerizalɛmunfuɛ’m be kɛ: ‘Ndɛ nga Zoova kan’n yɛ:“I nun mɔ amun ti kɛ talua sa’n, wafa nga amun fali amun wun mantannin* min’n,+i nun mɔ n trali amun ase’n, wafa nga amun kleli kɛ amun klo min’n, min wla nin-a fiman su.+Wafa nga amun suli min su aawlɛ flɛnnɛnmɔ b’a diman fie wie fi nun’n i nun’n, min wla te kpɛn su.+
3 Blɛ sɔ’n nun’n, nn Izraɛli ti sanwun Zoova ɲrun,+ ɔ ti i fie su ninnge’m be mma klikli’n.”’‘Be kwlaa nga be kunndɛ kɛ bé núnkun i’n, be su fiteman nun.Ɲrɛnnɛn’n tɔ́ be su.’ Zoova yɛ ɔ kan sɔ-ɔ.”+
4 Zakɔbu i osu’n nunfuɛ mun,yɛ Izraɛli nvle’n nun awloboawlobo mun, amun kwlakwla, amun tie ndɛ nga Zoova kan’n.
5 Zoova waan yoo:“?Sa benin yɛ n yoli mɔ amun nannan’m be wunnin i,+mɔ i ti yɛ be wanndili minbe ko sɔli amuin mɔ be ti finfin ninnge,+ mɔ be kusu be kacili kɛ finfinfuɛ sa’n niɔn?+
6 B’a usaman kɛ: ‘?Zoovam’ɔ fali e Ezipti mɛn’n nun lɔ fiteli’n,+m’ɔ fa e sinnin aawlɛ flɛnnɛn’n nun’n,lika sɔ m’ɔ ti srolo,+ m’ɔ ti kunmankunman ngunmin’n,lika sɔ m’ɔ ti kee,+ m’ɔ lu tritritri’n,mɔ sran fi sinman lɔ’nmɔ sran fi tranman lɔ’n, ɔ o nin?’
7 Yɛ n fali amun ɔli asiɛ kpa kun su,naan amun di i su ninnge nin aliɛ kpakpa mun.+Sanngɛ kɛ amun bali’n, amun yoli min lika’n i fiɛn.Amun yoli maan min bɔbɔ min lika’n w’a kaci tete like.+
8 Min ɲrun jranfuɛ’m b’a usaman kɛ: ‘?Zoova o nin?’+Mmla klefuɛ’m b’a siman min,kpɛnngbɛn’m be yoli ɲin kekle min su,+min nuan ijɔfuɛ’m be ijɔli Baali nuan,+be nga be kwlá yoman be ye’n, be su yɛ be suli-ɔ.
9 I sɔ’n ti’n, Zoova waan yoo: ‘Ń má mán amun ndɛ ekun,+yɛ ń má mán amun mma’m be mma liɛ’m be ndɛ.’
10 ‘Sanngɛ amun kpɛ jenvie’n naan amun ju Kitimun’m+ be asa’n su lɔ* naan amun nian.Amun sunman sran Kedaa+ lɔ naan ɔ ko fɛ i ɲin siesu kpa.Amun nian sɛ sa kɛ ngalɛ’n sa’n, i wie w’a ju le-o.
11 ?Nvle benin yɛ ɔ yacili i ɲanmiɛn’m be lɛ ko suli ninnge nga be timan ɲanmiɛn’n niɔn?Sanngɛ min nvle nunfuɛ’m be liɛ’n, be yacili min aɲrunɲan’n i lɛ be ko suli finfin ninnge’m be su.+
12 Ɲanmiɛn m’ɔ la nglo lɔ plaii, nian naan ɔ nuan bo ɔ wun.Maan ɲrɛnnɛn dan kun tɔ ɔ su naan ɔ wun usu ɔ sa tututu.’ Zoova yɛ ɔ kan sɔ-ɔ.
13 ‘Afin min nvle’n nunfuɛ’m be yoli sa tɛtɛ nɲɔn.Min mɔ n ti nzue ti m’ɔ man nguan’n be yacili min lɛ,+be ko yoli* be bɔbɔ be nzue guawlɛ mun,Nzue guawlɛ sɔ’m be tɛtɛli, ɔ maan nzue kwlá jranman be nun.’
14 ‘?Izraɛli ti kanga? ?Annzɛ ɔ ti kanga kun mɔ i min’n i awlo’n nun yɛ be wuli i-ɔ??Yɛ nn, ngue ti yɛ sran’m be wa trɛli i ɔli-ɔ?
15 Asɔmɔli ba’m be kpannin naan srɛ kun i.+Be kpannin kekle kpa.Be sacili i nvle’n mlɔnmlɔnmlɔn.Be wɔli i klɔ’m be nun, ɔ maan sran fi tranman be su kun.
16 Ɔ ti sɛ’n su yɛ Nɔfufuɛ* mun+ nin Tapanɛsifuɛ’m+ be didi-ɔ.
17 ?Nán ɔ bɔbɔ ti yɛ sa sɔ’n juli ɔ su-ɔ?Afin a kpɔcili Zoova m’ɔ ti ɔ Ɲanmiɛn’n,+i nun m’ɔ́ klé wɔ atin naan a fa su’n.
18 ?Ngue ti yɛ ɔ waan á fá Ezipti atin’n niɔn?+?Ngue ti yɛ ɔ waan á kó nɔ́n Siɔɔ* i nun nzue’n niɔn??Ngue ti yɛ ɔ waan á fá Asiri atin’n niɔn?+?Ngue ti yɛ ɔ waan á kó nɔ́n Nzue Ba’n* i nun nzue’n niɔn?
19 Ɔ fata kɛ a fa ɔ klunwi’n tu ɔ wun fɔ,yɛ fa ɔ bɔbɔ ɔ ajalɛ tɛ’n tu ɔ wun fɔ.Nian naan wun i wlɛ kɛ sɛ a kaci ɔ sin siZoova m’ɔ ti ɔ Ɲanmiɛn’n, i sɔ’n ti tɛ yɛ á wún i nuan sa fiaan.+W’a kleman kɛ a sro min kaan sa.’+ Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n yɛ ɔ kan sɔ-ɔ.
20 ‘Afin laa’n min yɛ n bubuli ɔ kɔmin su waka’n nun-ɔn,+min yɛ n kpɛkpɛli jrɔkɔ nga be fa cili wɔ’n nun-ɔn.Sanngɛ a seli kɛ: “N su suman wɔ,”yɛ kpɔlɛ’m be su nin waka kwlaa nga be le nɲa kpanngban’n+be bo yɛ a la bo tekle-ɔ.+
21 Kɛ ń tá wɔ’n, viɲin ɔkwlɛ’n i nun kpafuɛ’n+ yɛ n nian nun n fali-ɔ, fiɛn kaan sa nunmɛn i wun.?Yɛ nn ɔ yo sɛ yɛ maan w’a saci lele mɔ w’a kaci kɛ blo viɲin sama sa min ɲrun-ɔn?’+
22 ‘Kannzɛ bɔbɔ a fa sudu* fa wunnzin lelele’n naan a fa sanmlan kpanngban bɔbɔ’n,min ɲrun’n, ɔ sa tɛ’n yó kɛ fiɛn wie m’ɔ tuman le’n sa.’+ Miɛn Zoova m’ɔ Sie Like Kwlakwla’n yɛ ɔ kan sɔ-ɔ.
23 ?Ɔ yo sɛ ti yɛ a kwla se kɛ: ‘N timan fiɛn,m’an ko sɔman Baali mun’ ɔn?Nian kongo’n nun atin nga a sinnin su’n.Bu like nga a yoli’n i akunndan nian.A ti kɛ ɲɔnngɔnmin talua kun mɔ i wun kpɛ kpam’ɔ wanndi kɔ wa kɔ wa’n sa,
24 a ti kɛ blo aflunmun bla kun m’ɔ tran aawlɛ flɛnnɛn’n nun lɔ titi’n sa,kɛ i like’n ko fu i’n, nn ɔ su siesie i bue’n.?Kɛ ɔ ko fu i sɔ’n, wan yɛ ɔ kwla trɛ i-ɔ?Be nga be kunndɛ i’n, be su kleman be wun yalɛ lele.Kɛ i fulɛ blɛ’n* ko ju’n, saan bé wún i.
25 Nian ɔ wun su, sɛ ɔ timɛn i ti’n, ɔ ja’n ká ngbɛnyɛ nzuewe’n kún wɔ lele ɔ konviabo’n wú kee.Sanngɛ a seli kɛ: ‘Ɔ su yoman ye.+M’an wu aofuɛ’m* beti kpo,+be yɛ ń sú be su-ɔ.’+
26 Kɛ be tra awiefuɛ’n, ɲannzuɛn kun i kpo,i kunngba’n, ɲannzuɛn kunnin Izraɛlifuɛ mun,be nin be famiɛn mun, nin be sran dandan mun,nin be Ɲanmiɛn ɲrun jranfuɛ mun, nin be Ɲanmiɛn nuan ijɔfuɛ mun.+
27 Be se waka kun kɛ: ‘Wɔ yɛ a ti min si’n niɔn,’+yɛ be se yɔbuɛ kun kɛ: ‘Wɔ yɛ a wuli min-ɔn.’Sanngɛ min liɛ’n, be kacili be sin sili min, b’a nianman min lɔ.+Kɛ ɲrɛnnɛn’n wá tɔ́ be su’n, bé sé kɛ:‘Bla wa de e!’+
28 ?Ɔo Zidafuɛ mun, amun amuin nga amun yoli be’n be o nin?+Amun ɲrɛnnɛn blɛ’n nun’n, maan be bla naan be wa de amun-e,afin amun amuin’m be sɔnnin kpanngban kpa kɛ amun klɔ’m be sa.+
29 ‘?Ngue ti yɛ amun man min ndɛ sa trilili-ɔ??Ngue ti yɛ amun kwlakwla amun jasoli min wun-ɔn?’+ Zoova yɛ ɔ usa sɔ-ɔ.
30 N boli amun mma’m be lele ngbɛn.+B’a sɔman fɔ nga n tuli be’n nun.+Amun bɔbɔ amun tokofi’n yɛ ɔ kunnin amun Ɲanmiɛn nuan ijɔfuɛ mun+kɛ asɔmɔli wie m’ɔ su kunndɛ nnɛn di’n sa-ɔ.
31 Ee, ajulisu sran mun, maan amun bu Zoova i nuan ndɛ’n i akunndan.?M’an kaci Izraɛli i ɲrun kɛ aawlɛ flɛnnɛn kun saannzɛ kɛ nvle kun mɔ i nun w’a lu tritri’n sa??Ngue ti yɛ sran nga mun, mɔ be ti min nvle’n nunfuɛ’n, be ijɔ se kɛ: ‘Lika kwlaa nga e klo kɛ é kó wlánwlán lɛ’n yɛ e kɔ-ɔ,e su baman ɔ sin kun’ ɔn?+
32 ?Talua ng’ɔ nin-a siman bian’n i wla kwla fi i talua dilɛ ninnge’m be su??Bla nga w’a ja bian’n, i wla kwla fi tannin sin ng’ɔ fa ci i wue’n nun’n su?*Sanngɛ min nvle nunfuɛ’m be liɛ’n nán andɛ sa yɛ be wla fili min-ɔn.+
33 Mmo bla, bian nga be ko klo wɔ’n, a si be sin atin kpɛ-o!A suannin klunwi yolɛ’n lele w’a si i yo kpa.+
34 Be nga be leman wie’n mɔ b’a yoman sa fi’n, be mmoja’n blo ɔ tralɛ’n i ngua lika’n nun sa biouun,+kusu nn m’an wunman kɛ be su bu ɔ sua’n i lika wie naan bé wlú lɔ.Ɔ tralɛ’n i ngua lika’n ti be mmoja ngunmin.+
35 Sanngɛ a se kɛ: ‘M’an yoman sa fi.Ɔ guali min wun ya ng’ɔ fali’n i ase.’Siɛn’n n su wa tu ɔ fɔafin a se kɛ: ‘M’an yomansa tɛ.’
36 ?Ngue ti yɛ kɛ a kacikaci ajalɛ ndɛndɛ’n, i sɔ’n yoman ɔ like fi-ɔ?Ezipti dunman nun ti’n, ɲannzuɛn wá kún ɔ ekun,+kɛ nga Asiri dunman nun ti’n ɲannzuɛn kunninwɔ’n sa.+
37 Sa sɔ’n i wie ti yɛ kɛ á fíte’n, á fá ɔ sa’n gúa ɔ ti-ɔ,+afin Zoova yili be nga a fali ɔ wla’n guali be su’n be blo.Be su yoman ɔ ye.”
Ja ngua lɔ ndɛ mun
^ Annzɛ “amun kloli.”
^ Annzɛ “be lika nga be o nzue’n i afiɛn lɔ’n.”
^ Annzɛ “be ko sɛli,” atrɛkpa’n yɔbuɛ’m be nun-ɔn.
^ Annzɛ “Mɛnfisifuɛ.”
^ Yɛle kɛ, Efrati.
^ Nili’n i sama kun-ɔn.
^ I wafa’n ti kɛ njin sa.
^ Ebr., “i anglo’n.”
^ Annzɛ “amuin mun.”
^ Cɛn nga be su ja bla kun’n yɛ ɔ fɛ i sɔ like’n ci i wue’n nun-ɔn.
