Zeremin 35:1-19
-
Rekabufuɛ’m be kleli kɛ be ti aɲinyiɛfuɛ (1-19)
35 I nun mɔ Zoziasi i wa Zozakimun+ ti Zida famiɛn’n, Zoova kannin ndɛ kleli Zeremin. Ɔ seli kɛ:
2 “Kɔ ko wun Rekabufuɛ’m+ be wun naan kan ndɛ kle be. Yɛ fa be bla Zoova i sua’n nun naan fa be wlu sua ba nga be di aliɛ lɔ’n* be nun kun nun. Kpɛkun man be duvɛn maan be nɔn.”
3 I sɔ’n ti’n, n ko fali Zeremin m’ɔ ti Abazinia i wa’n i klun ba liɛ Zaazania nin i niaan mun nin i mma’m be kwlakwla ɔ nin Rekabufuɛ’m be kwlaa
4 n ɔli Zoova i sua’n nun lɔ. N fa be wluli Igidalia m’ɔ ti Ɲanmiɛn Kpli i sran’n i wa Anan i mma’m be sua ba nga be di aliɛ lɔ’n nun. Be sua ba sɔ’n mantan sran dandan’m be sua ba nga be di aliɛ lɔ’n. Be kusu be sua ba liɛ’n wo Salɔmun i wa Maazeya m’ɔ ti anuan nun gladi difuɛ’n i sua ba liɛ nga be di aliɛ lɔ’n, i ti su nglo.
5 Kpɛkun n guali klowa mun nin awa’m be nun duvɛn naan m’an fa jinjin Rekabufuɛ’m be ɲrun lɛ. Yɛ n seli be kɛ: “Amun nɔn duvɛn’n.”
6 Sanngɛ be tɛli min su kɛ: “E su nɔnman duvɛn’n. Afin Rekabu i wa Zonadabu+ m’ɔ ti e nannan’n seli e kpongbongbo kɛ: ‘Nán amun bɔbɔ nin amun mma mun be nɔn duvɛn le.
7 Nán amun kplan sua, yɛ nán amun lua like. Nán amun ta viɲin naan se kɛ amún ɲán viɲin fie. Sanngɛ amun tran tannin sua’m be bo tititi. Sɛ amun yo sɔ’n, nvle nga amun ti nun aofuɛ yɛ’n, amún trán nun cɛ́ kpa.’
8 Ndɛ sɔ mɔ e nannan Rekabu i wa Zonadabu kan kleli e’n, i su yɛ andɛ nin andɛ’n e te di-ɔ. E bɔbɔ-o, e yi mun-o, e mma yasua mun-o, e mma bla mun-o, e nun wie fi e nɔnman duvɛn.
9 E kplanman sua e tranman nun, e leman viɲin fie, yɛ e diman fie naan se kɛ é lúa like.
10 Tannin sua’m be bo yɛ e te tran-ɔn. Ndɛ nga e nannan Zonadabu kannin’n i su yɛ e te di-ɔ.
11 Sanngɛ kɛ Nebikadnezaa* m’ɔ ti Babilɔnin famiɛn’n bali kɛ ɔ nin nvlefuɛ’m bé kún’n,+ e seli e wun kɛ: ‘Maan e wlu Zerizalɛmun lɔ ke, naan e ɲan e ti Kaldefuɛ mun nin Sirifuɛ’m be sonja’m be sa nun.’ Yɛ kɛ ɔ fɛ i lɛ’n Zerizalɛmun wa yɛ e tran-ɔn.”
12 Yɛ Zoova kannin ndɛ kleli Zeremin-ɔn. Ɔ seli i kɛ:
13 “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Kɔ ko se Zidafuɛ mun nin Zerizalɛmunfuɛ’m be kɛ: “?M’an seman amun titi kɛ amun nian ndɛ nga n kan kle amun’n su be nanti?”+ Zoova yɛ ɔ usa sɔ-ɔ.
14 “Rekabu i wa Zonadabu seli i osu’n nunfuɛ’m be kɛ nán maan be nɔn duvɛn, yɛ be fali ndɛ ng’ɔ kan kleli be’n su. Andɛ nin andɛ’n, be nɔnman duvɛn. Be te nanti be nannan’n i nuan ndɛ’n su.+ Sanngɛ amun liɛ’n, m’an kan ndɛ m’an kle amun lele* ngbɛn. Amun faman su.+
15 Yɛ n sunmannin min sufuɛ nga be ti min nuan ijɔfuɛ’n amun sin kpɛ sunman. N sunmannin be lelele*+ naan be se amun kɛ: ‘Amun yaci, amun kwlakwla amun wla amun nzuɛn tɛ’n i ase+ naan amun yo sa ng’ɔ ti kpa’n. Nán amun su amuin’m be su, yɛ nán amun sɔ be. I liɛ’n, amún trán nvle nga n fa mannin amun nin amun nannan mun’n i nun tititi.’+ Sanngɛ amun a sieman amun su naan se kɛ amún tíe.
16 Rekabu i wa Zonadabu i osu’n nunfuɛ’m be nantili be nannan’n i nuan ndɛ’n su.+ Sanngɛ sran nga’m be liɛ’n, b’a sieman be su min nuan bo.”’”
17 “I sɔ’n ti’n, Zoova, Ɲanmiɛn m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Ɲrɛnnɛn kwlaa nga n kɛnnin i ndɛ n kleli amun’n, ń má fá yí Zidafuɛ mun nin Zerizalɛmunfuɛ’m be kwlaa be su.+ Afin n kannin ndɛ n kleli be sanngɛ b’a faman su. N flɛli be lelele sanngɛ b’a tɛman su.’”+
18 Yɛ Zeremin seli Rekabufuɛ’m be awlobo’n kɛ: “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Amun nantili amun nannan Zonadabu i nuan ndɛ’n su. Yɛ like kwlaa ng’ɔ seli amun kɛ amun yo’n, andɛ nin andɛ amun nian su sɛsɛsɛ be yo. I sɔ’n ti’n,
19 Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Min sufuɛ trán Rekabu i wa Zonadabu i osu’n nun tititi.”’”
Ja ngua lɔ ndɛ mun
^ Annzɛ “sua ba mun.”
^ Annzɛ “Nebikadrezaa.” I klɛlɛ wafa kun ekun-ɔn.
^ Ebr., “n jaso nglɛmun ndɛ kpa’n n kan ndɛ.”
^ Ebr., “N jasoli nglɛmun ndɛ kpa’n n sunmannin be.”
