Zeremin 1:1-19
1 Bɛnzamɛn akpasua’n su lɔ klɔ nga be flɛ i kɛ Anatɔtu’n+ i su lɔ Ɲanmiɛn ɲrun jranfuɛ kun mɔ be flɛ i kɛ Ilkia’n, i wa Zeremin i ndɛ ng’ɔ kannin’n yɛ.
2 Kɛ Amɔn+ i wa Zoziasi+ yoli Zida famiɛn’n, i afuɛ blu-nin-nsan (13) su’n yɛ Zoova kan ndɛ kleli i-ɔ.
3 Zoziasi i wa Zozakimun+ m’ɔ ti Zida famiɛn’n i blɛ su’n lele mɔ Zoziasi i wa Sedesiasi+ m’ɔ ti Zida famiɛn’n i famiɛn dilɛ’n i afuɛ blu-nin-kun (11) su’n fá wíe’n, mɔ bé trá Zerizalɛmunfuɛ’m bé kɔ́’n, i anglo nnun’n su’n,+ ɔ kan ndɛ kleli i ekun.
4 Zoova kan ndɛ kleli min. Ɔ seli min kɛ:
5 “N si wɔ* kwlaa naan m’an siesie wɔ ɔ nin i ku sɛ’n nun,+yɛ n yoli ɔ sanwun* kwlaa naan b’a wu wɔ.*+N fali wɔ kɛ a ijɔ min nuan kle nvlenvle mun.”
6 Sanngɛ n seli kɛ: “Ee, min Min Zoova, wɔ mɔ a Sie Like Kwlakwla’n,n siman ijɔ,+ afin n te yo bakan.”*+
7 Yɛ Zoova seli min kɛ:“Nán se kɛ: ‘N te yo bakan.’Afin ɔ fata kɛ a wɔ naan a ko to be kwlaa nga ń má súnman wɔ be sin’nnaan a ko kan ndɛ kwlaa nga ń fá wlá ɔ nuan’nkle be.+
8 Nán wafa nga be ti’n ɔ kun wɔ srɛ,+afin ‘n jin ɔ sin, yɛ ń dé wɔ.’+ Ndɛ nga Zoova kan’n yɛ ɔ o lɛ-ɔ.”
9 Yɛ Zoova tinngɛli i sa’n nun ɔ fa kannin min nuan’n niɔn.+ Kpɛkun Zoova seli min kɛ: “M’an fa min ndɛ’n m’an wla ɔ nuan.+
10 Nian, andɛ’n m’an fa wɔ m’an sie nvlenvle mun nin famiɛn diwlɛ’m be su naan a tu ng’ɔ nin bo tulɛ fata’n i bo, naan a bu ng’ɔ nin bulɛ fata’n, naan a nunnun ng’ɔ nin nunnunlɛ fata’n, naan a saci ng’ɔ nin sacilɛ’n fata’n, naan a kplan ng’ɔ nin kplanlɛ’n fata’n, naan a ta ng’ɔ nin talɛ fata’n.”+
11 Zoova kan ndɛ kleli min ekun. Ɔ usali min kɛ: “?Zeremin, ngue yɛ a wun i-ɔ?” N tɛli i su kɛ: “N wun amandie sama kun.”*
12 Yɛ Zoova seli min kɛ: “Like nga a wunnin i lɛ’n i su-ɔ. Afin min ndɛ mɔ ń má yíɛ i nuan’n ti’n, min ɲin o su.”
13 Kɛ Zoova kán ndɛ klé min i kpɛ nɲɔn su’n, ɔ usali min kɛ: “?Ngue yɛ a wun i-ɔ?” N tɛli i su kɛ: “N wun blalɛ sɛ kun.* Yɛ like ng’ɔ o nun’n, ɔ tu kpuyɔkpuyɔ.* Yɛ i nuan’n ti ciawa, ɔ fɛ i nglo lɔ fa jra ngua.”
14 Yɛ Zoova seli min kɛ:“Ɲrɛnnɛn ng’ɔ́ wá tɔ́ nvle’n nunfuɛ’m be kwlaa be su’n,ɔ́ fín nglo lɔ lika’n nun.+
15 Afin ndɛ nga Zoova kan’n yɛ: ‘M’an yia famiɛn nga be o nglo lɔ lika’n nun’n be awloboawlobo’m be kwlaa.+Yɛ bé bá. Be famiɛn’m bé fá be famiɛn bia mun sɛsɛsɛbé wá síe i Zerizalɛmun klɔ’n i anuan’m be wun.+Bé fá síe i talɛ’m be wun tɛɛn bé sín yía nun,ɔ nin Zida klɔ’m be kwlaa be wun.+
16 Klunwi kwlaa nga be yoli’n ti’n, fɔ nga n buli be’n, ń má kán klé be.Afin be kacili be sinsili min,+yɛ be yra like fa man be amuin mun.*+Kpɛkun be koto ninnge nga be bɔbɔ be yoli be’n be bo be sɔ be.’+
17 Sanngɛ ɔ liɛ’n, buabua ɔ wun sie.*Jaso naan ndɛ nga ń má fá wlá ɔ nuan’n, ko kɛn i kwlaa kle be.Nán sro be.+Sɛ w’a yoman sɔ’n, ń yó maan á úsu sa tututu be ɲrun lɛ.
18 Afin kɛ ɔ fɛ i andɛ’n, ń má yó maan á káci kɛ klɔ dan wie mɔ b’a sisi i wun’n sa.Á káci kɛ blalɛ mlomlo kun sa, á káci kɛ aaba talɛ mun sa.+I liɛ’n, á jrán nvle wunmuan’n nin Zida lɔ famiɛn mun nin lɔ sran dandan mun,nin Ɲanmiɛn ɲrun jranfuɛ mun nin nvle’n nunfuɛ’m be kwlaa be ɲrun kekle.+
19 Be nin wɔ bé kún,sanngɛ be su kwlaman wɔ.Afin Zoova waan yoo: ‘N jin ɔ sin,+ yɛ ń dé wɔ.’”
Ja ngua lɔ ndɛ mun
^ Annzɛ “n sieli wɔ ngunmin.”
^ Ebr., “kwlaa naan w’a fin ɔ nin i ku sɛ’n nun w’a fite.”
^ Annzɛ “N kpali wɔ.”
^ Annzɛ “n ti gbanflɛn kan.”
^ Ebr., “sran ng’ɔ su tinnge’n.”
^ Annzɛ “blalɛ sɛ kun mɔ i nuan’n ti gbawun’n.”
^ Ebr., “blalɛ sɛ kun mɔ be fita su’n,” yɛle kɛ blalɛ sɛ kun m’ɔ jin sin kun mɔ be su fita nun’n su’n.
^ Annzɛ “be yra like naan sin wunsrɛn’n fu wɔ nglo.”
^ Ebr., “ci ɔ bo.”
