Zeremin 19:1-15
19 Zoova waan yoo: “Kɔ sɛ wufuɛ’n i sin naan to nzue sɛ kun mɔ ufa nga be tɔnnin’n yɛ be fa yoli’n.+ Fa nvle’n nun kpɛnngbɛn wie mun nin Ɲanmiɛn ɲrun jranfuɛ’m be kpɛnngbɛn wie mun bla
2 naan kɔ Inɔmun i Wa’n i Kongo’n+ nun lɔ, Sɛ Buebue’m be Anuan’n nun lɔ. Kɛ a ju lɔ’n, kan ndɛ nga ń má kán klé wɔ yɛ’n kle be.
3 Se be kɛ: ‘Zida famiɛn mun nin Zerizalɛmunfuɛ mun, amun tie ndɛ nga Zoova kan’n. Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n i waan yoo:
“‘“N su wa fa ɲrɛnnɛn kun ń yí i lika nga nun wa. Yɛ be kwlaa nga bé wá tí’n bé bó bli.*
4 Kɛ mɔ be kacili be sin sili min’n,+ mɔ be yoli lika nga i sukusuku’n ti-ɔ.+ Be yi tɛ be man amuin mun lika nga nun wa. Kusu nn be bɔbɔ-o, be nannan mun-o, Zida famiɛn mun-o, be nun wie fi siman amuin sɔ mun laa. Be guali be nga b’a yoman sa fi’n be mmoja’n i ase lele ɔ yili lika nga sa piɛ.+
5 Be kplannin Baali i lika nglonglo mun naan bé yrá be mma’m bé fá yí tɛ nga kɛ bé yí’n be yra nnɛn’n i kɔlikɔli’n mán Baali.+ Kusu nn m’an seman be kɛ be yo sɔ. Yɛ e nin be y’a kɛnmɛn i sɔ ndɛ. Yɛ i sɔ akunndan nin-a baman min ti* nun le bɔbɔ.”’+
6 “‘Zoova waan yoo: “I sɔ’n ti’n, amun nian! Cɛn wie lele’n be su flɛman lika nga kɛ Tofɛti annzɛ Inɔmun i Wa’n i Kongo kun. Sanngɛ bé flɛ́ i kɛ Sran Kunlɛ Kongo.+
7 Ń yó naan like nga Zidafuɛ mun nin Zerizalɛmunfuɛ’m be guguli kɛ bé yó i lika nga nun wa’n, i kwlaa ɔ kpi ase. Ń fá be mán be kpɔfuɛ mun naan be fa tokofi be kun be. Yɛ ń fá be wlá be nga be kunndɛ kɛ bé kún be’n be sa nun. Yɛ ń fá be fuɛn’n ń mán anunman mun nin blo nnɛn mun naan be di.+
8 Sa nga ń má fá yí klɔ nga su’n ɔ́ yó ɲrɛnnɛn dan ti’n, bé bó feliman bé fá yó be finfin. Be kwlaa nga bé sín lɛ mɔ bé wún ɲrɛnnɛn sɔ’n be nuan’n bó be wun. Yɛ sa ng’ɔ́ wá tɔ́ i su’n ti’n bé bó feliman bé fá yó be finfin.+
9 Ń yó maan bé dí be bɔbɔ be mma yasua mun nin be mma bla mun be nnɛn ba’n. Sran kun jáso ɔ́ dí i wiengu klɔ sran’n i nnɛn ba’n. Afin bé útu klɔ’n, yɛ awlabɔɛ’n yó dan. Yɛ be su wunman kun nga be o nun-ɔn. Be kpɔfuɛ mun nin be nga be kunndɛ kɛ bé kún be’n, bé bó sín yía be.”’+
10 “Kpɛkun bo nzue sɛ’n be nga be nin wɔ bé kɔ́’n, be ɲrun lɛ.
11 Yɛ se be kɛ: ‘Zoova m’ɔ ti sonja’m be su kpɛn’n i waan yoo: “Kɛ nga sran kun fa kpuke nzue sɛ mɔ sɛ wufuɛ’n wuli’n nun mɔ be kwlá siesiemɛn i ye kun’n sa’n, ń má kpúke sran nga mun nin klɔ nga be nun. Kpɛkun bé síe be nga be wuli’n Tofɛti lɔ lele be su ɲanman lika naan b’a sie be kun.”’+
12 “Zoova waan yoo: ‘Kɛ ń má yó klɔ nga nin i su sran mun kɛ ngalɛ’n sa naan klɔ nga kaci kɛ Tofɛti sa.
13 Yɛ Zerizalɛmun lɔ sua mun nin Zida famiɛn’m be sua mun bé yó fiɛn kɛ lika nga sa, yɛle kɛ Tofɛti sa.+ Sua nga be ti su lɔ yɛ be yi tɛ fa man ɲanmiɛn su lɔ sonja’m be kwlaa’n,+ mɔ be gua nzan fa man be amuin mun’n, be kwlaa bé yó kɛ ngalɛ’n sa.’”+
14 Kɛ Zoova sunmannin Zeremin Tofɛti lɔ kɛ ɔ ko kɛn i nuan ndɛ’n, m’ɔ sɛli i sin’n, ɔ ko jrannin Zoova i sua’n i awlo’n i klun lɛ kpɛkun ɔ seli sran’m be kwlaa be kɛ:
15 “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n i waan yoo: ‘Ɲrɛnnɛn kwlaa nga n kannin be ndɛ’n, n su fa be n yi i klɔ nga ɔ nin i asa’n su klɔ’m be kwlaa be su. Afin be ɲin su ti kekle. Be waan* be nantiman min nuan ndɛ’n su.’”+
Ja ngua lɔ ndɛ mun
^ Ebr., “ɔ́ tɛ́ be su’n nun sa wuu.”
^ Ebr., “min awlɛn’n.”
^ Ebr., “Be kete be kɔmin naan.”
