Zeremin 10:1-25
10 Izraɛlifuɛ mun, amun sie amun su be tie fɔ nga Zoova bu amun’n.
2 Zoova waan yoo:“Nán amun fa nvle onga’m be nzuɛn’n,+nán amun nian kɛ nvle ngalɛ’m be sro nzɔliɛ nga be fite ɲanmiɛn su lɔ’n ti’n,amún sró be wie.+
3 Afin nvle sɔ’m be nzuɛn’n ti finfin like.Be ko kpɛ waka bo’n nun lɔ,kpɛkun ajuin difuɛ’n fa like wie* fa sɛ.+
4 Be fa sika nin sika ɔkwlɛ be fa yo i klanman bɔ cɛ+kpɛkun be fa maato nin kpɛngbɛ be fa trɛ i ase naan w’a tɔman.+
5 Kɛ like nga be fa sie i kɔnkɔnblu fie’m be nun mɔ be fa fuan anunman mun sa’n, amuin sɔ’m be kwlá ijɔman.+Sran yɛ ɔ sua be-ɔ, afin be kwlá nantiman.+Nán amun sro be, afin be kwlá yoman amun tɛ,yɛ be kwlá yoman amun kpa.”+
6 Zoova, sran fi nin wɔ sɛman.+A ti dan, yɛ ɔ dunman’n ti dan, kpɛkun ɔ tinmin’n cɛnnin.
7 ?Ee, nvlenvle’m be Famiɛn,+ ɔ fataman kɛ e kwlaa e sro wɔ? A nin i sɔ’n fata kpa.Afin nvlenvle’m be nun ngwlɛlɛfuɛ’m be kwlaa be nun’n, nin famiɛn diwlɛ’m be kwlaa be nun’n,sran fi nin wɔ sɛman.+
8 Be kwlaa be ti sinnglinfuɛ, be buman akunndan.+Kɛ be fa be wun be man waka naan ɔ kle be like’n, i sɔ’n ti be wun yalɛ klelɛ ngbɛn.*+
9 Be ko fa sika fɛtɛfɛtɛ Tarsi lɔ,+ ɔ nin sika ɔkwlɛ Ufazi lɔ.Sran kun m’ɔ ti ajuin dinfuɛ’n, m’ɔ ti blalɛ bofuɛ’n yɛ ɔ dili be wun junman-ɔn.Be fali jese ble nin jese ɔkwlɛ kankan be fa yoli tralɛ be wlɛli i amuin sɔ’m be wun.Be nga be si be junman’n i di kpa’n, be yɛ be yoli amuin sɔ mun-ɔn.
10 Sanngɛ Zoova liɛ’n, ɔ ti Ɲanmiɛn sakpasakpa.Ɔ ti Ɲanmiɛn kun m’ɔ lafiman-ɔn,+ yɛ ɔ ti Famiɛn kun m’ɔ o lɛ tititi-ɔ.+Ya ng’ɔ fali’n ti’n, asiɛ’n kéje,+yɛ nvle wie fi kwlá jranman ya ng’ɔ fali’n i ɲrun.
11 * Amun se be kɛ yoo:“Amuin mɔ nán be yɛ be yili ɲanmiɛn m’ɔ la nglo lɔ plaii’n nin asiɛ’nbé núnnún asiɛ’n su nin ɲanmiɛn nga i bo wa sekeseke.”+
12 I yɛ ɔ fɛli i tinmin’n yili asiɛ’n niɔn,i yɛ ɔ fɛli i ngwlɛlɛ’n fa siesieli asiɛ m’ɔ yo like ye’n niɔn.+Kpɛkun i yɛ ɔ fali akunndan m’ɔ si i’n fa trɛli ɲanmiɛn m’ɔ la nglo lɔ plaii’n nun-ɔn.+
13 Kɛ ɔ yo maan i nɛn’n tɛ sa’n,nzue nga be o ɲanmiɛn su lɔ’n be kejekeje,+yɛ ɔ fa ɲanmiɛn ble’n* asiɛ’n i tiwatiwa’m be su fa fu nglo.+Ɔ yo maan kɛ nzue’n tɔ́’n, ɲanmiɛn’n kpa sin piapia*yɛ ɔ fa aunmuan’n i tanngannin’m be nun fite.+
14 Sran’m be kwlaa be yo ninnge mun kɛ ngwlɛlɛ’n timan be sa, be siman sa.Amuin ba nga blalɛ bofuɛ’n yoli’n ti’n, i ɲin gúa ase.+Afin i amuin ba ng’ɔ fali blalɛ* yoli’n ɔ ti ngbɛn,wunmiɛn* ba kun sa nunman be nun.+
15 Ninnge sɔ’m be ti finfin like, be nin finfin yolɛ fata.+Cɛn nga bé wá mán be ndɛ’n, bé núnnún sekeseke.
16 Zakɔbu i Sran ng’ɔ le i’n* timan kɛ ninnge sɔ’m be sa,afin i yɛ ɔ yili like kwlaa-ɔ,yɛ Izraɛli ti i aja dilɛ kpɔnman’n.+I dunman’n yɛle Zoova m’ɔ ti sonja’m be su kpɛn’n.+
17 Mmo bla, wɔ mɔ b’a utu wɔ’n,man ɔ bɔlɛ ng’ɔ nannan asiɛ wun lɛ’n su.
18 Afin Zoova waan yoo:“Andɛ liɛ’n, ń fínndin* sran nga mun ń gúa be nvle’n i sin lɔ,+yɛ ń yó maan be wla bó be wun lelele.”
19 Ee, n wo afɛ nun-o! Afin n kpinndinman.*+Min kannin’n leman ayre.Yɛ n seli kɛ: “Nanwlɛ, min tukpacɛ’n yɛ ɔ o lɛ-ɔ, yɛ ɔ fata kɛ n sɔ nun.
20 Min tannin sua’n w’a bubu mlɔnmlɔn, i ɲanman’m be kwlaa b’a kpɛkpɛ.+Min mma’m b’a wanndi min, be nunman lɛ kun.+Sran fi nunman lɛ naan w’a kplan min tannin sua’n annzɛ w’a siesie min tannin sua’n i tannin mun.
21 Afin bua kankanfuɛ’m be yoli kɛ sran wie mɔ ngwlɛlɛ’n timan be’n sa,+yɛ b’a usaman Zoova i sa.+I sɔ’n ti yɛ b’a faman akunndan b’a nantiman-ɔn,ɔ maan be nnɛn’m be kwlaa be bo sanndili.”+
22 Sie ɔ su tie, nganniɛn kun su tɛ ba.Sa ng’ɔ klu ba’n, ɔ fin nvle’n i nglo lɔ lika’n nun.+Ɔ́ wá yó maan Zida klɔ’m bé tɔ́ srolo, bé káci blo alua’m be lawlɛ.+
23 Ee Zoova, n si kpa kɛ klɔ sran i ngunmin kwlá wunman atin ng’ɔ fata kɛ ɔ fa’n.Klɔ sran m’ɔ su nanti’n, nɛ́n i bɔbɔ yɛ ɔ fata kɛ ɔ kle i ja’n i atin-ɔn.+
24 Ee Zoova, nian ɔ sa nuan su sɛsɛ mɔ a yo’n su tu min fɔ,sanngɛ nán yo i ya su,+ ɔ timɛn i ti’n á núnkun min mlɔnmlɔn.+
25 Fa ɔ ya’n guɛ i nvle nga be buman ɔ wie’n+nin akpasua nga be boman ɔ dunman’n be su.Afin be nunkunnin Zakɔbu,+be nunkunnin i lele be wunmɛn i osu kun,+be nunnunnin i mlɔnmlɔnmlɔn.+
Ja ngua lɔ ndɛ mun
^ Annzɛ “bese.”
^ Annzɛ “finfin like.”
^ I klikli’n nun’n, be klɛli ndɛ mma 11 Aramun aniɛn’n nun.
^ Be kwla se ekun kɛ “Ɔ yi nzue’n i sinwlɛ.”
^ Annzɛ “ɔ fa kpukpuwa’n.”
^ Annzɛ “ng’ɔ kloli blalɛ.”
^ Annzɛ “nguan.”
^ Yɛle kɛ, aja like ng’ɔ ɲɛnnin i’n.
^ Annzɛ “ń fá kpafloko ń fínndin.”
^ Annzɛ “min lika wie w’a bu.”
