Zeremin 20:1-18
20 Kɛ Zeremin kán Ɲanmiɛn i nuan ndɛ sɔ mun’n, nn Imɛɛ i wa Pasii m’ɔ ti Ɲanmiɛn ɲrun jranfuɛ’n, mɔ i kunngba’n ti Zoova i sua’n i sunianfuɛ’m be su kpɛn’n, ɔ o lɛ wie, ɔ tili.
2 Kpɛkun Pasii boli Zeremin m’ɔ ti Ɲanmiɛn nuan ijɔfuɛ’n, naan w’a bo i kpanwun+ Bɛnzamɛn Anuan Nglonglo’n i bue liɛ’n su lɔ. Lɔ yɛ be sin be kɔ Zoova i sua’n nun lɔ-ɔ.
3 Sanngɛ kɛ aliɛ cɛnnin’n, Pasii yacili Zeremin nun. Kpɛkun Zeremin seli i kɛ:
“Zoova w’a tɔnman ɔ dunman kɛ Pasii. Sanngɛ ɔ tɔnnin ɔ dunman kɛ Ɲrɛnnɛn o Bue Kwlaa Su.+
4 Afin Zoova waan yoo: ‘Ɲrɛnnɛn nga ń má fá yí ɔ su’n ti’n, srɛ dan kpa kún ɔ bɔbɔ nin ɔ janvuɛ’m be kwlaa. Be kpɔfuɛ’m bé fá tokofi kún be ɔ ɲin bo lɛ.+ Ń fá Zidafuɛ’m be kwlaa ń wlá Babilɔnin famiɛn’n i sa nun. Ɔ́ trá be kɔ́ Babilɔnin, kpɛkun ɔ́ fá tokofi kún be.+
5 Yɛ ń fá klɔ nga i nun aɲanbeun ninnge’m be kwlaa, nin ninnge kpakpa’m be kwlaa, nin ninnge nga be le ɲrun’n be kwlaa, nin Zida famiɛn’m be ninnge kpakpa’m be kwlaa ń mán be kpɔfuɛ mun.+ Bé ísa be bo ninnge’m be kwlaa kɔ́ Babilɔnin.+
6 Yɛ wɔ Pasii, a nin be kwlaa nga be tran ɔ awlo’n nun’n, bé trá amun bé kɔ́. Bé fá wɔ kɔ́ Babilɔnin, yɛ á wú lɔ. Lɔ yɛ bé síe wɔ nin ɔ janvuɛ’m be kwlaa-ɔ. Afin a kannin ato ndɛ kleli be.’”+
7 Ee Zoova, a lakali min yɛ n fali su.A fali ɔ wunmiɛn’n tinnin min su lele a kwlali min.+Aliɛ ba kwlaa nun’n be sri min.Sran’m be kwlaa be fa min yi aɲinsuɛ.+
8 Afin kɛ ń kán ndɛ aliɛ ba kwlaa nun’n, n kpan se kɛ:“Nzaje sa nin ninnge’m be sacilɛ!”Afin Zoova i nuan ndɛ’n ti’n, sran’m be kpɛ min nzowa, yɛ be yo min finfin aliɛ ba kwlaa nun.+
9 I sɔ’n ti’n, n seli kɛ: “N su kɛnmɛn i ndɛ kun,yɛ n su ijɔmɛn i nuan kun.”+Sanngɛ i nuan ndɛ’n yoli kɛ sin dan wie sa min awlɛn’n nun lɔ, ɔ yoli kɛ sin dan wie sa min owie’m be nun lɔ.Ɔ maan n tran-ɔn, ɔ tranman.N kwlá muanman min nuan’n su.+
10 Afin n ti min wun ndɛ tɛtɛ nga be kan’n.Ɲrɛnnɛn dan kpa o min su.+“Amun yiyi i bo! Maan e yiyi i bo!”Be kwlaa nga be wun min-ɔn be bo muae man min’n, kannzu be kunndɛ kɛ n tɔ. Be se kɛ:+“Atrɛkpa’n, ɔ́ wá yó sa tɛ wie,kpɛkun é trɛ́ i, yɛ é tú e klunngbɔ’n i su.”
11 Sanngɛ Zoova liɛ’n, ɔ jin min sin kɛ safuɲrɛn sroesroe kun sa.+I sɔ’n ti’n, be nga be kle min yalɛ’n be su ɲanman jranwlɛ, bé tɔ́.+Ɲannzuɛn dan kpa kún be, afin like nga be guguli kɛ bé yó’n ɔ́ kpí ase.Bé wún ɲannzuɛn sɔ tititi, yɛ be wla su fiman su le.+
12 Sanngɛ Zoova, wɔ mɔ a ti sonja’m be su kpɛn’n, ɔ liɛ’n, a niannian sran ng’ɔ ti kpa’n.A niɛnniɛn i klun akunndan ng’ɔ ti fiawa kpa’n* ɔ nin i awlɛn’n nun.+Kɛ á wá tú ɔ klunngbɔ’n be su’n, yo maan ɔ yo min ɲrun,+afin n fali min ndɛ liɛ’n n wlali ɔ sa nun.+
13 Amun to jue be manman Zoova, amun manman Zoova!Afin ɔ deli yalɛfuɛ’n sa tɛ yofuɛ’m be sa nun.
14 Maan be bo cɛn nga i nun yɛ be wuli min’n i sannzan.Yɛ nán be bo muae be man cɛn nga i nun yɛ min nin wuli min’n.+
15 Sran ng’ɔ wa boli jasin fɛ’n kleli min si’n kɛ:“W’a wu ba kun, ba yasua-ɔ!”Mɔ i ti’n, min si’n dili aklunjɔɛ dan’n, nán maan ɔ ɲan muae le.
16 Maan sran sɔ’n ɔ yo kɛ klɔ nga Zoova sacili be mɔ w’a yomɛn i nsisɔ’n sa.Nglɛmun nun’n maan ɔ ti sran’m be kpankpanlɛ’n, yɛ mindi su’n maan ɔ ti alɛ kunlɛ kpanlɛ.
17 ?I nun mɔ n wo min nin i ku sɛ’n nun’n, ngue ti yɛ b’a kunman min,naan min nin i ku sɛ’n w’a kaciman min asieliɛ,naan w’a kaman wunnzɛfuɛ sa titi-ɔ?+
18 ?Sɛ ɲrɛnnɛn’n nin afɛ’nnin ɲannzuɛn’n yɛ n ko wun i sa trilili’n,nn ngue ti yɛ n fin min nin i ku sɛ’n nun n fiteli-ɔ?+
Ja ngua lɔ ndɛ mun
^ Annzɛ “wafa nga sran’n i wun yo i’n.” Ebr., “i aklɛnzia mun.”
