Zeremin 31:1-40
31 Zoova waan yoo: “Blɛ sɔ’n nun’n, ń yó Izraɛli lɔ awloboawlobo’m be kwlakwla be Ɲanmiɛn. Yɛ be kusu bé yó min nvle.”+
2 Zoova waan yoo:“Sran nga be fin alɛ’n* nun be fiteli’n, n bɔbɔ n sili be aunnvɔɛ aawlɛ flɛnnɛn’n nun lɔ.Kɛ ɔ́ yó sɔ’n, nn Izraɛli su nanti kɔ i wunmiɛn lolɛ lika’n nun lɔ.”
3 I nun mɔ n wo mmua lɔ’n, Zoova fiteli min ɲrun, kpɛkun ɔ seli kɛ:“Klolɛ nga n fa kloli wɔ’n su wieman le.Yɛ klolɛ mɔ n klo wɔ dan’n ti yɛ n cuɛnnin wɔ n bali min wun-ɔn.*+
4 Asa ekun’n, ń má kplán ɔ uflɛ, yɛ á sá ɔ sin á káci kɛ laa’n sa.+Izraɛli, wɔ mɔ a ti kɛ talua m’ɔ nin-a siman bian’n sa’n, á wá fá ɔ klɛn mun kɛ laa’n sa.Kpɛkun kɛ á fíte kɔ́’n, á sí able aklunjɔɛ’n nun.*+
5 Á wá tá viɲin Samari lɔ oka’m be su ekun.+Fie difuɛ’m bé wá tá viɲin, kpɛkun bé dí i su mma.+
6 Cɛn wie lele’n gladi difuɛ nga be o Efraimun lɔ oka’m be su’n, bé kpán bé sé kɛ:‘Amun jaso maan e wɔ Siɔn, Zoova m’ɔ ti e Ɲanmiɛn’n i wun lɔ.’”+
7 Zoova waan yoo:“Amun bo sro man Zakɔbu.Amun kpan aklunjɔɛ kpanlɛ afin amun o nvle’m beti su.+Amun bo i jɔ, amun manman Ɲanmiɛn, yɛ amun se kɛ:‘Ee Zoova, de ɔ sran mun, yɛle kɛ Izraɛlifuɛ nga be kali lɛ’n.’+
8 Ń má kó fá be nvle ng’ɔ o nglo lɔ lika’n nun’n ń bá.+Ń má kó yíayía be mmuammua kpa.+I aɲinsifuɛ-o, i sran nga i ja’n timan kpa-o,+i wunnzɛfuɛ-o, i bla ng’ɔ su wu ba-o, ń yíayía be kwlaa.Kɛ bé wá sá be sin wa’n, bé sɔ́n kpanngban kpa.+
9 Bé sún yɛ bé bá-ɔ.+Bé kpáta min, yɛ n kusu ń klé be atin.Ń fá be ń kɔ́ nzue ba’m be nuan,+atin nga be timan kunngblokunngblo’n mɔ be sin su-ɔ be ja kplaman’n, be su yɛ ń fá be ń sín-ɔn.Afin Izraɛli i Si’n yɛle min, yɛ Efraimun ti min wa kpɛn.”+
10 Nvlenvle mun, amun tie ndɛ nga Zoova kan’n,naan amun wɔ mmuammua kpa be ko bo i jɔ nvle nga be o nzue’n i afiɛn lɔ’n be nun.+ Amun se kɛ:“Sran ng’ɔ yoli maan Izraɛlifuɛ’m be bo sanndili’n, ɔ́ wá yíayía be.Ɔ́ nían be su kɛ bua tafuɛ’n fa niɛn i bua’m besu’n sa.+
11 Afin Zoova kpɔ́ Zakɔbu i ti,+yɛ ɔ́ dé i sran ng’ɔ le wunmiɛn trɛ i’n i sa nun.*+
12 Bé bá, yɛ bé bó sró Siɔn i ti su nglo lɔ+yɛ aklunjɔɛ’n kún be kpo, Zoova i aklunye’n ti,*ɔ nin ble nin ɔɔzu, nin duvɛn uflɛuflɛ’n,+ nin ngo’n,nin bua ba mun, nin nannin ba mɔ bé wá ɲɛ́n i’n ti.+Bé káci kɛ fie kun mɔ nzue tuman su’n sa,+yɛ be su glɔman kun le.”+
13 Blɛ sɔ’n nun’n, talua m’ɔ nin-a siman bian’n ɔ́ sí able aklunjɔɛ’n ti.Gbanflɛn mun nin sran oke’m bé sí able likawlɛ wie.+Ń yó maan be awlabɔɛ’n káci aklunjɔɛ.+Ń fɔ́nvɔ be, yɛ ń mán be aklunjɔɛ naan be wla fi be afɛ’n su.+
14 Ń mán min ɲrun jranfuɛ’m be aliɛ lele ɔ́ bóbó be su.Yɛ ye nga ń má yó min nvlefuɛ mun’n ti’n, like fi su mianman be sa.”+ Zoova yɛ ɔ kan sɔ-ɔ.
15 “Zoova waan yoo:‘Be ti sran kun nɛn Rama+ lɔ, ɔ fɛfɛ yɛ ɔ sun fiaan kpa:Rasɛli yɛ ɔ su sun i mma yasua* mun-ɔn.+Kɛ i mma’m be ti’n be fɔnvɔ i’n, ɔ muɛnmɛn i nuan,afin be nunman lɛ kun.’”+
16 Zoova waan yoo:“‘Nán sun kun, nán maan ɔ ɲinmuɛn nzue’n gua kun,afin sa nga a yoli’n ti’n ń má lá ɔ ase.’ Zoova yɛ ɔ kan sɔ-ɔ.‘Bé fín be kpɔfuɛ’m be nvle’n nun lɔ bé bá.’+
17 Zoova waan yoo: ‘Lafi su kɛ ɔ ɲrun lɔ’n yó kpa.+Ɔ mma’m bé sá be sín bé bá be lika’n nun.’”+
18 “N tili Efraimun i fɛfɛlɛ’n. Ɔ fɛfɛ se kɛ:‘A tuli min fɔ, yɛ n kusu n sɔli nun klanman,kɛ nannin gbanflɛn kun mɔ be nin-a klemɛn i junman dilɛ’n sa.Fa min sa min sin ɔ wun, yɛ n su sisiman min bo naan m’an yaci sa tɛ’n i yolɛ,afin Zoova, wɔ yɛ a ti min Ɲanmiɛn’n niɔn.
19 Kɛ n yacili sa tɛ’n i yolɛ’n, sa nga n yoli i laa’n ɔ yoli min nsisɔ.+Kɛ be yoli mɔ n wunnin sa wlɛ’n, min wla boli min wun.*Ɲannzuɛn kunnin min, yɛ min ɲin guali ase,+afin sa tɛtɛ nga n yoli be min gbanflɛn nun’n, be yo min ɲannzuɛn.’”
20 “Efraimun ti ba kun mɔ n klo i-ɔ, nanwlɛ, n klo i kekleke. ?Nɛ́n i-ɔ?+Afin kɛ n ko ijɔ i cɛ’n, kpɛkun min wla su kpɛn i su.I sɔ’n ti’n, kɛ n buli i akunndan’n min wla boli min wun.*+Nanwlɛ, ń sí i aunnvɔɛ sakpasakpa.” Zoova yɛ ɔ kan sɔ-ɔ.+
21 “Sie nzɔliɛ like mun ɔ atin’n i nuan lɛ,tata nzɔliɛ like mun.+Nán ɔ ɲin kpa akpɔ dan’n su, akpɔ sɔ’n su yɛ ɔ fata kɛ a sin-ɔn.+Izraɛli, wɔ mɔ a ti kɛ talua m’ɔ nin-a siman bian’n sa’n, sa ɔ sin kɔ klɔ nga be ti ɔ liɛ’n be su.
22 ?Talua ɲin keklefuɛ, cɛn onin ko yɛ á yáci ɔ bo sisilɛ-ɔ?Afin Zoova w’a kpɛ like uflɛ kun ba asiɛ’n su:Bla kun i wun blíblí i yɛ ɔ́ sú yasua kun su-ɔ.”
23 Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Ndɛ nga bé wá kɛ́n i ekun Zida akpasua’n su lɔ’n, nin lɔ klɔ’m be su blɛ mɔ ń má yíayía be sran nga be trali be’n yɛ: ‘Sa nuan su sɛsɛ yolɛ lika,+ oka m’ɔ ti Ɲanmiɛn liɛ klonglo’n,+ maan Zoova yra ɔ su.’
24 Zidafuɛ mun nin Zida lɔ klɔ’m be kwlaa be sufuɛ mun, i fie difuɛ-o, i nnɛn kankanfuɛ-o, bé trán lɔ likawlɛ.+
25 Afin be kwlaa nga b’a fɛ’n, ń gúa be awlɛn su nzue yɛ be kwlaa nga b’a yo flɛkpɛɛ’n ń mán be wunmiɛn.”+
26 Kɛ ɔ yoli sɔ’n, yɛ n tinngeli-ɔ. Kpɛkun n tikeli min ɲinma. Lafilɛ nga n lafili’n ɔ yoli min fɛ kpa.
27 Zoova waan yoo: “Amun nian, cɛn kun wá jú. Cɛn sɔ’n nun’n, ń má yó maan Izraɛlifuɛ mun nin Zidafuɛ’m bé wá trɛ́ lelele. Yɛ ń má yó maan be nnɛn’m bé trɛ́ wie.”+
28 “Kɛ nga n fali min ɲin n sieli be su mɔ n tuli be bo, n buli be, n sacili be, n nunnunnin be, yɛ n yoli be tɛ sa’n,+ i wafa kunngba’n ń fá min ɲin ń síe be su ń kplán be, yɛ ń tá be.”+ Zoova yɛ ɔ kan sɔ-ɔ.
29 “Blɛ sɔ’n nun’n, be ndɛ nga be kan be se kɛ: ‘Siɛ mun be dili viɲin mma amuɛn, sanngɛ be mma mun yɛ be je’n ɲannin’n,’* be su kɛnmɛn i kun.+
30 Sanngɛ sran kun i sa tɛ ng’ɔ yo’n i ti yɛ ɔ́ wú-ɔ. Sran ng’ɔ di viɲin mma amuɛn’n i je liɛ’n yɛ ɔ́ ɲán-ɔn.”
31 Zoova waan yoo: “Amun nian! Cɛn wie lele’n, e nin Izraɛli nvle’n nin Zida nvle’n é trá aenguɛ uflɛ kun.+
32 Aenguɛ sɔ’n su yoman kɛ aenguɛ nga e nin be nannan mun e trali’n sa. Kɛ n trali be sa mɔ n fali be Ezipti lɔ fiteli’n,+ yɛ e nin be e trali aenguɛ sɔ’n niɔn. Sanngɛ ‘b’a diman min aenguɛ’n su.+ Kusu nn min yɛ n ti be min* kpakpafuɛ’n niɔn.’ Zoova yɛ ɔ kan sɔ-ɔ.”
33 Afin Zoova waan yoo: “Kɛ cɛn sɔ’m be ko sin’n, aenguɛ nga e nin Izraɛlifuɛ mun é wá trá’n yɛ: Ń fá min mmla’n ń fá wlá be nun,+ yɛ ń klɛ́ i be awlɛn’n nun.+ Ń yó be Ɲanmiɛn, yɛ be kusu bé yó min nvle.”+
34 “Yɛ sran fi su klemɛn i wiengu like kun. Yɛ sran fi su semɛn i niaan kun kɛ: ‘Si Zoova!’+ Afin be nga be leman ɲrun-o, be nga be le ɲrun-o, be kwlaa bé sí min.+ Ń yáci sa nga be yoli’n ń cɛ́ be. Yɛ min wla su kpɛnman be sa tɛtɛ’m be su kun.”+ Zoova yɛ ɔ kan sɔ-ɔ.
35 Zoova m’ɔ sieli wia’n kɛ ɔ kpaja wia nun’n,i m’ɔ sieli anglo ba nin nzraama’m be su mmlanaan be kpaja kɔnguɛ’n,i m’ɔ man jenvie’n su kpɛkun ɔ kejekeje i nun nzue’n,i mɔ i dunman’n yɛle Zoova m’ɔ ti sonja’m be su kpɛn’n,+ i waan yoo:
36 Zoova waan yoo: “‘Saan mmla sɔ’m be nunman lɛ kunyɛ Izraɛli i osu’n nunfuɛ’m be su yoman nvle kun min ɲrun-ɔn.’”+
37 Zoova waan yoo: “?Be kwla sunnzun ɲanmiɛn ng’ɔ la nglo lɔ plaii’n, annzɛ be kwla wun asiɛ’n i bo takatakawlɛ mun? Cɛcɛ. I wafa kunngba’n, sa kwlaa nga Izraɛlifuɛ’m be yoli’n ti’n, n su kwlá yiman be kwlaa be blo.’ Zoova yɛ ɔ kan sɔ-ɔ.”+
38 “Amun nian, cɛn wie lele’n bé wá kplán klɔ’n+ mán Zoova. Bé bó i bo Ananɛli Sua Fleiin’n+ su lele bé fá jú Cɔnjɔ su Anuan’n nun lɔ.”+ Zoova yɛ ɔ kan sɔ-ɔ.
39 “Yɛ ɲanman nga be fa sunnzun lika’n,+ ɔ́ kɔ́ lele jú Garɛbu kpɔlɛ’n su lɔ. Kpɛkun ɔ́ blí kɔ́ Goa bue liɛ’n su lɔ.
40 Fuɛn nin nzuɛn* kongo wunmuan’n,* ɔ́ yó sanwun Zoova ɲrun.+ Lika ng’ɔ fɛ i kpɔlɛ’n su lɔ lele m’ɔ fa ju Sedrɔn Kongo’n+ nun lɔ’n, m’ɔ kɔ lele ju Nnɛn Kpanngɔ Anuan’n+ i cɔnjɔ’n su lɔ wia afiliɛ lɔ’n, bé yó sɔ wie. Be su tumɛn i bo le, yɛ be su bubumɛn i le.”
Ja ngua lɔ ndɛ mun
^ Ebr., “tokofi’n.”
^ Annzɛ “mɔ n kleli titi kɛ n klo wɔ naan n su kpɔciman wɔ le’n niɔn.”
^ Annzɛ “á wlú be nga bé sí able’n nn bé srí’n, be nun.”
^ Annzɛ “ɔ́ kó sé sran ng’ɔ le wunmiɛn trɛ i’n kɛ ɔ fa mɛn i.”
^ Annzɛ “i ninnge kpakpa’m be ti.”
^ Annzɛ “i mma.”
^ Annzɛ “n finfinnin min sɔwa’n su.”
^ Ebr., “min klun aya’m be kejekejeli.”
^ Annzɛ “be je’n yoli be ya’n.”
^ Be kwla se ekun kɛ “be wun.”
^ Annzɛ “nzuɛn ng’ɔ ti lui ngunmin’n.” Yɛle kɛ nzuɛn nga nnɛn nga be fa yili tɛ mun’n, be lui’n guali su’n.
^ Annzɛ “lika kpɛtɛkplɛɛ’n.”
