Zeremin 26:1-24
26 Kɛ Zoziasi i wa Zozakimun+ m’ɔ ti Zida famiɛn’n boli i famiɛn dilɛ’n i bo’n, Zoova kannin ndɛ kleli Zeremin. Ɔ seli i kɛ:
2 “Zoova waan yoo: ‘Ko jran Zoova i sua’n i awlo klun lɔ naan be kwlaa nga be fin Zida klɔ’m be su mɔ be ba Zoova i sua’n nun kɛ bé sú i’n,* kan be wun ndɛ nga.* Ndɛ nga min waan a kan kle be’n, kɛn i kwlaa kle be, nán yaci ba kun sa lɛ.
3 Atrɛkpa’n, bé síe be su bé tíe, kpɛkun be kwlaa bé wlá be nzuɛn tɛtɛ’m be ase. Ɔ maan ɲrɛnnɛn nga be ayeliɛ tɛtɛ’m be ti’n n seli kɛ ń fá yí be su’n, n su fa yiman be su kun.*+
4 Se be kɛ: “Zoova waan yoo: ‘Amun sie amun su min nuan bo naan amun fa min mmla nga* mɔ n fa mannin amun’n su.
5 Yɛ min sufuɛ nga be ti min nuan ijɔfuɛ mɔ n sunmannin be lelele’n,* mɔ sanngɛ amun a sieman amun su be nuan bo’n,+ amun tie ndɛ nga be kan’n.
6 Sɛ amun a yoman sɔ’n, ń yó maan sua nga káci kɛ Silo+ sa. Yɛ asiɛ’n su nvlenvle’m be kwlaa bé fá klɔ nga i dunman’n bé bó sannzan.’”’”+
7 Kɛ Zeremin o lɛ kán ndɛ sɔ mun Zoova i sua’n nun lɔ’n, Ɲanmiɛn ɲrun jranfuɛ mun nin Ɲanmiɛn nuan ijɔfuɛ mun nin be kwlaa nga be o lɛ’n be tili.+
8 Kɛ Zeremin wieli ndɛ kwlaa nga Zoova fa wlɛli i nuan kɛ ɔ kan kle nvlefuɛ’m be kwlakwla’n i kan’n, Ɲanmiɛn ɲrun jranfuɛ mun nin Ɲanmiɛn nuan ijɔfuɛ mun nin sran’m be kwlaa be trɛli i, kpɛkun be seli i kɛ: “Ɔ liɛ w’a wie!
9 ?Ngue ti yɛ a jaso ijɔ Zoova nuan se kɛ: ‘Sua nga káci kɛ Silo sa, naan bé núnnún klɔ nga mlɔnmlɔnmlɔn, naan sran fi su tranman su kun-ɔn’?” Kpɛkun sran’m be kwlaa be bo sin yiali Zeremin, Zoova i sua’n nun lɔ.
10 Kɛ Zida lɔ sran dandan’m be tili ndɛ sɔ’n, be fin famiɛn’n i sua’n nun lɔ be fiteli. Kpɛkun be ɔli Zoova i sua’n nun lɔ be ko trantrannin Zoova i sua’n i anuan uflɛuflɛ’n i ɲrun lɛ.+
11 Yɛ Ɲanmiɛn ɲrun jranfuɛ nin Ɲanmiɛn nuan ijɔfuɛ’m be seli sran dandan sɔ mun nin sran’m be kwlaa be kɛ: “Bian nga nin kunlɛ fata,+ afin ɔ kannin klɔ nga i wun ndɛ tɛ. Kɛ ɔ́ kán’n amun bɔbɔ amun tili.”+
12 Yɛ Zeremin seli sran dandan’m be kwlakwla nin sran nga be o lɛ’n be kwlaa be kɛ: “Sua nga nin klɔ nga be wun ndɛ kwlaa nga n kannin mɔ amun tili i lɛ’n, Zoova m’ɔ sunmannin min’n yɛ ɔ fa wlali min nuan kɛ n kan-ɔn.+
13 I sɔ’n ti’n, amun kaci amun nzuɛn’n nin amun ayeliɛ’n yɛ amun fa ndɛ nga Zoova m’ɔ ti amun Ɲanmiɛn’n kan’n su. I liɛ’n, ɲrɛnnɛn nga Zoova waan ɔ́ fá yí amun su’n, ɔ su fa yiman amun su kun.*+
14 Min liɛ’n, n wo amun sa nun. Like nga amun nian naan ɔ ti su annzɛ ɔ ti kpa mɔ amun waan amún fá yó min’n, amun fa yo min.
15 Sanngɛ maan amun wun i wlɛ kɛ sɛ amun kun min’n, nn amun bɔbɔ nin klɔ nga nin i sufuɛ mun, amun a kun sran kun mɔ w’a yoman sa tɛ’n sa ngbɛn.* Afin Zoova yɛ ɔ sunmannin min sakpasakpa kɛ n kan ndɛ kwlaa sɔ mun n kle amun-ɔn.”
16 Yɛ sran dandan mun nin sran’m be kwlaa be seli Ɲanmiɛn ɲrun jranfuɛ mun nin Ɲanmiɛn nuan ijɔfuɛ’m be kɛ: “Ɔ fataman kɛ be kun bian nga. Afin Zoova m’ɔ ti e Ɲanmiɛn’n i nuan ndɛ yɛ ɔ kan kleli e-ɔ.”
17 Asa ekun’n, nvle’n i su kpɛnngbɛn wie’m be jasoli kpɛkun be seli be kwlaa nga be yiali lɛ’n be kɛ:
18 “Ezekiasi+ m’ɔ yoli Zida famiɛn’n i blɛ su’n, Mise+ m’ɔ fin Moresɛti’n ɔ ijɔli Ɲanmiɛn nuan. Ɔ seli Zidafuɛ’m be kwlaa be kɛ: ‘Zoova m’ɔ ti sonja’m be su kpɛn’n waan yoo:“Bé tútú Siɔn i kacɛ kɛ fie wie su sa.Zerizalɛmun káci yɔbuɛ kwle,+yɛ oka nga Sua’n wo su’n* ɔ́ káci kɛ kpɔlɛ kun m’ɔ o bo wie nun’n sa.”’*+
19 “?I sɔ m’ɔ kannin’n ti’n, Ezekiasi m’ɔ ti Zida famiɛn’n nin Zidafuɛ’m be kwlaa be kunnin i? Cɛcɛ. Sanngɛ famiɛn’n kleli kɛ ɔ sro Zoova, yɛ ɔ kpatali Zoova lele. Ɔ maan ɲrɛnnɛn nga Zoova seli kɛ ɔ́ fá yí be su’n, w’a fa yiman be su kun.*+ ?Ɔ maan nán saɛ ba yɛ e su wa kpɛ man e wun lɛ-ɔ?
20 “Bian kun ekun ijɔli Zoova i nuan. Semaia i wa yɛle bian sɔ’n. Be flɛ i kɛ Iri. Yɛ ɔ fin Kiriati-Zearimun.+ I kusu kannin kɛ ɲrɛnnɛn wá tɔ́ klɔ nga nin nvle nga su. Ndɛ ng’ɔ kannin’n i wie yɛ Zeremin kannin-ɔn.
21 Kɛ Famiɛn Zozakimun+ nin i safuɲrɛn’m be kwlaa nin i awlo lɔ sran dandan’m be kwlaa be tili i ndɛ’n, famiɛn’n kunndɛli kɛ be kun i.+ Sanngɛ kɛ Iri tili’n, srɛ kunnin i. Kpɛkun ɔ wanndi ɔli Ezipti.
22 Kɛ ɔ yoli sɔ’n, Famiɛn Zozakimun sunmannin Akbɔɔ i wa Ɛlnatan+ ɔ nin sran wie mun ekun Ezipti lɔ.
23 Be ko trali Iri Ezipti lɔ be blɛli Famiɛn Zozakimun, yɛ famiɛn’n fɛli i tokofi’n kunnin i-ɔ.+ Kpɛkun ɔ fɛli i saka’n yili i be nga be leman ɲrun’n be ndia’n nun lɔ.”
24 Sanngɛ Safan+ i wa Aikamun+ jrannin Zeremin sin. Ɔ maan b’a faman Zeremin b’a wlaman nvlefuɛ’m be sa nun kɛ be kun i.+
Ja ngua lɔ ndɛ mun
^ Annzɛ “kɛ bé kóto i bo’n.”
^ Annzɛ “kan ndɛ nga kle be.”
^ Annzɛ “ɔ́ yó min nsisɔ.”
^ Annzɛ “like nga n kle’n.”
^ Ebr., “n jaso nglɛmun ndɛ kpa’n n sunman be’n.”
^ Annzɛ “ɔ́ yó i nsisɔ.”
^ Ebr., “amun a fa sran kun mɔ w’a yoman sa’n i mmoja’n b’a gua amun wun.”
^ Annzɛ “oka nga Ɲanmiɛn sua’n o su’n.”
^ Annzɛ “kɛ bo’n nun lɔ lika nglonglo mun sa.”
^ Annzɛ “ɔ yoli i nsisɔ.”
