Israyɛll rao yʋʋr sẽn boond t’a Ɛlkana n da tar pagb a yiibu, a Ana ne a Penina. La a ra nonga a Ana n yɩɩda. A Penina ra yaanda a Ana wakat fãa, bala a ra tara kamb wʋsgo, t’a Ana yaool n pa tar biig ye. Yʋʋmd fãa, a Ɛlkana ra tallda a zakã rãmb n kẽnd sɛk-roogẽ wã Silo. Daar a ye, b sẽn wa n be beenẽ, a yãame t’a pʋg-nongr a Ana sũurã sãama wʋsgo. A yeel-a lame yaa: ‘Da yãb ye Ana. Mam nonga foo.’

A Ana wa n yikame n na n tɩ pʋʋse. A ra tara yãbre, la a pʋʋsd a Zeova n yetẽ yaa: ‘Zeova, fo sã n kõ maam bi-ribla, mam na n dɩk-a lame n kõ foo, t’a pa fo roogẽ wã n tʋm a yõor tɛka.’

Maan-kʋʋdb kãsem a Eli yãa a Ana sẽn kĩgsdã, n tags t’a yũu rãam n su. La a Ana yeel-a lame yaa: ‘M soaala, m pa yũ rãam ye. Yell n namsd maam wʋsgo, tɩ m togsd a Zeova.’ A Eli bãngame tɩ yẽ tudgame, n yeele: ‘Bɩ Wẽnnaam kõ foo bũmb ning fo sẽn datã.’ A Ana loogame, la a pa le yãb ye. Kiis a wãn poore, a roga bi-ribla, n pʋd a yʋʋr t’a Sãmwɛlle. Tags n ges a Ana sũur sẽn yɩ noog to-to.

A Ana pa yĩm a sẽn yeel a Zeova bũmb ningã ye. A Sãmwɛll sẽn bas  bĩisim bala, a ma tall-a lame n wa sɛk-roogẽ wã t’a na n pa be n tʋme. A yeela a Eli yaa: ‘Biig ning m sẽn pʋʋs a Zeova n kosã la woto. M dɩk-a lame n kõ a Zeova.’ Yʋʋmd fãa, a Ɛlkana ne a Ana ra kẽnd n geta a Sãmwɛlle. B sã n debda, b zãada fuug n tɩ kõ-a. A Zeova kɩtame t’a Ana le paam kom-dibli a tãabo, la kom-pugli a yiibu.