Ges-y sẽn be pʋgẽ wã

Ges-y sẽn be sebrã pʋgẽ

 SAK 75

A Sʋɩtãan maka a Zeezi

A Sʋɩtãan maka a Zeezi

A Zeezi sẽn deeg lisgã poore, vʋʋsem sõngã tall-a lame n kẽng weoogẽ, t’a maan rasem 40 n pa rɩ ye. Dẽnd kom n da tar-a wʋsgo. A Sʋɩtãan waame n na n mak-a. A yeela a Zeezi yaa: ‘Fo sã n sɩd yaa Wẽnnaam Biiga, bɩ f kɩt tɩ kug-kãensã lebg buri.’ La a Zeezi togsa bũmb sẽn be Wẽnnaam Gomdã pʋgẽ, n yeele: ‘B gʋlsame tɩ pa rɩɩb bal la ned segd n dɩ n vɩɩmd ye. A segd n kelga goam nins fãa a Zeova sẽn yetã.’

A Sʋɩtãan leb n yeela a Zeezi yaa: ‘Fo sã n sɩd yaa Wẽnnaam Biiga, bɩ f rʋ wẽnd-doogã zug n yɩke. B gʋlsame tɩ Wẽnnaam na n kɩtame t’a malɛgsã kok foo.’ La a Zeezi leb n togsa bũmb sẽn be Wẽnnaam Gomdã pʋgẽ, n yeele: ‘B gʋlsame tɩ ned pa segd n mak a Zeova ye.’

Rẽ poore, a Sʋɩtãan wilga a Zeezi dũniyã soolem fãa la b arzɛgsã, n yeel-a yaa: ‘Fo sã n yĩgimd vugr bal n waoog maam, mam na n kõo foo woto fãa.’ La a Zeezi leokame: ‘Sʋɩtãana, kẽng n looge! B gʋlsame tɩ yaa a Zeova a ye bal la d segd n waooge.’

Dẽ, a Sʋɩtãan loogame, la malɛgs wa n kõo a Zeezi rɩɩbo. Rẽ poore, a Zeezi tɩ moona Rĩungã koe-noogã. Yaa tʋʋm-kãng yĩng la a Zeova tʋm-a tẽngã zugu. Nebã sũur da nooma ne a sẽn zãmsd-b bũmb ninsã, la b tũud-a n kẽnd zĩig fãa.

“A [Sʋɩtãan] sã n yagd zĩrẽ, yaa a pʋga fãa la rẽnda, bala, a yaa zĩrẽ-yagda, la zĩrẽ wã ba.”—⁠Zã 8:⁠44