Ges-y sẽn be pʋgẽ wã

Ges-y sẽn be sebrã pʋgẽ

 SAK A 3

A Ãdem ne a Awa kɩɩsa Wẽnnaam

A Ãdem ne a Awa kɩɩsa Wẽnnaam

Daar a ye, a Awa ra yaa a yembre, tɩ waaf wa gom ne-a. Waafã yeel-a lame yaa: ‘Yaa sɩd tɩ Wẽnnaam pa rat tɩ y rɩ tɩɩsã fãa biis bɩ?’ T’a Awa leok yaa: ‘Tõnd tõe n dɩɩ tɩɩsã fãa biisi, sã n pa a ye bala. Tõnd sã n dɩ tɩ-kãng bilã, d na n kiime.’ La waafã yeel-a lame yaa: ‘Yãmb pa na n ki ye. Fo miime, yãmb sã n dɩ, y na n lebga wa Wẽnnaam.’ Waafã sẽn yeelã yaa sɩd bɩ? Ayo, yaa ziri. La a Awa ra tẽedame tɩ yaa sɩda. A sẽn da tar tɩɩgã bil gesgã, yamleoogã kẽ-a lame, t’a yãk n dɩ, la a tɩ kõ a Ãdem me. A Ãdem ra miime tɩ b sã n kɩɩs Wẽnnaam, b na n kiime. La baa ne rẽ, a rɩɩme.

Baraar zaabre, a Zeova goma ne a Ãdem la a Awa. A sok-b lame tɩ bõe yĩng tɩ b kɩɩs yẽ. A Awa yeelame tɩ yaa waafã n belg yẽ, t’a Ãdem yeel tɩ yaa a Awa n kõ yẽ. B sẽn kɩɩs a Zeova wã, a rig-b lame n yiis Edɛn zẽedã zĩigẽ. Sẽn na yɩl tɩ b ra le tõog n kẽ, a Zeova kɩtame tɩ malɛgs wa yals noorẽ wã, la a kɩt tɩ sʋʋg sẽn wit bugum me be be n yilimdẽ.

A Zeova yeelame t’a na n sɩbga sẽn belg-a a Awa wã. Pa waaf n sɩd ra gomd ne a Awa ye. A Zeova pa maan waaf t’a tõe n gom ye. Yaa malɛg-wẽng n da kɩt tɩ waafã gomda. A maana woto n na n belg a Awa. Malɛg-kãng yʋʋr la a Sʋɩtãana. Ka la bilfu, a Zeova na n sãama a Sʋɩtãana, t’a ra le belg nebã tɩ b maan sẽn yaa wẽng ye.

“Sʋtãanã . . . yɩɩ nin-kʋʋd hal sɩngr wẽndẽ tɩ ta moasã, la a ka pa sɩd pʋgẽ ye, sɩd sẽn ka be yẽnda pʋgẽ wã yĩnga. ”​—⁠Zã 8:⁠44