Ges-y sẽn be pʋgẽ wã

Ges-y sẽn be sebrã pʋgẽ

 SAK 88

B wa n yõka a Zeezi

B wa n yõka a Zeezi

A Zeezi ne a karen-biisã pasga Kidrõ longã n dʋ Oliiv tɩɩs tãngã. Yʋn-sʋk ra loogame, tɩ kiuugã yaa pɛɛlga. B sẽn ta Gɛtsemane tɩɩsã zĩigẽ, a Zeezi yeel-b lame yaa: “Pa-y ka n gũ.” A zãaga bilfu, n yĩgimdi. A sũurã ra sãama wʋsgo. La a pʋʋsa a Zeova n yeel yaa: ‘Bɩ f kɩt tɩ f raabã maane.’ Rẽ, a Zeova tʋma malɛk t’a wa keng a Zeezi raoodo. A Zeezi sẽn lebg n wa a tʋm-tʋmdbã nengẽ, a mikame tɩ b fãa gõeeme, t’a yeel-b yaa: ‘Yik-y-yã! Yãmb pa segd n gũs masã ye. Wakat ning b sẽn na n yõk maam n kõ bɛɛbã taame.’

Pa kaoose, a Zida talla neb wʋsg sẽn zãad sʋʋs la raad n wa. A ra mii a Zeezi sẽn beẽ, bala a Zeezi ne a tʋm-tʋmdbã ra nong n wata be. A Zida ra yeela sodaasã tɩ b sã n ta, yẽ na n maana bũmb tɩ b bãng a Zeezi. B sẽn ta wã, a kolgame n pʋʋs a Zeezi, n mok-a, t’a Zeezi yeel-a yaa: ‘Zida, fo moka maam n na n kɩt tɩ b yõk maam?’

A Zeezi kolga nebã n sok-b yaa: “Yãmb baooda ãnda?” Tɩ b leok tɩ yaa Nazarɛt rao a Zeezi. A Zeezi leokame yaa: “Yaa maam!” La nebã tarame n lʋɩ. A le sok-b lame yaa: “Yaa ãnda la yãmb baooda?” Tɩ b le leok tɩ yaa Nazarɛt rao a Zeezi. A Zeezi yeel-b lame yaa: ‘Mam yeela yãmb tɩ yaa maam. Bas-y nin-kãensã tɩ b looge.’

A Pɩyɛɛr sẽn bãng tɩ b na n yõka a Zeezi wã, a fooga sʋʋg n fiuug a Malkus tʋbrã. Yaa maan-kʋʋdb kãsmã tʋm-tʋmda. A Zeezi sɩɩsa rao wã tʋbrã, n sãoog-a. Rẽ poore, a yeela a Pɩyɛɛr yaa: ‘Lebs n sui f sʋʋgã. Fo sã n zabd ne sʋʋga, sʋʋg n na n kʋ-fo.’ Sodaasã yõka a Zeezi n sẽb a  nusã, la tʋm-tʋmdbã zoeeme. Nebã talla a Zeezi n kẽng maan-kʋʋdb kãsem a Ann nengẽ. A Ann soka a Zeezi sogsgo, la a kɩt tɩ b tall-a n kẽng maan-kʋʋdb kãsem a Kayif nengẽ. Tʋm-tʋmdbã maana wãna?

“Yãmb na n paama namsg dũniyã pʋgẽ. La bɩ y keng y sũyã, bala, mam tõoga dũniyã.”—Zã 16:⁠33