1 Timotius 6:1-21

  • Budhak kudu ngajèni majikané (1, 2)

  • Soal guru palsu lan soal nresnani dhuwit (3-10)

  • Petunjuk kanggo abdiné Gusti Allah (11-16)

  • Nindakké akèh tumindak sing apik (17-19)

  • Njaga apa sing wis dipercayakké marang kowé (20, 21)

6  Budhak-budhak kudu terus nganggep majikané pantes diajèni saktulusé ati+ bèn jenengé Gusti Allah lan ajarané ora dièlèk-èlèk.+  Senajan majikané kuwi sedulur seiman, budhak kuwi kudu tetep ngajèni dhèwèké. Malah, kuduné dhèwèké ngupaya tenanan nglayani majikané merga sing dilayani kuwi sedulur seimané sing ditresnani. Kowé kudu terus mulang soal iki lan mènèhi naséhat-naséhat iki.  Nèk ana wong sing mulang soal ajaran liya lan ora setuju karo petunjuk sing bener,*+ sing asalé saka Yésus Kristus Gustiné awaké dhéwé, utawa nèk sing diwulangké kuwi ora nggawé wong-wong nduwé iman marang Gusti Allah,+  wong kuwi sombong lan ora ngerti apa-apa.+ Dhèwèké seneng banget nggolèk masalah lan padu soal kata-kata.+ Kuwi nggawé wong-wong dadi iri, debat, mitnah, lan ora percaya karo liyané.  Kuwi ya nggawé wong-wong padu soal masalah sing sepélé nganti ora ana entèké. Kuwi ditindakké karo wong-wong sing ninggalké apa sing bener lan pikirané jahat,+ sing ngabdi marang Gusti Allah merga péngin nggolèk untung.+  Pancèn, wong sing ngabdi marang Gusti Allah+ lan puas karo apa sing diduwèni bakal éntuk akèh manfaat.  Awaké dhéwé ora nggawa apa-apa wektu lair ing donya, lan awaké dhéwé ya ora nggawa apa-apa wektu mati.+  Dadi, awaké dhéwé bakal puas nèk wis nduwé panganan lan klambi.*+  Ning, wong sing péngin banget dadi sugih bakal kegodha, kena jerat, lan kejebak+ karo akèh kepénginan sing ora ana gunané lan nggawé rugi. Kuwi nggawé wong-wong kuwi sengsara lan mati.+ 10  Merga nresnani dhuwit, akèh wong nindakké kejahatan, ora percaya manèh karo Gusti Allah, lan ngalami akèh kesusahan.+ 11  Ning kowé, abdiné Gusti Allah, kowé kudu ngedohi kabèh kuwi. Kowé kudu ngupaya tenanan kanggo ngabdi marang Gusti Allah lan nindakké apa sing bener. Kowé ya kudu ngupaya tenanan bèn nduwé iman, katresnan, kesabaran, lan watak sing alus.+ 12  Kowé kudu bener-bener berjuang demi iman. Kowé kudu ngupaya nduwé harapan sing kuwat kanggo urip saklawasé. Gusti Allah wis milih kowé bèn kowé isa urip saklawasé lan kowé wis martakké soal urip kuwi ing ngarepé wong akèh. 13  Ing ngarepé Gusti Allah sing mènèhi urip marang kabèh lan ing ngarepé Kristus Yésus sing mènèhi kesaksian sing apik marang Pontius Pilatus ing ngarepé wong akèh,+ aku mènèhi petunjuk marang kowé 14  bèn kowé nindakké préntah iki. Kowé kudu tetep murni lan ora salah nganti wektuné Yésus Kristus Gustiné awaké dhéwé nduduhké kemuliaané.+ 15  Ing wektu sing ditentokké, Gusti sing kuwat lan bahagia kuwi bakal nduduhké kemuliaané. Dhèwèké kuwi Rajané kabèh sing mréntah dadi raja lan Gustiné kabèh sing mréntah dadi gusti.+ 16  Ing antarané kabèh raja lan gusti, mung dhèwèké sing ora isa mati.+ Dhèwèké ana ing panggonan sing padhang banget sing ora isa dicedhaki karo sapa waé,+ sing durung tau didelok lan ora isa didelok manungsa.+ Muga-muga dhèwèké dihormati lan muga-muga kuwasané tetep ana saklawasé. Amin. 17  Kowé kudu mènèhi petunjuk* marang wong-wong sing sugih ing jaman* saiki bèn ora sombong lan bèn ora ngendelké hartané sing isa ilang.+ Ning, wong-wong kuwi kudu ngendelké Gusti Allah sing nyedhiakké akèh banget sing awaké dhéwé nikmati.+ 18  Wong-wong kuwi kudu mbok kandhani bèn nindakké akèh tumindak sing apik, murah hati, seneng mènèhi,+ 19  lan nglumpukké harta saka Gusti Allah sing bakal mènèhi jaminan kanggo urip sukmbèn,+ supaya wong-wong kuwi isa terus nduwé harapan sing kuwat kanggo urip sing saktenané.+ 20  Timotius, kowé kudu njaga apa sing wis dipercayakké marang kowé.+ Aja ngrungokké omongan sing ora ana gunané lan sing ngrèmèhké Gusti Allah. Aja ngrungokké pengetahuan palsu sing ora sesuai karo apa sing bener.+ 21  Ana wong-wong sing ninggalké ajaran sing bener merga manut karo pengetahuan sing kaya ngono. Muga-muga Gusti Allah apikan banget karo kowé.

Katrangan Tambahan

Utawa ”sing nguwatké; ana gunané”.
Utawa ”lan panggonan”.
Utawa ”préntah”.
Utawa ”sistem donya”. Deloken Daftar Istilah.